PAWTDAWKNA 12 - PATHIEN LEKHABU THIENGTHO (BSI)

Chiehkân Kut

¹ Chun, Lalpa’n Mosi leh Aron chuh Aigupta gam achun a hopih a:

² “Tu tha hi nang uh dingin kum khat sunga tha sim patna hi’n a.

³ Israel kikhawm khawm chengcheng te kawm ahin, tu tha ni sawmna tak ahin mitin in a inkuon uh a dingin belamno khat la chiet u henla,

⁴ chun, a inkuon u chuh belamno ne zo kham hilo khawp a tawm taluo a hih u chun, a invengte tawh a inkuon uh mihing tawm dân bang zelin belamno khat kikawp u henla; mi tin nek kham ding bang zelin belamno chuh na guonggalh ding uh ahi.

⁵ Chun, na belamno u chuh demna bei, a chal, kum khata upa a hih ding ahi a; belam lak apat ahim kel lak apat ahim a na lak dinguh ahi.

⁶ Zie tha ni sawmleli tienga chuh na kawih ding ahi a; chun Israel mipi kikhawm khawm chengcheng chun mielzul a a thah ding uh ahi.

⁷ Chun, mipite’n a thisan chuh lau intin, a nekna ding uh In kawtbieng tuok leh kawt chunga chuh a tat ding uh ahi.

⁸ Chun, belam no sa chuh zie zan ngêi achu a nek dinguh ahi a; em min un tin, chângthâk chawl sawhloh tawh hampa kha tawh a meh dinguh ahi.

⁹ A siel in ne kiu hen la, tui inle huon kiu hen, himahleh, a em in em min thawh u hen, a luchang leh a keng pum in, a sung tawh.

¹⁰ Chun, a zing a ding chun bangmah na kawih ding uh ahi puoh a; nek mâwk um chuh mei a na hâlmang ding uh ahi.

¹¹ Chun, na nek dân ding u chuh hiti hi hi’n a, na kâwng uh gâk sa’n, na keng u a kengtawbek butsa’n, na khut u a na tiengkhut uh chawikawm in; chun, kintaka na nek ding uh ahi; Lalpa chiehkân ankuong hi ding ahi ngâl a.”

¹² “Zie zan chuleh Aigupta gamsung chuh hun hawhpai ding ka hi ngâl a, Aigupta gam a cha lutîl chengcheng, mihing leh sa chuh that ing ka ting; Aigupta gama pathien chengcheng te chung achun le vaihawmna chuh hun tunsak ing ka ting: kei Lalpa chuh ka hi hi,

¹³ Chun, thisan chuh nang uh dingin na umna In uh melchikna hi’n tin; thisan chuh ka muh tieng leh hun chiehkân ing ka, tichun, Aigupta gam ka gawt tieng chuleh hipi chun nang haw hun sukha puona.

¹⁴ Chun, zie ni hi nang uh dingin hetzing na ni hi’n tin, Lalpa dinga guolvakna ni a na mat dinguh ahi; na suonteu chanin kumkhuo thuguot ding a um zing dinga guolvakna ni a na mat dinguh ahi,” a ti a.

Chângthâk Chawl Sawhloh Kut

¹⁵ Chun, “Ni sagih sung chuh chângthâk chawl sawhloh na nek ding uh ahi a: ni khat ni apat chun na insung u apat chawl chuh na thielngim suok dinguh ahi: kuole ni khat ni apat a ni sagih ni chana chângthâk chawl sawh ne taphawt chuh, zie mite chuh Israel te lak apat a satthak hi’nau.

¹⁶ A ni khat ni chun kikhawpna thiengtho nei un na tin, chun, a ni sagih ni chun kikhawpna thiengtho um kit in a; zie nihaw chun na himhim na sep ding uh ahi puoi; mitin in nek ding guonggalh tih loh chuh zie sung chun na himhim na sep loh dinguh ahi a, na nek ding u chuh nanguh kisiem ngêi hiding ahi.

¹⁷ Chun, chângthâk chawl sawhloh guolvak ni chuh na nit ding uh ahi, zie ni ngêi chun Aigupta gam apat in mipi haw chuh ka puidawk ngâla; zieziekchun na suonteu chan a kumkhuo thugawlh a um zing dingin zie ni chuh na nit ding uh ahi.

¹⁸ A tha khatna, ni sawm leh li ni, nitâk lam chun, ni sawmnih leh khat nitâk tieng chun chângthâk chawl sawhloh na nek dinguh ahi.

¹⁹ Ni sagih sung chuh na insung u ah chawl himhim a um loh ding ahi:

²⁰ kuole chawl sawh ne taphawt chuh, zie ngêi chuh nam dang le, na gam u a pieng hilele Israel chate lak apat sukmangthai ding ahi,” ti’n.

Chiehkân Kut Masapen

²¹ Chun, Mosi’n Israel upate chengcheng chuh a samkhawm a, a kawm u ah, “Inkuon chengin belamno ahim, kelno ahim va lau in la, Chiehkân Kut lawpna dingin that un.

²² Chun, husop bawk lau in na tin, chun, kuong a thisan achun dieh un na tin, kawtkhak chung leh kawt bieng tuok achun kuong a thisan chuh tât un na tin chun; khawvak masangsieh chuh kuomah a In a pata a pawt loh ding uh ahi.

²³ Lalpa chun Aigupta mite that dingin hun hawhpai ding ahi ngâl a; tichun kawtkhak chung leh kawtbieng tuoka thisan bek a muh tieng leh Lalpa chun kawt chuh chiehkân intin, thihna vânsâwlchâk chuh nang haw hun sulum dingin insung achun hun lut sak puo’n a.

