PAWTDAWKNA 20 - PATHIEN LEKHABU THIENGTHO (BSI)

Thu Sawm Piek

¹ Pathien in zie thu chengcheng hi a gen a:

² “Kei, Lalpa na Pathien uh, Aigupta gama suok apat a hun puidawkpa chuh ka hi.

³ “Kei lo chuh Pathien dang himhim na neih ding uh ahi puoi.

⁴ “Milim siemkawm leh thil a kibatpih himhim, chunglam van a um ahim, nuoi lam leia um ahim, lei nuoi lama tui lak a um ahim, nang dinga na siem ding ahi puoi:

⁵ amau haw masanga chuh na kûn ding ahi puoh a, a nau le na sep ding ahi puoi: kei Lalpa na Pathien uh hi Pathien thikthusie, pate gitlohna zieka chate gawt sek, ei hawte chuh suon thumna leh suon lina chana gawt sek leh,

⁶ ei hehpih a ka thupiek haw zawpte chuh suon sang tamtak chana le lungsietna latsak sek ka hi hi.

⁷ “Jehovah, na Pathien min chuh mawk a na suoh maimai ding ahi puoi. Lalpa chun a min mawk suoh mai maite chuh gilo lo a ngai ding ahi puoh ngâla.

⁸ “Chawlhni hi thiengtho taka nit ding ahi tih hezing in.

⁹ Ni gup sungin na na sep ding ahi a, na na chengcheng chuh na sep ding ahi;

¹⁰ a ni sagih ni vang chuh Lalpa na Pathien dinga chawlhni ahi; zie ni chun na himhim na sep ding ahi puoi, nangin le, na chapa’n le, na chanu’n le, na suokpa’n le, na suoknu’n le, na ganchate’n le, na In a nam dang in le.

¹¹ Ni gup sungin Lalpa’n lei leh vante, tuisuohgiet leh a sunga um chengcheng te chuh a siem a, a ni sagih ni chun a châwl ta a. Zieziekchun, Lalpa hin chawlhni chuh a vangsak a, a hih thiengtho ta a.

¹² “Na nu leh na pa zahbawl in; tichun Lalpa na Pathien in gam a hun piek ahin damsawt inla.

¹³ “Tuol na thah ding ahi puoi.

¹⁴ “Zawl na saih ding ahi puoi.

¹⁵ “Na gûk ding ahi puoi.

¹⁶ “Na vengte chunga hetpih diklo a na pan ding ahi puoi.

¹⁷ “Na vengte In na awhchâk ding ahi puoh a, na vengte zi na awhchâk ding ahi puoi, a suokpa ahim, a suoknu ahim, a bâwngchal ahim, a sabiltung ahim, na vengte a himhim chuh na awhchâk ding ahi puoi,” ti’n.

Mipite Lauhna

¹⁸ Chun, mipite chun van-gi leh kawlphe leh pengkun gite, tânga meikhu te chu a muh phet un, lau in a kilîng u a, gamla tak ah a ding tau a.

¹⁹ Tichun Mosi kawmah, “Ka kawm u ahin nangin thu gen zaw tie, a na ngaitha’ng kau: Pathien chun vang ka kawm u ahin thu gen ta kiheh, khutilochun thi kha’ng kau,” a tiu a.

²⁰ Chun, Mosi’n mipite kawm achun, “Lau kiu in, Pathien in a hun patep na hiu hi, a hun suklauh hi na gitloh lohna dinguh ahi,” a ti a.

²¹ Mipite chuh gamla tak ah a na ding zing u a, Mosi chun Pathien umna thim sah mepmup lam chuh a va zuon a.

Milim haw leh Maichâmte

²² Khutichun Lalpa’n Mosi chuh, Israel chate kawma thugen dingin thu a pie a: “Zie thu hi Israel chate hetsak in, nangmau haw ngêi in van apat a ka hun hopih zie hi na he tau a.

²³ Pathien dang himhim chuh ka kieng ahin na hun neih loh dinguh ahi; dangkaguo pathien, sana pathien ahim na kisiem loh dinguh ahi.

²⁴ Kei dingin lei a kisiem maichâm na siem ding ahi, achung achun hâlmang thilpiek na belamte leh bâwngchalte chuh hâlmang thilpiek leh chamna thillat dinga na piek sek ding ahi: muntin ah kei nei hona dinga ka kawihchuom ahi a, zie tak achun hung sek ing ka ting, vang hun pie sek ing ka.

²⁵ Chun, suong a maichâm nei siem sak ding chun suong kisêk a na siem ding ahi puoi; na matchâk chuh na mat chun chuh na sukbuok hiding ahi.

²⁶ Ka maichâm chuh kaltohna kalbihaw nei a na siem loh ding ahi, kal le na kal toh loh ding ahi, sangawn a na um kilang ding ahi ngâl in.