PAWTDAWKNA 10 - PATHIEN LEKHABU THIENGTHO (BSI)

Gawtna Gietna: Khaupe a Gawtna

¹ Chun, Lalpa’n Mosi kawmah, “Chieh inla, Pharaoh va kimuhpih in. A lunggil leh a suokte lunggil chuh ka sukkhauh sak ta a, zie ka thilmak hih haw hi a kawm u a ka etsak theihna dingin;

² Chun, Aigupta te chunga ka thilhih dân haw leh a lak u a ka thilmak hihhaw hi na chapateu leh na chapate chate zaka na gen ding ahi; kei hi Lalpa chuh ka hi tih na hettheih na dingun,” a ti a.

³ Khutichun, Mosi leh Aron chuh Pharaoh kawm achun a valut u a, a kawmah, “Lalpa, Hebraite Pathien in, ‘Ka masang ah bang chan ahim kingainiem nuom lo a um na guot? Ka mite hin kei ei ho theihna dingun pawtsak in.

⁴ Khutia, ka mite na pawtsak nawp loh chun, zing leh na gamsung ahin khaupe hun lênsak ing ka ting:

⁵ tichun, lei chung hi hun dâp suok in au. Kuoma’n lei himhim hi mu thei ta puo’n au, tichun, giel in a suksiet mâwk, na gama um haw chuh neu intin, gamlaka na thing kekhaw cheng chuh ne zo in au.

⁶ Chun, na In leh, na suokte In haw cheng leh, Aigupta mite In cheng achun dim suok untin; na suonte leh, na suonte suonteu inle lei kisiem apat tutieng ale khutibang chuh ana muh khâk nai loh u chuh,’ hung tung ina a tii,” a tiu a. Chun, a kihei a Pharaoh kawm apat chuh a pawt ta a.

⁷ Chun, Pharaoh miliente chun a kawmah, “Zie pa hin bang chan ahim ei sukbuoi zing ding? Ziete hin Lalpa a Pathien uh a ho theihna dingun chiehsak mai ta’n la. Aigupta gam hi suksiet ahi tai tih helo na him?” a tiu a.

⁸ Tichun, Mosi leh Aron chuh Pharaoh kawmah a puilut kit u a, a kawm u ah, “Chieh unla, Lalpa na Pathien u chuh va ho tau in; amahvang chuh, kuote ahim a chieh ding chuh?” a tiu a.

⁹ Mosi chun, “A têk a khang in chieh ding ka hiu hi, ka chapateu, ka chanuteu tawh; ka belam guolteu leh ka bâwng guolteu tawh, chieh ing kau; Lalpa kawma Kut ka neih tei dinguh ahi ngâl a,” a ti a.

¹⁰ Chun, amah chun a kawm u ah, “Lalpa chuh na kawm u ah um hen, na cha neucha chateu tawh ka hun chiehsak hiel lele, cham taka gen in kiphinna bawl guo na hiu hi tih a kichien tai.

¹¹ Himaizen lo e! Pasal haw mai chuh chieh thei inlau, Lalpa chuh va ho un, zie chuh ahi na nawp uh,” a ti a. Zie thu chu tawh, Mosi leh Aron chuh Pharaoh kawm apat chun a nawhdawk tau a.

¹² Chun, Lalpa’n Mosi kawmah, “Aigupta gamsung a hi khaupe lênsak dingin na khut zak in, tichun hung untin, zie gama thaichi tincheng, giel seh siet mâwk chengcheng hi ne zo vek in au,” a ti a.

¹³ Khutichun, Mosi chun Aigupta gam chung achun a tiengkhut chuh a vak tung a, chun, Lalpa’n zie ni chun, nichang tum leh zankhuo vakin zie gam achun suohlam huih a hun nun sak a; a zingkal chun, suohlam huih chun khaupehaw chuh a hun tawk ta a.

¹⁴ Khaupehaw chuh Aigupta gamsung chengcheng achun a chuu a; a tam mah mah mai u a, tumasang inle khaupe zie tawbang lâwm lâwma tam chuh a na um kha puoh a, tunung lele zie tawbang chuh um kit ta puo’n a.

¹⁵ Lei chung chengcheng chuh a dâp suok a, tichun gam chuh a thim mepmup mai ta a; giel seh siet mâwk, zie gama thaichi tincheng leh, thai gah chengcheng chuh a ne zo u a; tichun, Aigupta gamsung cheng achun lo a thilhing himhim, thing leh thaichi haw chuh a bei vek ta a.

¹⁶ Ziephet chun, Pharaoh chun Mosi leh Aron chuh kin takin a sap sak a, a kawm u ah, “Lalpa na Pathien u chung leh, nang uh haw chungah thil ka na hihkhiel tai.

¹⁷ Khutichun, ka gitlohna hi tuchung mai hin ei ngaidam un, ka hun nget na hiu hi, zie thihna hi ei lâkmang sak dingin Lalpa na Pathien u kawm achun ngên un,” a ti a.

¹⁸ Chun, Pharaoh kawm apat chun a chiehdawk a, Lalpa kawmah a paucham ta a.

¹⁹ Chun, Lalpa’n tumlam huih hattak mai a hun nun saka, zie chun khaupe haw chuh a tawk a, Tuipi San ah a mût lut vek ta a. Tichun, Aigupta gam achun khaupe khat chale a um ta puoh a.

²⁰ Himahlele, Lalpa’n Pharaoh lunggil chuh a hihkhauh sak a, tichun, Israel chate chuh a pawtdawk sak nuom ta puoh a.

Gawtna kuo na: Thimna a Gawtna

²¹ Chun, Lalpa’n Mosi kawmah, “Van lam ah na khut vak tungin, ti a chuh thim nasatak mai a hung um a, Aigupta gam hi a hun khuh theihna dingin,” a ti a.

²² Tichun, Mosi’n a khut chuh van lam ah a vak tunga; tichun, Aigupta gamsung chengcheng chuh ni thum sung hiel a thim bek buk zieng a,

²³ Aigupta mite chuh kuomah a kimutuoh thei ta puou a, kuomah a In u apat, ni thum sung chuh pawtdawk thei a um ta puou hi. Israel chate umna cheng chu vang a vak vek hi.

²⁴ Ziephet chun, Pharao’n Mosi chuh a sap saka, a kawmah, “Chieh tau inla, Lalpa chuh va ho tau in; na belam guolhawu leh na bâwng guolhawu vang chuh um u hen la: na zi leh chateu le na kawm u ah hung u hen,” a ti a.

²⁵ Mosi’n a dâwng a, “Lalpa ka Pathien uh kawma ka kithawihna dingun, kithawihna ding leh, hâlmang thilpiek ding haw chuh nangin keihaw nei piek ding ahi.

²⁶ Ka ganchateu ka puih ngêi ngêi dinguh ahi a, khat chale nusieh thei puo’ng kau. Keimau ngêi in, Lalpa ka Pathien uh ka hona ding uh gancha chuh ka kitel ding uh ahi. A mun ka tun mau chun, bang tawbang hi mat ding ahim tih ka he puoh ngâl u a,” a ti a.

²⁷ Himahlele, Lalpa’n Pharaoh lunggil chuh a sukkhauh sak a, tichun, a pawt sak phal ta puoh a.

²⁸ Chun Pharao’n Mosi kawmah, “Ka kawm apat hin pawt mang kêi inla, ka mel himhim hung mu ta hiel ki’n; ka mel na muh ni ni leh thi tei ding na hi,” a ti a.

²⁹ Chun, Mosi chun, “Na gen dik ngut hi; na mel mu kit ta puo’ng ka,” a ti a.