NEHEMIA 8 - PATHIEN LEKHABU THIENGTHO (BSI)

Ezra’n Dan a Simdawkna

¹ Chun, mipi chengcheng chuh thukhat kisa’n Tui kawtkhak zawna mun âwng lien tak achun a kikhawm u a; chun, lehkha zikpa Ezra chuh Lalpa’n Israel chate zuih dinga a piek Mosi Dan bu hun chawi dingin a hilh u a.

² Khutichun, tha sagihna, ni khat ni chun thiempu Ezra chun mipi kipunkhawm, nuting leh pating a hethiem thei ding tieng te masang achun Dan bu chuh a hun chawi a.

³ Chun, Tui kawtkhak zawna mun âwng lien tak achun zing khang apat in sun tiengin a sima. Tichun, mipi chengcheng chun Dan thu chuh phatak in a ngaithau a.

⁴ Chun, khutibang hun haw a mat ding a kisiem, thing dawhkhâng chung achun Ezra chuh a dinga, a changlam pang a chun Matithia te, Shama te, Anaiah te, Urijah te, Hilkiah te leh Maaseiah te a ding u a; chun a veilam pang achun Pedaia te, Mishael te, Malkijah te, Hashum te, Hashbadana te, Zekaria te leh Meshullam te chuh a ding u a.

⁵ Chun, mi chengcheng mitmuh in Ezra chun lehkhabuziel chuh a phel a, (amah chuh midang te sanga sangzaw a ding ahi) chun, lehkhabuziel chuh a vak phel phet chun mipi chengcheng chuh a ding dawk u a.

⁶ Tichun, Ezra chun, Lalpa Pathien lopi tak chuh a pakchau a, “Amen, Amen,” ti’n a khut uh dawmsang kawm in a na dâwng u a. Chun, a maichang u a leisi’n a khun u a Lalpa chibai a bûk tau hi.

⁷ Chun, Levi chite, Jeshua, Bani, Sherebia, Jamin, Akkub, Shebathai, Hodija, Maaseiah, Kelita, Azaria, Jozabad, Hanan, leh Pelaia chun dân thu chuh mipite chuh a hilhchien u a, mipite chuh a dinna mun u ah chun a ding zing u a.

⁸ Tichun, Pathien dân lehkhabu chuh kichien takin a sim u a, a umzie a hilhchien u a; tichun, a sim u chuh a hilhchien zel u a.

⁹ Khutichun, mipite chun dân thu chuh a zak phet un a lungthim uh a khawih mah mah a, tichun a kap tau a. Ziephet chun gam awptu Nehemia leh thiempute leh lehkhazikpa Ezra leh mipi sinsak Levi chite chun mipite kawm achun, “Tuni hi Lalpa na Pathien u a ding a ni thiengtho ahi a, kap kiu inla, thasie takin um kiu in,” a tiu a.

¹⁰ Khutichun, amah chun a kawm u ah, “Chieh unla, a thau thau neu unla, a thum thum dâwn unla, bangmah neilote dingin chanvo thâk un. Tuni hi Lalpa a dinga thiengtho ahi ngâla. Lungkham kiu in, a ziek chuh Lalpa a na kipahna u chuh na hât nau ahi ngâla.”

¹¹ Khutichun, Levi chite chun, “Thip hiet hiet un, tuni hi ni thiengtho ahi ngâla; lung le lungzîng kiu in,” ti’n mipite chuh a thêm bih tau a.

¹² Tichun, a kawm u a dân thu kisimdawk chuh a hetthiem ziekun, mipite chuh a chieh tau a, a ne’n a dâwn u a. midang te chanvo ding a thâk u a; guolvakna thupi tak a siem tau hi.

Bawkcha Kut

¹³ Chun, zie tha, a ni nih ni chun mipite laka inkuon lawiupate, thiempute leh Levi te chuh dân thu chuh ngaitha dingin lehkhazikpa Ezra kawmah dân thu chuh ngaitha dingin a hung khawm u a.

¹⁴ Chun, Lalpa’n Israel chate chuh Mosi kienga a thupiek dungzui in a tha sagih na a kut sung cheng chuh bâwkcha sunga a um dinguh ahi tih a mudawk u a.

¹⁵ Zie thu hi amau khawpi leh Jerusalem a a phuonzak ding uh ahi, “Tang ah chieh unla, olive thing bâkte, tum thing bâkte, mui bâkte, thing nah gimlim bâkte chuh sawlbuk a na siem dinguh ahi, tih zik ahih bangin,” ti’n.

¹⁶ Khutichun, mipite chuh a chieh u a, thingbâk haw chuh a hun chawi u a, sawlbuk a siem u a. Mitin in amah In huongsung leh inmai haw leh Pathien In huongsung leh Tui kawtkhaka lamlien pang vel leh Ephraim Kawtpi lamlien a chun sawlbuk a khawh u a.

¹⁷ Khutichun, saltâng vaikit te chengcheng chun bâwkcha a kisiem u a, zie tak achun a cheng tau a. Nun chapa Joshua hun lai apat zie ni tieng chun zie tawbang chuh Israel chate’n a hih kha nai puou a, ziephet chun, kipahna nasa tak a hun nei tau hi.

¹⁸ Chun, Pathien Dan lehkhabu chuh ani masapen apat nicheng in, pên apat a tâwp tiengin a sim u a. Tichun, kut chuh ni sagih a mang u a, a ni giet ni chun thupiek bangin kikhawpna thiengtho nei in a sutawp sek ui.