Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

PAWTDAWKNA 22 - PATHIEN LEKHABU THIENGTHO (BSI)


Thil Ditkit Dingte

1 “Kuo’n le, bâwngchal ahim, belam ahim a gûk a, a thah hi henla, a zuok hilele, bâwngchal khat mana chuh bâwngchal nga a piek ding ahi, belam khat thasang a chuh belam li a piek ding ahi; ahi’n, zie chuh ahih theih loh chun, a gukchak man chuh amah chuh zuok ding ahi; a gancha gûk chuh bâwngchal ahim, sabiltung ahim, belam ahim hilele a hinga muh kit ahih chun a lehnih a a dit ding ahi.

2 Gucha, mi In a lut chuh ana man in, ana zêp lum ta leh a thisan phuba chuh um puo’n a.

3 “Himahleh, nisuok nung ahih le chuh vang amah a dingin thisan phuba chuh um intin, a thil gûk cheng kim kêi a a piekkit vek ding ahi. Piek ding a neih loh le vang chuh a gukchak mana chuh amah chuh zuok ding ahi.

4 Gucha’n a thil gûk laka bâwngchal ahim, sabiltung ahim, belam ahim a thil neih laka muh ahih chun a lehnih a a dit ding ahi.

5 “Mi kuo’n le a gancha thahdawk henla, mi lo ahim, grep huon ahim ah ana ta hen la, mi lo a thil chu a na ne zo taleh, amah lo phapen leh amah grep huon phapen a chuh a dit ding ahi.

6 “Mi’n mei thahsuok in lingnawk haw ahim kamat in, lo a buhpawl haw ahim, buh ding lai haw ahim, katum taleh, mei thahsuokpa ngêi chun a dit ngêi ngêi ding ahi.

7 “Mi’n a dangka ahim, a thuomphuo ahim a invengpa vawpsak henla, chun, zie In apat chun mi’n ana gu taleh, gucha chuh a mat u chun, a zah nih a a dit ding ahi.

8 Gucha chuh a mat loh u chun, zie Inneipa chuh vaihawmte kawmah va chieh intin, a invengpa thuomphuo chuh kei gûk ahi puoi, ti a, a va kihâksiel ding ahi.

9 “Kiniel buoina taphawt chuh bâwngchal thu ahim, sabiltung thu ahim, belam thu ahim, silhlechen thu ahim, thil bang hileh mansak chungchâng thu mawngmawng ah mi’n, ‘Ziehi chuh keia ahi,’ a tih chun, a nih u a thubuoi chuh vaihawmte masanga a tut ding ahi. Vaihawm te’n mawh a chansak zawk zawk chun a invengpa chuh a lehnih pie’n a.

10 “Mi’n a sabiltung ahim, a bâwngchal ahim, belam ahim, gan bang hitaleh a invengpa ana kawlsak hen la; chun, a thi ahim, kisuna ahim, hawihmang in ahim ana um ta henla, kuoma’n la mu kiu henla,

11 amah chun a invengpa gan chuh a khawih leh khawihloh thu ah, a nih u a kal achun Pathien hona In a a kihâksiel ding uh ahi. Gancha chuh ana gûk loh ahih chun, a neipa chun a na pawm sak intin, a dit ngailo ding ahi.

12 Amahvang chuh guksak ngêi ahih chun a neipa chuh a dit ding ahi.

13 Gamsa’n a peh a hih chun a nek mawk chuh hetpih dingin hun chawi hen; zie sa peh thasang chuh a dit loh ding ahi.

14 “Chun, min a invengpa gan khêl henla, a neipa um loh kâl in a kisuliem ahim, ahihloh leh thi taleh, a dit ngêi ngêi ding ahi.

15 A neipa chuh a um le chu vang a dit ding ahi puoi; a khelhman um ding a gancha chuh a khelh ahih chun, a khelhman a pieksa chun a mang cheng chuh a khuh ahi tai.


Khawtang Hinkhuo leh Sakhuo Dante

16 “Mi’n nungak zi a a huolloh chuh ana thêm in, ana kuolpih taleh, aman pie’n tin, a zi dinga a neih ngêi ngêi ding ahi.

17 A pa’n a neihsak nuom loh hiel chun chuh, nungak thiengtho man zah sum chuh a piek himhim ding ahi.

18 “Dawi thil mang numei himhim chuh na thah teitei ding uh ahi.

19 “Kuole gancha kuolpih taphawt chuh thah teitei ding ahi.

20 “Kuole kei kawm mai tihloh a, Pathien dang himhim kawma kithawi chuh sukmang ngêi ngêi ding ahi.

21 “Malzin na bawlsiet loh dinguh ahi, muh le na muhsit loh ding uh ahi; nang haw le Aigupta gam akhan malzin na hiu kha.

22 Meithai ahim, naupang pa neilo ahim chuh na sukgimtheih ding ahi puoi.

23 Amau haw chuh na sukgimtheih u a, ei hun sap phawt u chun, kei Lalpa hin ei sapnau aw chuh a na za tei ing ka ting;

24 tichun, na chunga ka lungnat na hung kuong zak intin, chemzâm in hun that ka ting; chun, na ziteu chuh meithai hiu intin, na chateu le pa beiin um in au.

25 “Ka mite, na kawm u a chagah taka umte kawma dangka na palâk sak u chun, na leibateu banga na bawl dinguh ahi puoi; a pung le na lak ding uh ahi puoi.

26 Kitiemna dinga na invengte silhlechen chuh na hên sak chun, ni tum masang ngeia na piekkit ding ahi.

27 Zie chuh kituomna dinga a neihsun ahi a, a sapum tuom lumna dinga a puon ahi ngâl a; bang silh in ahim a ihmut ding? Chun, hiti hi hung hi’n tin, ei hun sap chun a na za ngêi ing ka ting; kei chuh mi lungsiet thiem tak ka hi ngâl a.

28 “Pathien chuh gensie ki’n la, na mite laka vaihawm haw chule hansie na lawh ding ahi puoi.

29 “Na thai gah masapen leh na uain tui va masapen chuh vaigei lo a na lat ding ahi. Na chapa upapen chuh nei piek ding ahi.

30 Khutibangmah chun, na bâwngchal haw leh na belam haw chule na hih ding ahi; ni sagih chuh a pi kawmah um intin, a ni giet ni chuleh nei piek ding ahi.

31 “Keia dinga mi thiengtho na hih dinguh ahi, zieziekchun, gamlak a gamsa’n a thahsa ahim gamsa peh himhim chuh na nêk loh ding uh ahi a; ui na piek ding uh ahi.

Gangte Holy Bible - PATHIEN LEKHABU THIENGTHO

Copyright © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