NEHEMIA 2 - PATHIEN LEKHABU THIENGTHO (BSI)

Nehemia Jerusalem a a Chieh na

¹ Chun, hiti hi ahi a, Artezerzias kum sawmnih a lal kum, Nisan tha a uain a hun luih nung un, uain chuh ka la a, leng chuh ka pie a. Ni dang in a masang achun lungkham mel ka pu kha puoh a.

² Chun, leng chun ka kawmah, “A damlo la na hi puoh a, bang zieka lungkham mel pu na him? Thil dang ahi puoh a, na lunggil lungkham ahi hi,” ei ti a. Khutichun, ka lau mah mah mai ta a.

³ Chun, kei chun leng kawmah, “Leng chuh kum khuo’n dam zing hen; bang zieka lungkham mel pu lo ding ka him, ei suonteu thân umna khuo chuh a hawm zo ta a; a kawtkhak haw le mei in a katum suok ta ngâla,” ka ti a.

⁴ Khutichun, leng chun ka kawmah, “Banga na deih?” ti’n ei dawng a. Khutichun, van Pathien kieng achun ka paucham ta a.

⁵ Chun, leng kawm achun, “Leng phasak lam ahih a, na suok hi na mittung ka hih chun, ei suonte thân umna Juda khawpi ah ei sawl inla, khuo chuh va siempha kit ing ka,” ka ti a.

⁶ Chun, leng chun ka kawmah, (Lengnu le a kawma chun a chu a) “Bang chan na va thâm die? Bangtik leh na hungkit thei die?” ti’n ei dawng a. Khutichun, leng chun kipâk takin ei sawl ta a; tichun, a hun ding chuh ka tiem a.

⁷ Zie mai chu hilo in leng kawm achun, “Leng phasak ahih chun, Juda gam tienga ka, chieh ei phalsak na ding un, Luigal a vaihawm te ka etsak ding lehkha ei pie’n,” ka ti a.

⁸ Chun, lengpa gammâng veng Asaph muh dingin lehkha leng in zik hen la, khawpi kulh siemna ding leh kulh kawtkhak te siem na ding thing leh ka va luoh ding In sak na dinga thing ei piek theih na dingin, ka ti a. Chun, ka Pathien ei deih bangin leng chun ei phalsak ta a.

Nehemia Jerusalem a Tunna

⁹ Khutichun, Luigal a vaihawmte kieng ka tung ta a, leng lehkha haw chuh ka pie a. Chun, leng chun sepaih hotu haw leh sakawl chung chuong mite chuh ei zuih saka.

¹⁰ Chun, Horon mi Sanballat leh Amon mi Tobia chun a na het phet un, Israel chate phatna ding ngaihtuoh in mi a hung ui ti’n a na lung-awilo mah mah tau a.

¹¹ Khutichun, Jerusalem ka va tunga, ni thum ka um phawt a.

¹² Chun, zan in ka tho a, kei leh midang tawmcha tawh, Jerusalem a ka sep ding Pathien in ka lungthim a a kawih chuh kuomah ka hilh puoh a; ka chutna sabiltung tih loh sa dang himhim zie chun a um puoi.

¹³ Chun, zan in guom kawtkhak achun ka pawtdawk a, dragon tuisutdawk leh êk kawtkhak lam chuh ka zuona, Jerusalem kulh chim sa leh a kawtkhak mei in a kâk tum haw chuh ka en viela.

¹⁴ Chun, tuinak kawtkhak leh lengpa dîl lam zuon in ka chieh zela; himahleh, ka chutna sabiltung chieh pai theihna ding chuh a um puoh a.

¹⁵ Tichun, zan in luicha dung ka hawh u a, kulhbang chuh ka en viel a, tichun ka vaikit a; guom kawkhuk achun ka luta, tichun ka vaikit ta a.

¹⁶ Vaihawmte chun khawia chieh ka him tih leh bang hih ka him tih a he puou hi. Chun, Judate, thiempute, miliente, vaihawmte leh nasem dangte chuh bang mah ka hilh tadih puoi.

Kulhbang Siem dinga Mipite a Tîlna

¹⁷ Khutichun, a kawm u ah, “I chansiet zieu hi na muu a, Jerusalem siet dân te leh a kawtkhak te a katum tai tih le na heu hi. Hung tiem u, gensiet I hih loh na dingun Jerusalem kulhbang chuh sapha kit hitiu,” ka ti a.

¹⁸ Chun, ka Pathien ei deihsak thu le amau chuh ka hilh a, ka kawma leng thugen haw le. Chun, amau chun, “Khaile, kipan hiting un, siemphai tingun, tung ding kit hitiu,” a tiu a. Khutichun, zie na pha sem ding chun a khut uh a hih hât tau a.

¹⁹ Himahleh, Horon mi Sanballat leh Amon mi Tobia leh Arab mi Gesem in a na zak phet un, musit tak in ei nuihsan u a, “Na thilhih u hi bang ti dân a? Leng chunga kiphin guo na hiu maw?” ei tiu a.

²⁰ Khutichun, amau chuh hiti hin ka dâwng a, “Van Pathien in ei lawhtit sak intin, khutichun, kei uh a suokte hi kipan ing ka tingun, tung ding kit ding ka hiu hi; nang hawn vang Jerusalem ahin chanvo leh thuneihna ahim, khutnung thang ahim na nei puou hi,” ka ti a.