PAWTDAWKNA 15 - PATHIEN LEKHABU THIENGTHO (BSI)

Mosi La

¹ Khutichun, Mosi leh Israel chate chun Lalpa pakcha’n zie la hi a sau a: “Lalpa pakcha’n la sa’ng ka, nasa takin a zo ta ngâl a. Sakawl leh a chungchuong chuh tuipi ah a paih tha ta a.

² Lalpa chuh ka hatna leh la ahi, Amah chuh ka hukdamna le a hung hii; Ka Pathien ahi a, amah chuh pakcha’ng ka. Amah chuh chawisâng ing ka.

³ Lalpa chuh galdo hât ahi; Amin chuh Lalpa ahi.

⁴ “Pharaoh kangtalai leh a sepaihte chu tuipi ah a paih tha ta a, chun, a sepaih lawiupa telchuom haw le Tuipi San ah a tummang zo tau hi;

⁵ Tui thuk takin achup zo ta a, Suong guolin tui thuk tak ah a tummang tau hi.

⁶ “Na khut changlam chuh, aw Lalpa, thilhih theihna’n a lopi a, Na khut changlam chun, aw Lalpa, melma chuh a sunel vek ta a.

⁷ Na lopina nasa tak chun nang hun dote haw chuh na sumang vek a; Na lungnatna na hun sawltha a, buhpawl bangin a ka mang vek tau a.

⁸ Na naka hu’n tui haw chuh a hung kiting a, Tui haw chuh bangkhat kawih kawm bang mai in a ding viehvuoh a. Tuipi sunglam tak a tui haw chuh a hung khal zo ta a.

⁹ Melma chun, ‘Delh ing ka ting, delhpha ngêi ing ka, gâllâk sum chuh hawm ing ka; Amau haw achun ka utchakna pên chuh sukpitit hi’n tin, Ka chemzâm zuk dawk ing ka ting; ka khut in amau haw chuh sumangthai ing ka,’ a ti a.

¹⁰ Na huih chuh na nun sak a, amau chuh tuipi’n a chup mang vek ta a; Tui thuk tak haw achun thik bangin a tummang u a.

¹¹ “Aw Lalpa, pathien haw lak ahin nang bang hi kuo a um? Thienthona lama lopi leh, Pahchak tâk hihna lama zahum leh, thilmakte hih sek, Nang tawbang kuo a um?

¹² Nangin na khut changlam na vak zak a, Lei in amau haw chuh a valh zo ta a.

¹³ Nangin na lungsietna’n mipi na tel haw kha na pui a; Na chênna thiengtho achun na hatna’n na pui ta a.

¹⁴ Mipite’n a hêu a, a kilîng u a, Philistia gama chêng haw chuh lungkhamna’n a man ta a.

¹⁵ Tichun Edom gama lawiupa haw chun mak a sa mah mah u a, Moab mihat haw chuh lînglauhna’n a hun man ta a; Kanaan gama um chengcheng chuh a tui zo tau a.

¹⁶ Tizatna leh lauhna’n a buokkhum a, Na khut hatna’n suong bangin a suthip kêi a; Aw Lalpa, na mite a galkaih masieh u chun.

¹⁷ Nangin amau haw chuh puilut in na tin, na goluoh tâng achun phut inla, Aw Lalpa, nangin na umna dinga mun na siem achun, Aw Lalpa, mun thiengtho na khut ngêi a na dindawkna achun.

¹⁸ Lalpa chun kumkhuosawt in vaihawm ta’n a,” ti’n.

¹⁹ Pharaoh sakawlte leh a kangtalai teu chuh a chunga chuong mite chu tawh tuipi a lut lai u chun Lalpa’n a chung u ah tuipi tui haw chuh a luon mat sak kit ta a; Israel chate chu vang tuipi sung a lei hul achun a chieh kai vek u a.

Miriam La

²⁰ Thiemgau Miriam, Aron suohpihnu chun khuongneu a chawi a; chun numei chengcheng inle khuongneu chawi a, lâm in a zui dawk u a.

²¹ Chun, Miriam chun, “Lalpa pakcha’n la sau in, nasatak in a zo tai; Sakawl leh a chung chuong tuipi ah a paih tha tai,” ti’n la a sa a.

Marah Muna Tui kha

²² Tichun Mosi’n, Israel te chu Tuipi San apat in a puidawk a, Shur thalek lam zuonin a chieh tau a; chun, thalek achun ni thum zet a chieh u a, tui a mu zo ta puou a.

²³ Tichun, Marah mun a va tung u a, Marah muna tui haw chu a na khât ziekin a dâwn thei ta puou a; zieziekchun a min dingin Marah a sa tau hi.

²⁴ Tichun mipite chun, “Bang ahim ka dâwn ding uh?” ti’n Mosi chungah a phunchiek tau a.

²⁵ Mosi chuh Lalpa kawmah a paucham a; chun, Lalpa chun thing khat hi a vak kâwkmuh a, zie chuh tui achun a vak khawh lut a, tichun tui chuh a hung lim ta a. Zie tak achun dân leh thupiek a siem sak a; zie tak achun amau haw chuh a patep a.

²⁶ “Lalpa na Pathien u aw hi guntaka na ngaihthak u a, a mitmuha pha a sak dante na hih u a, a thupiekte na ngaihsan u a, a thuguot chengcheng na zawp u chun, Aigupta mite chunga hipi ka len sak haw bang khah nang haw chung ahin lênsak hiel puo’ng ka: kei Jehovah Rafa ka hi ngâla,” a ti a.

²⁷ Chun, Elim mun a va tung u a, zie tak achun tuinak sawmlenih leh tum thing sawm sagih a um a; chun, zie lui pang haw achun a giek tau hi.