NEHEMIA 1 - PATHIEN LEKHABU THIENGTHO (BSI)

Nehemia’n Jerusalem a Ngaihkhawk na

¹ Hakalia chapa Nehemia thute chuh: Hiti hi ahi a, kum sawmnih na, Kisleu tha a Susan khawpi a leng In a ka um lai in;

² Ka suohpih te laka khat Hanani leh Juda gama mi khenkhat a hung u a; chun, Juda sal pawtte leh nutsieh a umte leh Jerusalem chanchin ka dawng a.

³ Amau chun ka kawmah, “Saltâng pawtdawkte leh zie gama nutsieh te chuh sukgimtheih leh gensiet ahiu a; tichun, Jerusalem kulhbang haw chuh a chim lem lum mai a, a kawtkhak haw le mei a hâltum in a um hi,” tih ei hilh u a.

⁴ Chun, hiti hi ahi a, zie thu chuh ka zak phetin, ka chutha a, ka kap ta a; ni bang zat ahim chuh anngawl in lungkham takin van Pathien masang ah ka paucham a.

Nehemia Pauchamna

⁵ “Aw Lalpa van Pathien, Pathien lopi leh lauh-um, Amah hehpih a a thupiek zawp te chunga thugawlh hezing a zahngaihna sulang sek pa;

⁶ kei lam ah na bil hun dawh inla, na mi Israel chate a ding a sun leh zan a paucham zing na suok hi ei hun ngaitha’n. Na chungah ka na gilo tau hi tih ka phuong a, ka pileputeu leh kei mau ngêi hi ka na gilo tau hi; ahi, kei leh ka pa inkuon te’n thil ka na hihkhiel tau hi.

⁷ Na chungah thil phalo tak chuh ka na hih tau a; na suok Mosi kawma na thupiek Dan leh vaihawmna chuh ka na zawp ta puou hi.

⁸ Na suok Mosi kawma, ‘Na gitloh u chun namtin laka hun theh zak ding ka hi, ti a na thupiek chuh hezing dingin ka hun ngên hi.

⁹ Amahvang chuh kei lam na hung ngat kit u a, ka thupiek te na zawp u a, ziehaw chuh na hih u chun na lak u ah van tâwp tieng hiela nawhmang um lele zie apat chun amau chuh puikhawm kit ing ka ting, ka min um na dinga ka mun guot achun puikit ing ka,’ ti’n.

¹⁰ Chun, ziehaw hi na suok te leh na mite, na thilhih theihna nasa tak leh na khut hattak a na puihdawk te ahiu hi.

¹¹ Aw Lalpa, ka hun ngên hi, na suok pauchamna leh na min kihchakna a kipâk sek, na suok pauchamna ahin na bil hun dawh inla; tuni hin na suok hi ei lawhtit sak in, tichun, zie mite mitmuh ahin zahngaihna lat sak in,” ti’n ka paucham a. Kei chuh leng khawn pie ka hi ngâla.