NEHEMIA 3 - PATHIEN LEKHABU THIENGTHO (BSI)

Jerusalem Kulh Bang Siemphatna

¹ Khutichun, thiempu lien Eliashib chuh a suohpih te tawh a kipan u a, belam kawtkhak a siem u a, a suthieng u a; a kawtkhak haw chuh amun tak ah a tuoh phau a; Hameah insang tieng in a su thieng tho u a, Hananel insang tieng chun a suthiengtho u a.

² Chun, aban chuh Jerikoh mite’n a sau a; chun, amau haw bân achun Imri chapa Zakur in a siempha a.

³ Chun, Nga kawtkhak chuh Hassenah chate’n a sau a, a zawl a zam u a, kawtkhak haw chuh a siem u a; a khakna leh a kamna thikzawl haw pum in a siem u a.

⁴ Chun, amau haw bân achun Hakoz chapa Uria chapa Meremoth in a sapha a. Amau haw bân achun Meshezabel chapa Berekiah chapa Meshullam in a siempha a; chun, amau bân chuh Baana chapa Zadok in a siempha a.

⁵ Chun, amau haw bân chuh Teko mite’n a siemphau a, himahleh, a milien teu chuh Lalpa nasep na achun a kigawlh nuom puou hi.

⁶ Ziehaw bân achun, kawtpi lui chuh Paseah chapa Jehoiada leh Besideiah chapa Meshullam in a siemphau a, a guhpi te a zam u a, kawtkhak chuh a siem u a, a kamna leh a kamna thikzawl chuh a lemtuok u a.

⁷ Chun, amau haw bân achun Gibeon mi Melairia leh Meron mi Jaddon leh Mizpah te chu tawh luigal zie lampanga lengpa chênna mun tieng in a siemphau a;

⁸ Amau haw bân achun sana sek te laka Harhai chapa Uziel in a siempha a; aban kit a chun gimlim siemte laka mi Hanania’n a siempha a, Jerusalem chuh a kulhbang sah tieng chun a ûmkimvel tau a.

⁹ Chun, amau bân achun Jerusalem biel kimkhata lawiupa Hur chapa Rephai in a siempha a.

¹⁰ Chun, amau haw bân achun Harumaph chapa Jedaia’n amah In zawn a siempha a; chun, aban a chun Hashabnei chapa Hattush in a siempha a.

¹¹ Harim chapa Malkijah leh Pahath-moab chapa Hashub te chun mun dang leh meipi sehna insang chuh a siemphau a.

¹² Chun, amau haw bân achun Jerusalem biel kimkhata lawiupa Hallohesh chapa Shallum in a chanute tawh a siemphau a.

¹³ Guom kawtkhak chuh Hanun leh Zanoah lawite’n a siemphau a, a kawtkhak chuh a siemphau a, a kamna leh a thikzawl te a zam u a; chun, êk kawtkhak tiengin kulhbang tawng sangkhat a siem u a.

¹⁴ Khutichun, Beth-hakkerem biel a puitu Rakeb chapa Malkijah chun nin kawtpi a siempha a, a tung dawka, a kawtkhakte chuh a kamna zawl haw tawh a siempha a.

¹⁵ Chun, Mizpah a hotu Kolhozeh chapa Shallum in tuikul kawtkhak chuh a siempha a, a tung dawka; a kawt leh a kamna haw leh a zawl haw a zam a; lengpa huon kienga Shelah dîl bang, David khawpi akipat a chieh suk kalbi tiengin a siemphau a.

¹⁶ Chun, aban achun Azbuk, Betzur kimkhat a vaihawmpa chapa Nehemia chun David thân zawn leh dîl laihna kieng leh mi hangsante In tiengin a siemphau a.

Levi chi Kulh a Nasemte

¹⁷ Amah bân chuh Levi chite’n a siemphau a, Bani chapa Rehum te puihuoi in. Aban chuh Keilah kimkhat a lawiupa Hashabia chun amah biel min in a siempha a.

¹⁸ Amah bân chuh a suohpih te’n Keilah kimkhata lawiupa Henad chapa Bavai te chun a siemphau a.

¹⁹ Chun, aban chuh Mizpah a lawiupa Joshua chapa Ezer chun kulhbang kâwi patna gâlvan kawih na inmai tiengin a siemphau a;

²⁰ Amah bân chuh Zabbai chapa Baruk chun abek khat chuh phachuomngai tak in, kulhbang kâwi patna apat a thiempu lien Eliashib in kawtkhak zawn tieng in a siempha a.

²¹ Aban chuh Hakoz chapa, Uria chapa Meremoth in mun dang, Eliashib In kawtkhak akipat in Eliashib In tâwp tiengin a siempha a.

Kulhbang Siempha Thiempute

²² Chun, amah bân chuh thiempute chun a siem phau a, amau chuh phaizawl a cheng ahiu hi.

²³ Amah bân chuh Benjamin leh Hashub in amau In zawn chuh a siemphau a; amah bân chuh Anania chapa Maaseiah chapa Azaria’n a In mai a siempha a.

²⁴ Amah bân chuh Henadad chapa Binnui in mun dang Azaria In apat kulhbang kâwi patna a ningkawi tiengin a siempha a.

²⁵ Chun, Uzai chapa Palal chun kulhbang kâwi patna zawn leh suongkul kawm leng In chungnung zaw apat a dawk chuom In sang zawn chuh a siempha a; aban chuh Parosh chapa Pedaia’n a siempha a.

²⁶ Chun, Nethinim te chuh Ophel ah a cheng u a, suohlam panga Tui kawtpi tawh kimaingat leh In sang hung dawk chuom tiengin a um u a.

Nasem Dangte

²⁷ Amau haw bân chuh, insang lien tak hung dawk zawn leh Ophel kulh tiengin Teko a mite chun a siemphau a.

²⁸ Sakawl kawtpi chung lam chuh thiempu te’n amau haw zawn chiet a siem phau a.

²⁹ Amau haw bân achun Immer chapa Zadok in amah In zawn a siempha a; aban chuh suohlam kawtkhak veng Shekania chapa Shemaiah in a siempha a.

³⁰ Aban chuh Shelemiah chapa Hanania leh Zalaph chapa gupna Hanun chun mun dang a siempha a. Aban chuh Berekiah chapa Meshullam in amah In pindan zawn a siempha a.

³¹ Amau bân chuh sana sekte laka Malkijah chun Hamipkad Kawtkhak zawna Nethinim te In zawna leh sumdawng te in zawn leh, a zawt toh na tiengin a siemphau a.

³² Chun, a ning zawtna kikal leh Belam Kawtkhak kikal chuh sana sekte leh sumkawlveite chun a siemphau a.