PAWTDAWKNA 23 - PATHIEN LEKHABU THIENGTHO (BSI)

Uoh chuom Neilo a Vaihawmna

¹ “Thuthang diklo chuh na gensawn maimai ding ahi puoi; hetpih diklo hi dingin migilo na kizawppih ding ahi puoi.

² Thil diklo hih dingin mipi chuh na mawk zuih ding ahi puoh a; mi thubuoi ale a hetpihtu a na pan tieng leh, a dik zaw thiemloh chan sak dingin a tam lam lama chuh na pan zieng ding ahi puoi;

³ mi chuh a chatgah ziek a thubuoi achu na panpih chuom ding ahi puoi.

⁴ “Na melmate bâwngchal ahim, sabiltung ahim vakmang na muh chun a kawma na hawih lut sak kit teitei ding ahi.

⁵ Na melmate sabiltung a puok in a delhden zing na muh chun, taihsan zieng lo a na panpih teitei ding ahi.

⁶ “Na mi chagah chuh a thubuoi ah thudik kalh a vai na hawmsak ding ahi puoi.

⁷ Thu diklo taka mi na hêk ding ahi puoi; chun, mi gitlohna bei leh mi kitûp haw chuh sulum ki’n; mi gilote chuh thiem chansak ding ka hi puoh ngâl a.

⁸ Gawlhgukna himhim na lâk ding ahi puoi, thiemlohna neilote chungchâng achun gawlhgukna’n mi mit a sudûk sek hi.

⁹ “Nam dang na bawl gimtheih ding ahi puoi; nang haw le Aigupta gam akhan nam dang na hih tâk ziek un, nam dang lunggil put dân chuh na he ngâl u a.

Kum Sagihna leh Ni Sagihna

¹⁰ “Kum gup sung chuh na lo u a buh na tuh ding ahi a, zie a pawt cheng chuh na lâkkhâwm ding ahi.

¹¹ A kum sagih kum chun vang chawlhsak a, um hiet hiet sak ding ahi; tichun na mi chagahte’n ne thei untin; chun, a lâk mâwk uh um zahzah chuh gamsate’n ne ding ahiu hi. Khutibang mah chun na grep huon leh na olive huon chule na hih ding ahi.

¹² “Ni gup sungin na sem inla, a ni sagih ni chun na chawlh ding ahi; tichun, na bâwngchal ahim, na sabiltung ahim a na châwl thei untin, na suok leh nam dangte le a hat thak theih na dingun.

¹³ “Tichun na kawm u a ka gen chengcheng hi khawksau inla; pathien danghaw min himhim suoh kiu inla, na kam u apat in zak le kiza kihen la, a kawm u ale na paucham loh ding uh ahi.

Kutpi Thum te

¹⁴ “Kum khatin thumvei kei nei limbawlna dingun kut na neih ding uh ahi.

¹⁵ Thu ka hun piek bangin, Aigupta gam na nutsieh kum uh, Abib tha chun chângthâk chawl sawhloh kut ni sagih na mat ding uh ahi. Zie kut sung ni sagih chuh chângthâk chawl tel himhim na nêk loh dinguh ahi. Tichun, ka ma ah kuomah khutngawn a na hung kilat loh dinguh ahi.

¹⁶ “Chun, lo a na sepgim gah masapen buh-ât guolvakna na neih ding uh ahi. Chun, kumtawp tieng leh, lo a nasep gim gahte na kawihkhâwm zawh vek tieng leh Bawkcha Kut na mat dinguh ahi.

¹⁷ Na lak u a pasal cheng chuh kum khat sungin thumvei Lalpa Pathien masanga a hung kilat dinguh ahi.

¹⁸ “Kei dingin kithawihna sa thisan chuh chângthâk chawl sawh tawh na hun piek ding ahi puoi; kei dingin kut na gan thau chuh zankhuo’n, a zing chana na kawih ding le ahi puoi.

¹⁹ “Na lo a thai gah laka amasapen chuh Lalpa na Pathien In a na hun chawih ding ahi. Kelno chuh a pi nawitui a na huon loh ding ahi.

Thutiem haw leh A Thuhilh na haw

²⁰ “Ngaitie, nang haw lampi a hun veng zel ding leh, mun ka siemna a hun puilut dingin na masang u ah vânsâwlchâk sawl ding ka hi.

²¹ Amah zai ngak unla, a thugen chuh zawp un; a chungah kiphin kiu in: zie a helte chuh hun ngaidam nuom lo ding ahi ngâl a; amah achun ka min a um ngâla.

²² Amahvang chuh a thugen na zawp takzet u a, ka gen takphawt na hih zel u chun, na melmateu hun do sak zel ing ka, na kilanpihteu chuh ka kilanpih ding ahi.

²³ Ka vânsâwlchâk chun na mau pui zel intin, Amor te, Hit te, Periz te, Kanaan te, Hiv te, Jebus te umna achun hun pui intin; amau haw chuh sumang kêi ing ka.

²⁴ A pathienteu chuh na ho ding uh ahi puoh a, a nau le na sep ding uh ahi puoi, a thilhih hawu bang chu le na hih ding uh ahi puoi; na sukchip suok ding uh ahi a, a suongphuh teu chuh na suknel sak suok ding uh ahi.

²⁵ Chun, Lalpa na Pathien u hi nei ho u chun, na chângthâk u leh na tuiteu chuh vangsak ing ka ting; chun, na lak u apat in natna lamang kêi ing ka.

²⁶ Chun, na gamsung u ahin nausie leh chîng himhim um puo’n tin; na damsung niteu chuh hun suksau sak ing ka.

²⁷ “Na masang u achun ka lauh-umna sawl ing ka ting, na chiehna ding gam u a mihaw chengcheng chuh sulungkham ing ka ting, tichun, na melmateu chuh na masang u ah taihsiet sak ing ka.

²⁸ Chun, na masang u ah khuoingal sawl ing ka ting, zie chun Hiv te, Kanaan te, Hit te, na masang u achun delhmang in au.

²⁹ Kum khat sung chun hun delhdawk sak zieng puo’ng ka; khutilochun gam chuh hung pawn mai kha’n tin, gamsate chuh nang u dingin hung tam taluo kha’n au.

³⁰ Na hung pun u a, gam na luoh dim mau chun, awl awlin hun nawhdawk sak zaw’ng ka.

³¹ Na gamgiu chuh Tuipi San apat a Philistia tuipi chanin, chun gamgaw apat a Euphrates lui chanin hun zam sak ing ka: zie gam a um haw chuh na khut u a hun pie ding ka hi ngâl a; tichun amau haw chuh na nawhdawk ding uh ahi.

³² Amau haw tawh thuthun na siem ding uh ahi puoh a, a pathienteu kawm ale thuthun na siem ding uh ahi puoi.

³³ Na gamsung u a a chên loh ding uh ahi, khutilochun kei chung ahin thil gilo hun hih sak kha’n au; a pathienteu na na sep u chun nang u a dingin thâng hi tei ding ahi,” ti’n a ti a.