PAWTDAWKNA 24 - PATHIEN LEKHABU THIENGTHO (BSI)

Thisan a Thuthun

¹ Chun, Lalpa’n Mosi kawmah, “Nang tawh, Aron tawh Nadab tawh Abihu tawh, Israel upa sawmsagih te tawh tângah hung to unla, gal khat apat in chibai ei hun bûk un.

² Chun, Mosi chuh amah mai in Lalpa kawmah hung nai henla, amau haw vang chun hun naih kiu henla, mipite le a kawmah hung to kiu hen” a ti a.

³ Tichun Mosi chuh a va chieh a, Lalpa thugen chengcheng leh vaihawm dân ding chengcheng chuh mipite kawmah a va gen a: chun, mi chengcheng chun, “Lalpa gen chengcheng chuh hih ing kau,” ti’n kiguol in a dâwng u a.

⁴ Chun, Mosi’n Lalpa thupiek chengcheng chuh a zik tha a. Zingkal matak in a tho a, tângbul achun maichâm a va siem a, chun, suongphuh sawmlenih, Israel nam sawmlenih dungzui in a phut a.

⁵ Zie chun, Israel chate laka tangval haw chuh a sawl a, ziehaw chun Lalpa dingin hâlmang thilpiek haw a pieu a, chamna thillat dingin bâwngchal haw chun a kithawi u a.

⁶ Chun, Mosi’n zie thisan kimkhat chuh a la a, kuonghaw ah a kawih a; thisan kimkhat dang chuh maichâm ah a theh a.

⁷ Chun, thugawlh lehkhabu chuh a la a, mipite zak achun a sim a: amau chun, “Lalpa’n a gen chengcheng chuh hih zel ing ka ting un, zawp zel ing kau,” a tiu a.

⁸ Khutichun Mosi’n thisan chuh a la a, mipite chuh a thehkhum a, “Ngaitiem u, ziehi thisan a thugawlh, Lalpa’n na kawm u a a thugawlh chuh ahi hi,” a ti a.

⁹ Khutichun Mosi leh Aron leh Nadab leh Abihu leh Israel upa sawmsagih te chuh tâng achun a va chieh to u a:

¹⁰ Israel Pathien chuh a va muu a; chun, a kêngpêk nuoi chuh sapphire suongmantam a kisiem hileh kilawm a um a, a thien zie chuh van taksa thien guolin a thieng a.

¹¹ Chun, Pathien in Israel chate haw laka milien haw chung achun a khut a tha puoi; tichun Pathien chuh a muu a, a neu in, a dâwn khawm tau hi.

Mosi Sinai Tang ah

¹² Khutichun Lalpa’n Mosi kawmah, “Tang ahin ka kawmah hung to inla, na umsung chun mipite na hilh ding suongpek a dân leh thupiek ka zik chuh hun na pie’ng ka,” a ti a.

¹³ Chun, Mosi leh a nasempa Joshua chuh a kipan u a: chun, Mosi chuh tâng, Pathien tâng achun a chieh to ta a.

¹⁴ Mosi chun upate kawm achun, “Na kawm u a ka hungkit masangsieh zie tak ahin ei na ngak zing un; Aron leh Hur na kawm u ah a um u a, kuo’n le thubuoi bang hitaleh na neih u chun a kawm u ahi na chieh sek ding uh ahi,” a ti a.

¹⁵ Khutichun Mosi chuh tâng achun a va kalto a, chun, meipi’n tâng chuh a khuh ta a.

¹⁶ Chun, Lalpa lopina chuh Sinai tâng achun a um zing ta a, meipi chun ni gup sung a khuh a: chun a ni sagih ni chun meipi apat chun Mosi chuh a vak sama.

¹⁷ Israel chate mitmuh chun Lalpa lopina lat dân chuh tângsipa hâltuina meikuong tawbang hiel ahi.

¹⁸ Chun, Mosi chuh meipi laka tâng achun a va kalto a, chun, Mosi chuh tâng achun ni sawmli leh zan sawmli a va um hi.