NEHEMIA 9 - PATHIEN LEKHABU THIENGTHO (BSI)

Israel chate Gitloh Kiphuonna

¹ Khutichun, zie tha mah, ni sawmnih leh ni li ni chun Israel chate chun an a ngawl u a, kawlladip silh in a luzâng u a leivui kibuok in a kikhawm u a.

² Khutichun, Israel chate chuh nam dang mite apat chun a kikawih chuom u a. Amau mun chiet achun a ding u a, a pileputeu leh amau haw gitloh na a phuong u a.

³ A umna mun u achun a ding u a, ni khat mun li a khena mun khat sung Lalpa Pathien dân lehkhabu chuh a sim u a; mun li a khena mun khat dang chuh gitloh thupha chawihna’n a mang u a; Lalpa a Pathien uh a ho ui.

Levi chite Thupha chawihna

⁴ Khutichun, Levi te, Jeshua, Bani, Kadmiel, Shebania, Bunni, Sherebia, Bani, Kennai te chuh dawhkhâng chunga dingin ngeih tak in Lalpa a sam u a.

⁵ Khutichun, Levi chi Jeshua leh Kadmiel te, Bani leh Hashabania te, Sherebia leh Hodija, Shebania leh Pethaia te chun: “Ding unla, Lalpa na Pathien u chuh kumsawt apat kumsawt chan in pakchau unla. Chun, limbawl na leh pahchak na chengcheng chungah na min lopi pahchak in um hen,” a tiu a.

Mipite Pauchamna

⁶ Israel mipite chuh hiti hin a paucham u a, “Nang mai hi Lalpa na hi a. Van haw khu nang siem ahi a, van sang pên tiengin, van a um chengcheng tawh, lei leh a chunga um chengcheng te tawh; tuisuohgiet leh a sunga um chengcheng te chuh nang siem ahiu. Hinna chengcheng hi nang piek ahi a; van a umte chun chibai a hun bûk ui.

⁷ Abram teldawk a Kaldai gama Ur khuo apat puidawk a, a min Abraham ahi ti a phuong Lalpa Pathien chuh na hi.

⁸ Chun, a lungthim chuh na masanga ginum in na he a; Kanaan gam te, Hit gam te, Amor gam te, Periz gam te, Jebus gamte, Girgash gam haw chuh pie dingin thu na tiem a. Chun, mi ginum tak na hih ziekin, na thutiem chuh na suguitung a.

⁹ “Aigupta gama ka pileputeu gimtheih zie chuh na mu zing a, Tuipi San panga a kiko thawm chuh na za a.

¹⁰ Tichun, Pharaoh leh a suokte leh a gama mi chengcheng te chungah melchikna leh thilmak haw na latsak a. Chapo taka a chung u a thil a hih teu chuh na he a, tichun, tuni tieng hin min in na nei ta a.

¹¹ Chun, a masang u ah Tuipi San na zêp khen a; tichun, tuisuohgiet sung achun leichak na hawh saka na puikai a. Tichun, amau delhzuite chuh tui thuk tak a suong paih lut bangin na paih lut a.

¹² Tichun, sun leh meipi’n na pui a, zan leh a chieh na dinguh lampi salhvak dingin meikuong in na pui sek a.

¹³ Tichun, Sinai tâng achun na hung kum suk a, van apat in a kawm u ah thu na gena, vaihawmna dikte, dân diktak leh thuguot leh thupiek hawihtak na pie a;

¹⁴ Chun, na chawlhni thiengtho chuh amau haw na hetsak a; thupiekte thuguot te leh dân te chuh na suok Mosi mang in na pie a.

¹⁵ “Chun, a gilkiel uh hih daihna dingin van apat in chângthâk na pie a; a dangchâk phatna dingun suongpi apat in tui na pie a; amau haw kawma piek na guot gam chuh luoh dingin na pie a.

¹⁶ Himahleh, amau leh ka pileputeu chun chapo takin thil bawl in a kisuluhlul u a, na thupiek chuh a zawp ta puou hi.

¹⁷ A zui nuom puou a, a chung u a na thilmak hih haw le a he nuom diek ta puou hi. A lunggil uh sukhauh in a kiphin u a; suok a a tânnau a vaikit dingin lawiupa a kisiem tau hi. Himahleh, nang chuh ngaidam dinga kisazo zing Pathien, mi lainat thei leh lungsiet na a dim, lungchuol tak leh nunnem na a dim, amau haw hengilh lo na hi.

¹⁸ Ahi, bâwngno lim a siem u a, ‘Zie hi ahi Aigupta gama pata ei puidawk pathien chuh,’ a tiu a. Lungnat um tak thil a bawl lai u khan,

¹⁹ Na zahngaihna thuk tak chun gamthip a khan amau haw chuh na thahtham diek puoh a, amau haw pui dingin sun leh meipi’n a taihsan puoh a, zan leh amau haw salhvak dingin meikuong chun le a taihsan diek puoi.

