PAWTDAWKNA 18 - PATHIEN LEKHABU THIENGTHO (BSI)

Jethro’n Mosi a Lemguotpihna

¹ Chun, Midian gama thiempu, Mosi puzawnpa Jethro chun Pathien in Mosi leh Israel te mipite thil a hih sak zie chengcheng leh, Lalpa’n Israel te chuh Aigupta gam apat a a puihdawk ziehaw chuh a na he a.

² Chun, Mosi puzawn Jethro chun Mosi zi Zipporah, Mosi’n a nutsieh kha, a chapate nih tawh a pui a;

³ khat min chuh Gershom ahi a, “Mi gama um ka hih ziekin,” a ti a;

⁴ a khatzaw min chuh Eleazar ahi; “Ka pa Pathien chuh ei panpihpa ahi a, Aigupta lengpa chemzâm apat a ei hukbit tâk ziekin,” a ti a.

⁵ Chun, Mosi puzawnpa Jethro chuh Mosi chapate leh a zi pui in thaleka Mosi giehna Pathien tâng achun a kawmah a va chieh u a:

⁶ amah chun Mosi kawmah, “Kei, na puzawn Jethro, na zi tawh, na chate nih tawh ka hung ui,” a ti a.

⁷ Chun, Mosi chuh a puzawnpa tuok dingin a va pawt a, chibai a va bûk a; a châwp a, chanchin haw a kidawng u a; tichun puon-In ah a lut tau a.

⁸ Lalpa’n Israel te hukdawkna ding a Pharaoh leh Aigupta te chunga a hih zie chengcheng leh, lamkal a gimtheih a thawk zieu chengcheng leh, Lalpa’n amau haw a hûkbit zie haw chuh Mosi’n a puzawnpa a hilh a.

⁹ Lalpa’n Israel te chuh Aigupta te lak apat a hukdawk a, amau haw thil a na hihsak zie leh, a chung u a a phatna haw chengcheng ziek chun Jethro chuh a kipâk mah mah mai a.

¹⁰ Chun, Jethro chun, “Aigupta te khut leh lengpa khuta pata hun hukdawkpa Lalpa chuh pahchak in um hen; amah chun Aigupta te thunuoi a um mipi haw chuh a hukdawk ahi ta hi.

¹¹ Tuhin chuh Lalpa chuh pathien chengcheng sangin a lopi zawi tih ka he tai; Aigupta te’n simmawh taka a bawlna tâk u ah Amah chuh a chung u a um ahi,” a ti a.

¹² Chun, Mosi puzawn Jethro chun hâlmang thilpiek leh Pathien dinga kithawihna ding a va la a; Aron leh Israel upate chengcheng chuh Mosi puzawnpa kawm achun Pathien hona chângthâk thiengtho ne dingin a chieh u a.

Vaihawm Ding Mi Guotna

¹³ Chun, a zing chun Mosi chuh mipite vaihawm dingin a chu a: chun mipi haw chuh zingkal a kipat nitâk chanin Mosi kawm vel achun a ding zing u a.

¹⁴ Chun, Mosi puzawn Jethro chun, khutia mipite a dinga Mosi thil hihdan haw cheng chuh a muhin, “Mipite na nasep sak dân hi bangti ahi ta? Bangati a nang mai hi chu zing a, zingkal akipat nitâk chan a mipi chengcheng hi na masanga a ding zing ahiu hi?” a ti a.

¹⁵ Chun, Mosi’n a puzawnpa kawm achun, “Mipi haw hi Pathien dawng dinga ka kawma hung ahi pên ui.

¹⁶ Thubuoi bang ahim a neih u chun ka kawm ahin a hung sek u a; tichun ken aban banin a thuu chuh ka na tan sak sek a, chun, Pathien lemguot leh a dante chuh ka na hetsak sek ahi,” a ti a.

¹⁷ Ziephet chun Mosi puzawnpa chun a kawmah, “Na thilhih dân chuh a pha puoi.

¹⁸ Nang leh zie na kawma mipi um haw hi chawl taluo ding na hiu hi: zie na hih nang dingin a giksak ta luoi; nang mai a hih zawh ding ei puoi.

¹⁹ Tuhin, ka thugen hi ngaiin, ken hun lemguotpih ing ka, na kawmah Pathien um hen: nang hi Pathien lam ah mipi thasang in um inla, a thu buoite chuh Pathien kawmah tun in;

²⁰ chun, thuguot leh danhaw chuh sinsak inla, a umdan ding u leh a hihdan ding u chuh na kâwkmuh zel ding ahi.

²¹ Zie mai chuh hilo in, mipi laka mi mattâk deuh deuh Pathien kihcha mi haw, mi thudik haw, lawkna diklo deihlo mihaw teldawk inla: khutibang mihaw chuh sangkhat chunga lawiupa ding, sawmnga chunga lawiupa ding, sawm chunga lawiupa ding guot in.

²² Amau chun bangtik lai inle mite vaihawm sak u hen; chun, hiti hi hung hi’n tin, thu lien deuh phawt chuh na kawmah hun tun sek untin, thu neu them haw vang chuh amau leh amau kivaihawm u hen; khutichun nang dingin baihlam zaw’n tin, chun amau chun hun dâwnzâng ding ahiu hi.

²³ Khutibanga chuh na hih a, Pathien inle thu a hun piek chun, nangin le thuok zo in na tin, chun, mipi haw hile lungmuong takin a umna mun chiet u ah chieh thei in au,” a ti a.

²⁴ Khutichun, Mosi chun a puzawnpa thugen chuh a zawp a, a gen haw chengcheng chuh ahih veka.

²⁵ Chun, Mosi chun Israel chate laka mi mattak deuh deuh a teldawk a, mipite chunga lawiupa’n a siem a, sangkhat chunga lawiupa ding, zakhat chunga lawiupa dingin, sawmnga chunga lawiupa ding leh sawm khat chunga lawiupa ding a guot ta a:

²⁶ Ziehaw chun bangtik lai inle mipite chuh vai a hawmsak sek u a; thu lien deuh phawt chuh Mosi kawmah a tut sek u a, thu neu them haw vang chuh amau leh amau a kivaihawm sek ui.

²⁷ Tichun Mosi chun a puzawnpa chuh a chiehsak ta a; chun, a umna gam lam achun a chieh kit ta a.