PAWTDAWKNA 2 - PATHIEN LEKHABU THIENGTHO (BSI)

Mosi Pienna

¹ Zielai chun Levi suona mi khat ava pawtdawk a, Levi chanu mah zi’n ava nei a,

² Chun, numei chun nau a vawp a, chapa a nei a; amah chun nausen chuh melhawih a sa mah mah a, tha thum a selgu a.

³ Himahlele, selgûk zing theih ahihloh phet chun, luongkung a bawm kisiem a la a, zie chuh buon leh lawng châlna’n a châl a; nausen chuh zie chun a siel a, tichun lui panga phailuong kung lak achun a kawih ta a.

⁴ Tichun, a chung ah bang thil ahung tung taphet dem tih het guo’n a suohpihnu chuh gamla deuh ahin a ding a.

⁵ Chun, Pharaoh chanu chuh kisil dingin lui ah a hung a; a suok numeite chule lui pang achun a vakviel u a. Phailuong kung laka bawm chuh a vak muh phet chun a la dingin a suok numei khat a vak sawl a.

⁶ Chun, Pharaoh chanu chun a vak hawn phetin nausen chuh a mu a, ngaitie, nausen chuh a kap ta a, lungsiet um a sa mah mah a: Zie hih Hebraite cha ahi hila, a ti a.

⁷ Tichun, a suohpihnu chun Pharaoh chanu kawm achun, “Zie nausen hi a hun dawnsak dingin Hebrai numei naudawn ka hun sap sak die?” a ti a.

⁸ Pharaoh chanu chun a kawmah, “Chieh inla va sam ah,” a ti a. Khutichun nungak chuh a chieh a, zie nausen nu chuh a va sap sak ta a.

⁹ Chun, Pharaoh chanu chun a kawmah, “Zie nausen hi pui inla, ei va dawnsak in, tichun na lawh ding hun pie’ng ka,” a ti a. Khutichun numei chun nausen chuh a la a, a dâwn ta a.

¹⁰ Chun, nausen chuh a hung khanglien a, Pharaoh chanu kawm achun a pui a, tichun a chapa’n a um ta a, “Tui apat a ka lâkdawk a hih ziekin, a min dingin Mosi sa’ng ka,” a ti a.

Midian Gama Mosi Taihmang na

¹¹ Chun, zielai chun hiti hi ahi a, Mosi a hung pitin phet chun, Hebrai mi a suohpihte veh dingin a pawtdawk a, pawngbawl a haksa taktak na a sep dân teu chuh a va mu ta a; Aigupta mi khatin a suohpite laka khat Hebrai mi a thah lai tak hih a vak mu a.

¹² Ziephet chun Mosi chuh a dâk viel a kuomah a um puou hi tih a het phet in Aigupta mi chuh a that a, lei ah a vui ta a.

¹³ Chun, a zing chun a va chieh kit a, Hebrai mi nih a na kisuol u a; chun a thiemlo zawpa kawm achun, “Bangati a na guolpa na zêp ahim?” a ti a.

¹⁴ Amah chun, “Ka chung u a lawiupa leh vaihawm a kuo a hun guot? Aigupta mi na thah guola khah ei thah guo na hi maw?” a ti a. Ziephet chun Mosi chun, “Ka thilhih hi mipi’n a het uh ahi ta hi,” a ti a, a lau mah mah ta a.

¹⁵ Tichun Pharao’n zie chuh a het phetin Mosi chuh thah a guo ta a. Himahlele Mosi chuh lengpa apat in a taimang a, Midian gam ah a um ta a, tuilaihdawk pang ahin a chu a.

¹⁶ Zielai chun Midian gama thiempu Jethro chun chanu sagih a nei a, amau chuh tuikhai dingin a hung u a, a pau belam hawnte dâwn dingin a gankuong hawu achun tui a sungdim u a.

¹⁷ Himahlele belamching mi khenkhat a hung u a, Jethro chanute chuh a hung nawhdawk u a, Ziephet chun Mosi chuh ahung dingdawka, amau haw chuh ahun panpih a, a belam hawnhawu chuh tui a dâwnsak ta a.

¹⁸ Chun, a pau Reuel kawm a tun kit phet un, “Bangti dana, tuni chun na hung vak nau e,” a na ti a.

¹⁹ Chun, amau chun, “Aigupta mi khatin belam chingte apat in ei hukdawk a, zie mai chu le hilo in, tui ei thal sak a, belam hawn haw chuh tui a dâwnsak ahi,” a tiu a.

²⁰ Ziephet chun, a chanute kawm achun, “Amah chuh khawi ah a um hi? Bang dinga na hun taihsan mai uh ahi? An ne dingin va sam u,” a ti a.

²¹ Tichun, Mosi chun zie pa kawma um chuh lem a sa a; Jethro chun a chanu Zipporah chuh Mosi zi dingin a pie ta a,

²² Chun, chapa a hing a, Mosi chun, “Mi gama um ka hih ziekin a min dingin, ‘Gershom,’ sa’ng ka,” a ti a.

²³ Chun, hiti hi ahung hi a, kum khat vel nung chun Aigupta lengpa chuh a thi ta a, himahleh Israel chate chuh a nasep uh a haksat bêk ziekin a mau zing u a, panpihna ngên in a kiko u a, nasep a gim bêk ziek u a a tau git u chuh Pathien kawm a tung ta a.

²⁴ Khutichun, Pathien in a tau thawmteu chuh a na za ta a, Abraham te, Isak te, Jakob te kawma a thugawlh kha a hezing a.

²⁵ Tichun, Pathien in Israel chate chuh a entha zing a, amau haw chuh a ngaihsak mah mah ta a.