²⁰ Amau haw sinsak dingin na Thagau phatak chuh na pie a, amau chuh, manna’n na chawma; a dangchâk uh sukbeih na dingin tui na pie sek a.

²¹ Ahi, gamthip a khan kum sawmli na chawma, bangmah a tasam puou a, a silhlechen teu chuh a chul puoh a, a keng u le a vum diek puoi.

²² “Chun, gam leh namte na pie a, zie chuh a chanvo ding chiet uh na hawma khutichun, Sihon gam, Heshbon, lalgam leh Bashan lal Og gam chuh a luoh tau a.

²³ A suonteu chuh van a aksi zat in na supung a, a luoh ding uh gam a pileputeu kawma na tiem a chun na puilut ta a.

²⁴ Khutichun, a suonteu chun zie gam chuh a luoh tau a, tichun, zie gama cheng Kanaan mite chuh a masang u ah na suniem a, a nawp dân dân u a bawl dingin a leng teu leh zie gama mite chuh a khut u ah na pie a.

²⁵ Kulh nei khawpi leh gam phatak haw chuh a lau a, thilpha chitin a dim in a luoh u a, tuikhuk laihsate, grep huonte leh theikung tampi a nei u a. Tichun, a neu a, a vah u a, a hung thau tau a, na phatna chuh kiningting tak in a nawpchen u a.

²⁶ “Himahlele, thu awilo in na chungah a kiphin u a; na dân a nungngat u a, nang lam a hun puihkit guo thiemgaute chuh a that u a, lungnat um takin thil a hih u a.

²⁷ Zieziekchun, amau haw sugimthei dingin a melmateu khut ah na pie a; a lungkham lai u a a hun sap u khan van apat in na ngaitha a; tichun, na lainatna lien tak chun a melmateu laka hukdawk ding in mi na pie a.

²⁸ Himahlele, gâlmuong a a hung um nung un na mitmuh a thil phalote a hih kit zel u a; zieziekchun, a melmateu khut ah na pie a. Tichun, a chung u ah thu a nei u a, mahleh kisika a hun sap phet un van apat in na ngaitha a, tamtak vei na zahngaihna chun na puidawk a.

²⁹ Chun, na dân lama na puihkit theih na ding in na hilhgaih seka; himahleh, chapo takin thil a bawl u a, na thupiek chuh a zui puou a, na vaihawmna kalh in thil gilo ahih u a (mi’n a hih leh a chîn den ding chuh) a chapo u a, a kisuluhlul u a, a ngaitha nuom puou hi.

³⁰ Himahleh, kum tamtak amau haw na ngaitha a, na thagau in thiemgaute mang in na hilh seka; himahlele, a nakhang uh a sungawng u a, zieziekchun, a gama mite khut achun amau chuh na pie ta a.

³¹ Himahlele, na zahngaihna lien tak chun a tâwp na ding uh na tunsak puoh a, thah le na thahtham puoh a, Pathien mi lungsiet thei leh lainatna a dim na hih ziekin.

³² “Zieziekchun, ka Pathien uh lopi, bangkim hihthei leh lauh um, a thugawlh hezing leh zahngaihna a dim chun ka chung u leh ka leng teu leh ka milien teu, ka thiemputeu, ka thiemgau teu leh ka pileputeu leh, na mite chengcheng chunga Asuria lengte vaihawm lai apat a tuni tienga gimtheihna hung tung haw hi thil neu thêm in ngai ki’n.

³³ Abang hileh, ka chung u a thil hung tung chengcheng ahin nang chuh na dika, nangin diktak in na nasem a, keihaw’n vang dik lo takin thil ka hih sek ui.

³⁴ Ka lengteu leh ka milien teu, ka thiemputeu leh ka pileputeu inle na dân chuh a zui puou a. Na thupiek leh thu hetsak amau na hilhgaihna haw chule a ngaitha nuom puou hi.

³⁵ A chung u a na phat maizen tawh, a gam uh, gam lien tak leh gam hausa tak na piek gam a chun na na a sem puou a, a thil gilo bawl uh a haihsan diek puou hi.

³⁶ Ngaitie, tuhin chuh gam nei piek ahin suok in ka um mai tau a; a sunga thil gah leh thilpha ka pileputeu nek dinga na piek chule ne theilo in, zie chun suok in ka um zaw tau hi.

³⁷ Ka gitloh ziekun ka chung u a lal dinga na guot te chuh a hauhsak lawh u a, ka taksa chung u leh ka ganchateu chung tieng in a nawp dân dân un vai a hawm u a; ka lungzîng mah mah mai ui.”

Mipite Thutiem

³⁸ Chun, zie thu haw chengcheng ziek chun thugawlh dettak ka siem u a, ka zik thau a; ka milienteu leh Levi chite leh thiempute chun ei namdet pih u a, ti’n.