PAWTDAWKNA 13 - PATHIEN LEKHABU THIENGTHO (BSI)Cha Lutîl Pathien a 1 Chun, Lalpa’n Mosi a hopih a, 2 “Israel chate laka cha lutîl cheng, sûl hawng masa taphawt, mihing leh gancha le kei dinga na kawih thiengtho ding uh ahi, kei a ahiu hi,” ti’n a gen a. Chângthâk Chawl Sawhloh Kut 3 Chun, Mosi’n mipite kawm achun, “Aigupta te suok apat a na pawt niu tuni hi hezing un; zie ni hin Lalpa’n a thilhih theihna’n nang uh a hun puidawk a: chângthâk chawl kisawh himhim chuh na nek loh dinguh ahi. 4 Abib tha, a tha khatna, tuni hin Aigupta gam apat na hung pawt u a. 5 Lalpa’n Kanaan te, Hit te, Amor te, Hiv te, Jebus te gam, khuoizu leh bâwngnawi a luonna gam, nang uh hun suonte kipautiema piek a tiemna gam achun a hun puihtung tieng leh, kum chengin zie tha hih na nit zel ding uh ahi. 6 Ni sagih sung chuh chângthâk chawl sawhloh na nek ding uh ahi a, a ni sagih ni chuh Lalpa dinga Kut ni hi’n a. 7 Ni sagih sung chun chângthâk chawl sawhloh neu in na tin; na lak u ah chângthâk chawl sawh mawngmawng chuh a umloh ding ahi. 8 Zie ni chuleh na chateu kawmah, ‘Aigupta gam apat a ka hung pawt lai u khan Lalpa’n thil ei na hihsak zieka kihih ahi,’ ti a na hilh dinguh ahi. 9 Lalpa Dan chuh na kam u a a um zing theihna ding in, na khut u a melchikna leh, na mit u kikala hetzingna guola na neih ding uh ahi, khut hattak a Lalpa’n Aigupta gama pata a thilhih theihna a a hun puihdawk na hiu hi. 10 Khutichun zie kut hi kum chengin a hun taka chuh na hun mat zing ding uh ahi. Cha Pieng Masapente 11 “Lalpa’n na kawm u leh nang uh hun suonte kawma kipautiema piek a tiemsa bang khan, Kanaan te gam a hun puihtung a, a hun piek tieng chuleh, 12 cha sûlhawng masapen leh na ganchau suok masapen chuh Lalpa dinga na kawihchuom zel ding uh ahi; a chal haw chuh Lalpa a ding hi’n au. 13 Sabiltung no suok masapen taphawt chuh belamno a na tat ding uh ahi. Na tat nawp loh u le chuh a ngâwng na sukbawt ding uh ahi. Na chateu laka pasal pieng masapen taphawt chuh na tat ding uh ahi. 14 Chun, hiti hi hung hi’n tin hun hungtung dinga na chapateu in, ‘Ziehi bangti dân ahi?’ ti a a hun dawt tak u leh, nang un a kawm u ah, ‘Khut hattak in Lalpa’n Aigupta gama suok a ka um u khah ei puihdawk ahi: 15 chun, hiti hi ahi a, Aigupta leng Pharaoh khah a lung khauh bêk ziekin, Lalpa’n Aigupta gama cha lutîl chengcheng, mihing cha upapen taphawt leh gancha suok masapen taphawt chun Lalpa kawmah ka kithawi u a; himahleh ka chapateu lak a cha lutîl chengcheng chuh ka tat uh ahi,’ tiu in. 16 Chun, zie hi na khut u a nang uh dingin melchikna leh na mit uh kikala chal kânna hi’n tin; khut hattak in Lalpa’n Aigupta gam apat in ei puidawk ta ngâl a,” a ti a. Meikuong leh Meipi 17 Chun, Pharao’n mipi haw chuh a pawtdawk sak phet chun, Pathien in Philistia te gama a naih zawk na ah a pui puoh a. Pathien in, “Kidonahaw mu leu kisik untin, Aigupta gam ah vaikit kha’n au,” a ti ngâl a. 18 Zieziekchun Pathien in mipi haw chuh Tuipi San lam zuonin, gamgaw lam ah a pui kawi zaw ta a. 19 Chun, Mosi’n Joseph guhhaw chuh a sawm a: Israel chate kha, “Pathien in hung tawhtha ngêi ngêi intin, zie tieng chuleh, ka guhhaw hi zie apat a hi na zawn toh ding uh ahi,” ti’n a kihâksiel sak ta ngâl a. 20 Chun, Sukkoth apat chun a pawt u a, gamgaw chin tak Etham mun ah a giek u a; 21 Chun, Lalpa’n sun leh meipi’n a mau a pui a; chun, zan leh a mau haw salhvak dingin meikuong in a pui a; sun leh zan a a chieh zel theihna ding un. 22 Tichun, suna meipi leh zan a meikuong chun mipite chuh a nusieh ngei puoi. |
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
Bible Society of India