PAWTDAWKNA 17 - PATHIEN LEKHABU THIENGTHO (BSI)

Suongpi Apat a Tui

¹ Chun, Israel chate kikhawm khawm haw chengcheng chuh Lalpa thupiek bangin Sin thalek apat chun a pawt kit u a, aban bana kichawn zelin, Rephidim achun giehmun a siem u a: chun, zie tak achun mipite tui dâwn ding a um ta puoh a.

² Zieziekchun mipite chun Mosi a ngawh u a, a kiphin u a, “Tui dâwn ding ei pie’n,” a tiu a. Mosi chun a kawm u ah, “Bangati a nei kinakpih uh ahi? Bang zieka Lalpa na patep uh ahi?” a ti a.

³ Zie tak achun mipite dangchâk in a um u a; tichun mipite chuh Mosi chungah a phunchiek u a, “Bang zieka ka chateu leh ka ganchateu tawh dangchâk a thi dinga Aigupta gam apat nei puihdawk a?” a tiu a.

⁴ Chun, Mosi’n “Zie mipi haw hi bang ka lawh die? Suong a sehlup ei guo hiel tau hi,” ti’n Lalpa kawmah a paucham a.

⁵ Chun, Lalpa’n Mosi kawmah, “Mipite masang lam ah chieh inla, Israel upate khenkhat pui inla, na tiengkhut, tuma a lui na khetna khah chawi inla chieh in.

⁶ Ngaitie, Horeb a suongpi chung akhun na masangah ana ding ing ka ting; chun, suongpi chuh hun khên in na tin, tichun, mipite dâwn ding tui chuh hung luong dawk mai in a,” a ti a. Mosi’n Israel upate mitmuh chun khutibang chun a vak hih a.

⁷ Israel chate’n a phunchiek khum u a, I lak u ahin Lalpa chuh a um em, umlo, ti’n Lalpa chuh a patep ziekun zie mun min ding chun Massah leh Meribah a sa a.

Amalek te tawh Kidona

⁸ Chun, Rephidim mun achun Amalek te a hung u a, Israel te chuh a hun do tau a.

⁹ Khutichun Mosi’n Joshua kawmah, “I lak u a mi kiteldawk inla, Amalek te hi va do un; zing leh tângvum akhun Pathien mawlh chawiin hung ding ing ka,” a ti a.

¹⁰ Tichun, Mosi gen bang chun Joshua’n a hih a, Amalek te chuh a va do ta a; chun, Mosi leh Aron leh Hur chuh tâng chung ah a va kal u a.

¹¹ Chun, hiti hi ahi a, Mosi’n a khut a tun sung cheng chuh Israel te chun a zo sek u a; chun, a khut a lâkthak tieng leh Amalek te chun a zo sek u a.

¹² Himahlele Mosi bân haw chuh a hung kham ta a; tichun suong a lau a, a nuoi achun a kawih u a, zie chun a chu ta a; chun, Aron leh Hur chun a khut chuh a dawpsak tau a, khatin langkhat a dawm a, khatin langkhat a dawm a, khutichun, ni tum chanin a khuthaw chuh a um ngêi in a um ta a.

¹³ Khutichun Joshua chun Amalek te chuh a zo ta a.

¹⁴ Chun, Lalpa’n Mosi kawmah, “Zie thu hi hetzing dingin lehkhabu ah zik inla, Joshua het in gendawk sek in: vannuoi ahin Amalek te hi a um ui tih hetloh khawp in suchimit ing ka,” a ti a.

¹⁵ Chun, Mosi’n maichâm a siem a, a min dingin Jehovah-nissi a sa a.

¹⁶ “Lalpa a kipautiem tai; Lalpa’n suon umsung chengcheng chuh Amalek te chuh do in a,” a ti a.