NEHEMIA 4 - PATHIEN LEKHABU THIENGTHO (BSI)

Ênghona leh Dodalna

¹ Himahlele, hiti hi a hung hi a, kulhbang ka siem phau hi tih Sanballat in a het phetin a lungna mah mah ta a, Judate chuh a êngho a.

² Tichun, a suohpih te leh Samari sepaihte masang achun hiti hin a gen ta a, “Zie a Juda zawngkhalte hin bang ahim a hih uh? Kulh a kisiem theih ding uh a ahim? Ni khat in a hih piting ding uh a ahim? A kithawi ding um? A katumsa hi mu zing in ninpa kisung khawm a pat in suong tiengkhawm kit ding ahiu em?” a ti a.

³ Chun, a kawma Amon mi Tobia chun, “Vak sa himhim leu, a chungah si-âl kal lele a kulh u chu tawh chim mai ding ahi,” a ti a.

⁴ “Aw ka Pathien, ngaitie, muhsit ka hi ngâl u a; ei muhsitnau hi amau lu chung ah chuk sak inla, amau hile khawi gam ahim ah zahhuoi takin saltan sak in.

⁵ A sukkhelhnau lieh khuh ki’n la, a gitloh nau chuh na masang apat in thaihmang sak ki’n; kulhbang siemte masang a chun nang a hun sulungna ngâl u a,” ti’n ka paucham a.

⁶ Khutichun, mipite chun a lungthim pumpiu a nasep nawpna lungthim a neih ziekun, kulh chuh ka siem u a, a sânlam kimkhat tiengin kulh chuh ka zawm suok u a;

⁷ Amahvang chuh hiti hi ahi a, Sanballat leh Tobia te, Arab mi Gesem, Ammon mite leh Ashdod mite chun Jerusalem kulh siemphat kit ahi tih leh a sietna haw chuh ka siempha kit ui tih a het phet un a lungna mah mah u a.

⁸ Tichun, Jerusalem hun do a sukbuoi guo’n a bawn un a kihogu tau a.

⁹ Himahlele, ka Pathien kieng u ah ka paucham u a, amau haw lauh ziek chun sun leh zan in vengtu ka kawih tau hi.

Nielkalh-tute apat a Suklungkiekna

¹⁰ Chun, zielai chun Juda mipite chun, “Nasem te tha a chau zo ta a, ninpa lah a tam mah mah nalai ngâla, kulh chuh ka sa zawm thei ta puou hi,” a hung tiu a.

¹¹ Ka melmateu chun lah, “A hetlohkal un a lak uh ah va chieh hiting un that hiting un, a nasep uh chawlhsak hitiu, zie masang chun helo ding ahiu hi,” a tiu a.

¹² Chun, hiti hi ahi a, a kieng u a Juda chêngte a hung lai u chun, “Khawilam ah kihei leu chin hun do ding ka hiu” a tiu hi, ti’n sawm vei hiel ei tiu a;

¹³ Zieziekchun kulh nung lam, a niemna achun mipite chuh a inkuon dungzui un a chemzâm u tawh, a tiengcha teu tawh a thalpi teu tawh ka pan saka.

¹⁴ Chun, ka kipana ka vak en viela, milien leh vaihawmte leh mipi dangte kawm achun, “Amau haw chuh kihcha kiu inla, Lalpa lopi leh lauh-um chuh hezing un la, na suohpih teu, na chapa teu leh na chanu teu a dingin galdo un; na ziteu leh na In leh loteu a dingin tawh,” a ti a.

¹⁵ Chun, hiti hi ahi a Pathien in ka melma teu thilhih guot chuh bangmahlo a suoh hi tih a het un, kulh lam ah kei u nasep na chiet ah ka chieh zaw tau a.

¹⁶ Zie hun akipat chun hiti hi a hung hi a, na semte laka kimkhat chun na a sem u a, a kimkhat in tiengchate, phawte, thalpite leh awmphawte chuh a chawi u a, tichun, vaihawmte chun Juda inkuonte nung achun panmun a khawh u a.

¹⁷ Kulhbang siemte leh thil gik pawte, chun, van puok ding ana siem sakte chun le a khut langkhat u a nasem in, a langkhat in gâlvan a chawi u a.

¹⁸ Chun, nasemte chun a kâwng u ah chemzâm a kivawp chiet u a; khutichun, a sa zawm zel u a. Chun, pengkun mûtpa chuh ka kieng ah a ding a.

¹⁹ Khutichun, lawiupate, vaihawmte leh mipite kawm achun, “Nasep ding a tam bêk sek ziekin kulhbang tungtawna hi I kihawp zak u a, kivang deuh a I pan dinguh ahi.

²⁰ Zieziekchun, khawitak hileh pengkun gi na zak u chun, zie apat chun ka kawmah hung taikhawm un. I Pathien un ei do sak ding ahi,” ka ti a.

²¹ Khutibang chun na chuh ka sem u a, chun, a kimkhat chun phalvak akipat a aksi dawk tiengin tiengcha a kivawp zing u a.

²² Khutibang mah chun mipite kienga chun, “Mitin chuh a suokteu tawh Jerusalem ah giek u hen, zan a ei veng ding ahiu a, sun leh nasem ten na a sep theih na dingun,” ka ti a.

²³ Khutichun, kei leh ka suohpih te leh ka suok te leh kei ei zui gâlveng te chu tawh gâlvan ka kichawih chiet u a, kuomah cha’n ka van uh le ka sut man puou a, sawp dinga suohthak tihloh ngâl chuh. Mitin in gâlvan te chuh ka khut un ka chawi zing u a,