NASEPTE 28 - PATHIEN LEKHABU THIENGTHO (BSI)

Malta Tuikuol Tunna

¹ Khutia, bit taka ka kaih suok zawh u chun, tuikuol min chuh Malta ahi tih ka he dawk tau a.

² Chun, namchawm mite chun lungsietna mai in ei na lungsiet ta puou a. Guoh a hung zuk ziek leh a dap ziekin, mei a tik u a, ka bawn un ei na lawp tau a.

³ Chun, Paul chun thing lawm khat a va la a, mei ah a tik a, a sat ziekin gûl a hung pawt a, a khut a chuk sak a, a bek zing ta a,

⁴ Chun, zie gam mite chun, ganhing gu nei a khuta kikhai zing chuh a muh phet un, “Zie pa hi tuolthat hi tei ina, tuipi apat in taidawk mah lele, phuba lapa chun a hin a awi talo ahi hi,” a tiu a.

⁵ Himahlele, Paul chun, gûl chuh mei lak ah a thing tha a, bangmah a ti puoh a.

⁶ Amau haw chun, la, hung vum intin, thakhata puk in, thi pai zieng dingin a gingchau a; tichun, sawttak a ngak u a, bangmah a ti puoi, tih a het u chun, a lungthim uh a hêi u a, “Pathien ahi hi!” a ti zaw tau a.

⁷ Zie mun apat a gamla lo cha achun, zie tuikuol hausa, Publias kitipa gam chuh a um a. Zie pa chun kei uh ei na lawp a, ni thum kipâk takin ei tunsak ta a.

⁸ Publias pa chuh, khawsik leh santên in a na kuol zing a. Paul chuh a kawmah a va lut a, a paucham saka, a chungah a khut a nga a, a sudam ta a.

⁹ Zie chuh a hih zawh phet chun, zie tuikuol a damlo chengcheng chule a hung u a, a dam tau a.

¹⁰ Ziete haw chun thilpiek tamtak ei pieu a, chun, ka kitawl kit phet u chun, zinna dinga ka pawimawh cheng u chuh kuong achun ei kawihsak tau a.

¹¹ Chun, tha thum nung in, Aleksandria khuo a kipat kuong khat, phalbi sunga zie tuikuol a chuh umsa, a tiemtehna Kastor leh Pollax, amin “Phik” kiti achun ka chieh tau a.

¹² Chun, Surakus khawpi ka tung u a, taka chun ni thum ka nichuong tau a.

¹³ Zie tak apan chun a kitawl zel u a, Rhegium khuo ka tung u a. A zing chun sim huih a hung nung a, chun, ni nih sung chun, Puteoli khawpi ka tung tau a.

¹⁴ Zie tak achun suohpihte khenkhat ka muu a, a kawm u a ni sagih nichuong dingin ei thoh u a.

¹⁵ Chun, Rome khuo a suohpihte’n ka chanchin uh a zak phet un, Appias Dawl mun leh, Khuolbuk thumna tiengin kei uh ei dâwn dingin a hung u a. Paul in amau haw chuh a muh phetin, Pathien kawmah kipahthu a gen a, a hatchuompih mah mah ta a.

Rome Khuo Tunna

¹⁶ Chun, Rome khuo ka lut phet u chun, Paul chuh a chingpa sepaih chu tawh amah maia um a phal u a.

¹⁷ Ni thum nung chun, Paul in, khuo a Judate lawiupa haw chuh a sam khawm a. A hung khawm phat u chun, a kawm u ah, “Suohpihte haw, I miteu ahim, ei uh ei suonteu apat dân I muh teu ahim, kalh lama bangmah ka hih loh san le, Jerusalem a suongkul a khum in ka um a, Rome te khuta pieka um ka hi.

¹⁸ Chun, amau chun ei suohsalh zawh un, thihna kham hiel bangmah ka chunga a muh loh ziekun, thahdawk ei guou a.

¹⁹ Himahleh, Judate’n zie chuh a niel ziekun, Kaisar kawma tun lo thei ka hita puoh a, himahleh, ka chipihte ngêi hekna a ka hih a hi puoi.

²⁰ Ziezieka chuh, nang haw hi hun hopih ding leh hun kimuhpih dinga ka hun sap ahi. Israel te kineppih pa zieka zie thikkhau hi but ka hi,” a ti a.

²¹ Chun, amau chun a kawmah, “Na chanchin, Judai gam apat, lehkha bêkin la ka mu puou a, suohpihte kuomah in la taka hung in, na chanchin phalo bangmah a gen diek puou a.

²² Amahvang chuh, zie pawl, na panna pawl a mite hi gamtin ah gensiet a hiu a, nangin bangti’n a na ngaih, zak ka nuom ui,” a tiu a.

²³ Khutichun, ni a tiem u a, zie ni chun Paul umna In achun mi tamtak a kikhawm u a; zingpi apat, nitâk lam tiengin, a kawm u ah zie thu chuh a hilhchien ta a, Pathien gam thu a hetsak a, chun, Mosi Dan Lehkhabu apat leh, Thiemgaute Lehkhabu apat ladawk in, Isu chanchin thu achun, amau haw chuh thuzawh a guo hâm a.

²⁴ Chun, a lak u a mi khenkhat chuh, a thugen chun a thuzawh ta a, abang vang chun a gingcha puou hi.

²⁵ Tichun, Paul in zie thu khat hi a gen zawhin, amau haw lak ngeia kituok lohna um in, a chieh dawk san tau hi: “Thagau Thiengtho in Thiemgau Isai kama, nanguh hun suonte kawma a gen khah a dik mah mah hi!

²⁶ ‘Chieh inla, zie chite kawma hin va gen ah: Bil in vang chuh zau in na tin uh, himahleh, hechien diek puo’n lau; muh chuh muu in tin uh, hedawk diek puo’n lau:

²⁷ Aziek chuh, zie mite ngaihtuohna hi ana chavai ta a; A bilhawu le ana dawh puou a, A mit hawu le a sin ziekun. Khutilochun, a mit un muu un tin uh, A bil un za khau untin; A lunggil un hethiem khau untin uh, Tichun, kei lam ah hung kihei kit untin, Chun, ken a na hihdam kha’ng ka,’ a tii,” ti a a gen guol khan.

²⁸ “Zieziekchun, Pathien hukdamna thu hi, Jentel te kawma sawl ahi tai, tih zau in, amau haw chun vang a na ngaitha ding ahiu hi!” a ti a.

²⁹ Chun, zie thu chuh a a gen phet in Judate chuh a kilangseh u a, nasa tak a kiniel in a nusieh tau hi.

³⁰ Chun, Paul chuh kum nih lûm kêi, amah umna dinga In luohman kipie a chun a cheng a, zie tak a chun, a kawma lut cheng a lawp seka.

³¹ Pathien gam chanchin a gen sek a, hangsan tak leh, zalen takin Lal Isu Krista thute le a sinsak sek a, kuoma’n a kham puoh ngâl u a.