²⁴ Nang haw leh na chateu in zie dân hi kumkhuo a na zuih ding uh ahi.

²⁵ Chun, hiti hi hi’n tin, Lalpa’n hun piek dinga a tiemna gama chuh na lut tieng u leh zie thupiek hi na zuih zing ding uh ahi.

²⁶ Chun, Na chateu in, ‘Zie kithawihna umzie chuh bang ahim?’ ti a a hun dawt tieng u leh,

²⁷ ‘Zie hi Lalpa chiehkân kithawihna ahi, amah chun Aigupta mite a suklup lai khan ka In teu chuh a chiehkan a, Aigupta gama Israel chate In chuh a chiehkân ahi, na hun tih ding uh ahi,’” a ti a. Israel mite chun a luu khun in a ho tau a.

²⁸ Tichun, Israel chate chuh a chieh u a, Lalpa’n Mosi leh Aron thu a piek bang chun a hih tau hi.

Cha lutîl Thihna

²⁹ Chun, hiti hi ahi a, zankhang lai chun Lalpa chun Aigupta gama cha lutîl chengcheng, lalchutphah a chu Pharaoh cha lutîl apat in suongkul ngakte cha lutîl gei in, gancha suok masapen tiengin a sulum vek ta a.

³⁰ Zie zan chun Pharaoh leh a milien chengcheng leh Aigupta mi chengcheng chuh a tho tau a; Aigupta gam achun kahna huoisie tak a um ta a, mithi umlohna In himhim khat chale a um puoh ngâla.

³¹ Chun, zie zan mah mah chun Pharaoh chun Mosi leh Aron chuh a sap sak a, “Kipan unla, ka mite lak apat hin pawt un, nang u leh Israel chate haw hi tawh; chieh unla, na gen bang u khan Lalpa chuh va ho tau in.

³² Na gen bang u khan na belam hawu leh na sabiltung hawu chu le pui unla, chieh unla, chun, keile ei paucham sak un,” a ti a.

³³ Chun, Aigupta mite chun, “Nei pawtsan loh u chun thi suok ding ka hiu hi,” ti’n mipite chuh a gam uh kintaka pawtsan dingin a nawh tau a.

³⁴ Khutichun mipite chun chângthâk chawl sawhloh chuh a kuong u achun a kawih u a, puon in a chûn u a, a liengko un a puu a.

³⁵ Chun, Israel suonte chun Mosi thu bang chun a hih u a: Aigupta mite kawm achun dangkathîk kicheina leh sana kicheina leh silhlechen a ngên u a:

³⁶ Chun, Lalpa’n mite chuh Aigupta mite a lungsiet sak a, khutichun a nget takphawt u chuh a pie zel u a. Khutichun Aigupta mite hauhsakna haw chuh a paw tau a.

Israel te Aigupta apat a Pawtnau

³⁷ Khutichun, Israel chate chuh Rameses apat keng in a kipan dawk u a, Sukkoth a zuon tau a, naupang simloh in, pasal piting chiet nuoigup hiel ahiu hi.

³⁸ Chun, mipi kichawkhel tamtak inle amau chuh a zui u a; chun, ganhawn tamtak, belam leh bâwng haw tamtak le a sawm u a.

³⁹ Aigupta gam apat a chângthâk chawl sawhloh a puok hawu chun chângthâk a siem u a, Aigupta gam apat a kintaka delhdawka a um ziek u leh a um sawt theih takloh ziekun nek ding nasan le a guonggalh man ta puou hi.

⁴⁰ Chun, Israel chate Aigupta gama a um sung u chuh kum zali leh kum sawmthum ahi.

⁴¹ Chun, hiti hi ahi a, kum zali leh kum sawmthum a hung beih phetin Lalpa mipite chengcheng chuh Aigupta gam apat chun a pawt tau a.

⁴² Zie zan chuh Lalpa’n Aigupta gam apat a amau haw a puihdawk zan ahi a, a nit thiengtho dinguh ahi a; Israel chate chun akhang akhang a zah taka a nit toh zing dinguh ahi.

Chiehkân Kut Mat Dân Ding

⁴³ Chun, Lalpa’n Mosi leh Aron kawmah, “Ziehi Chiehkân Kut thupiek na mat dân ding chuh ahi: gamdang mi chun a nêk loh dinguh ahi:

⁴⁴ Himahlele, mi’n a suok dangka a a châwksa haw vang chuh, a zek na tan sak phawt u chun ne thei in au.

⁴⁵ Nam dang leh nasema na gawihteu chun vang a nek loh dinguh ahi.

⁴⁶ Insung a nek ding ahi; pawlam ah a sa himhim chawihdawk loh ding ahi a; a guh le na sukbawt loh hiel ding uh ahi.

⁴⁷ Israel mi chengcheng in a lawp dinguh ahi a.

⁴⁸ Chun, nam dang na kawm u a um in Lalpa chiehkân hi hih a nawp chun, a pasalteu chengcheng zek a tan masak ding uh ahi; zie chuh hih dingin amah chuh hung nai intin, amah chuh zie gam ahi pieng guola ngaih hi’n a; himahlele zek tan loh mi chun a nêk loh hiel ding ahi.

⁴⁹ Chun, zie gam a pieng den leh na kawm u a nam dang umte dingin dân kibang a um ding ahi,” a ti a.

⁵⁰ Chun, Israel chate chengcheng chun khutibang chun a hih u a, Lalpa’n Mosi leh Aron thu a piek bang ngêi chun a hih tau a.

⁵¹ Chun, zie ni ngêi chun Lalpa’n Israel suonte, a mipi haw chuh Aigupta gam apat chun a hawn hawn in a puidawk ta a.