NASEPTE 6 - PATHIEN LEKHABU THIENGTHO (BSI)

Upa Sagih Teldawkna

¹ Chun, zie laia sinsak haw a pun deuh deuh lai u chun, ni chenga a thil kihawpnau a, a meithaiteu a limsak loh ziekun, Grik-Judate chuh Hebraite chungah a hung phunchiek tau a.

² Tichun, sawm le nih te chun sinsak mipite chuh a sam khawm u a, “Pathien thugen haihsan a, dawhkan a I tawihviel u chun pha puo’n a.

³ Khutichun, suohpihte haw, na laku ah Thagau Thiengtho leh chitna a dim, mi min pha ngen sagih teldawk un, amau haw chuh zie thil haw ngaihtuoh viel ding hin guot hitiu.

⁴ Eihaw chuh, paucham leh thu ngaihtuoh viel in um kit zel hitiu,” a tiu a.

⁵ Chun, zie thu haw chun mipi chengcheng chuh a sukipak a; tichun, Stephan, taksanna leh Thagau Thiengtho a dim tawh, Philip tawh, Prokoras tawh, Nikanor tawh, Timan tawh, Parmenas tawh, Nikolas Judate phungkai, Antiokei khuo a um tawh a tel u a.

⁶ Ziehaw chuh sawlchakte masang achun a din sak u a; amau chun a chung u a khut nga’n, a paucham sak u a.

⁷ Khutichun, Pathien thu chuh a zak zel a; Jerusalem khuo achun sinsak haw chuh a hung pung mah mah tau a; thiempute laka mi tamtak inle, taksanna chuh a awi tau hi.

Stephan Matna

⁸ Chun, Stephan chuh Pathien apat a lungsietna leh thilhih theihna’n a dim a, mi lak ah thilmak leh melchikna lopitak a hih sek a.

⁹ Himahlele, sal Pawtte lawi, Kurini khuo a mite, Aleksandria khuo a mite kikhawpna a tihnau a mi khenkhat leh Kilikia gama mite, Asia gama mite kikhawpna a mi khenkhatte chuh a hung kipan u a, Stephan chuh a hung niel tau a.

¹⁰ Himahlele, a chitna leh a genpih pa Thagau chuh a lektha thei puou hi.

¹¹ Tichun, mi khenkhat a gawlhguu a, ziete haw chun, “Mosi leh Pathien a gensiet ka zau hi,” a tiu a.

¹² Khutichun, mihaw upahaw, dân sinsakte chuh a tîlguu a, Stephan a bawlchak u a, a man u a, tichun, vaihawmte masangah a pui u a.

¹³ Chun, hetpih lêm le a kisiem u a, ziete chun, “Zie pa hin zie In Thiengtho leh, Dan hi a gensie zing sek a;

¹⁴ Chuleh, ‘Zie Nazareth Isu hin, zie In hi phie’n tin, Mosi’n Dan ei piek haw khah hih lamdang ding ahi,’ tih a gen ka zau hi,” a tiu a.

¹⁵ Chun, vaihawmna a chute chengcheng chun Stephan chuh a changtak in en zing u a, a mel chuh vânsâwlchâk mel guolin a muu hi.