NASEPTE 26 - PATHIEN LEKHABU THIENGTHO (BSI)

Agrippa Masanga Paul dinna

¹ Chun, Agrippa chun, Paul kawm achun, “Na thiemna thu gen thei inla,” a ti a. Ziephet chun; Paul in a khut a tung a, a thiemna thu a gen ta a:

² “Leng Agrippa, Judate’n ei hêkna chengcheng u ah, ka thiemna thu tunia na maa ka gen ding ziekin, mi vangpha’n ka kingai hi.

³ Ziehi ka kipahna pên ahi: Judate laka dân leh thubuoi cheng na het thiem ziekin; chuleh, thuokhat taka ei na ngaihthak sak dingin ka hun ngên hi.

⁴ “Judate chengcheng in, ka naupan lai, apat a ka hindan a he suok kêi u a. A masapen a, keimah gam ngêi leh, chun, Jerusalem khuo a ka hun chengcheng ka mat zawh dante kha a he suok kêi uh ahi.

⁵ A tûng pên in, khati a, ka sakhuou pawl, meinei pên, dân ngeina a Pharisai a ka um khah, a nawp u chun ei genpih thei uh ahi.

⁶ Tuhin, Pathien in ei suonteu kawma thu a tiem khah, kinepna ka neih zieka, ka chung thu vaihawm sak dinga ding ka hi.

⁷ Zie thutiem chuh, ka nam uh, nam sawm leh nam nih ten, a sun a zan a Pathien na phachuomngai taka sema, muh a kinep sek u chuh ahi. Aw Lengpa, zie kinepna thu ziek chun, Judate’n ei hêk uh ahi hi.

⁸ Pathien in mithite a kaitho hi tih hi, bangati a thil hithei lo a na gel u a?

⁹ “Keimah ngêi inle, Nazareth Isu min kalh lam in thil tamtak hih leng pha’na, ti’n ka na gingcha a.

¹⁰ Zie tawbang chuh Jerusalem khuo ah ka na hih sek a; chun, Thiempu liente kawm apat thu ka mu a, mi thiengthote laka mi tamtak suongkul ale ka na khum sek a; a thah lai un le, a thah uh phasa lam ah ka na pang sek hi.

¹¹ Chun, kikhawpna In tin ah ka gawt sek a, Isu thu gensiet sak ka guo hâm sek a, chun, a chungu ah ka hangsan mah mah sek a, gamdang khuo tieng inle ka sugimthei sek hi.

Paul in a Pienthakna Thu a Genna

¹² “Khutibang hih ding chun, Thiempu liente thu mu leh, a sawlnau lehkha keng in, Damaska khuo ah ka chieh a.

¹³ Chun, aw Lengpa, ka chieh lai in, sun-an nek phat ahi a, van apat eng, ni eng sanga vak zaw’n, keimah leh, ka tawnpihte vela eng in ka mu a.

¹⁴ Tichun, ka bawn un tuol ah ka puk u a, chun, Hebrai pau in, ‘Saul, Saul, nangin bangati a ei sugimthei na hi? Sutna thikzum pêk nang dingin a na ie!’ ei hun ti’n, aw ka za a.

¹⁵ Chun, ken, ‘Lalpa, kuo na hi?’ ka ti a. Lalpa chun, ‘Isu, na sukgimtheih kha ka hi.

¹⁶ Himahlele, tho inla, na keng in ding ah; Zie na thil muh haw leh, tunung a thil ka hun etsak dingte chuh, mite kawma gen ding leh, hetpihtu a hun siem dingin na kawma hung kilak ka hi.

¹⁷ Ka hun sawlna dingte, Israel mite leh Jentel te khut apat chun hun hukbit ding ka hi.

¹⁸ A mit uh hihvak ding leh, thimna apat a vak lama kiheisak kit ding leh, Setan thilhih theihna apat a Pathien lama kihei kit a, kei ei taksan ziek u a, a gitlohnau ngaihdama um a, Pathien mite laka go chan a neihna dingun,’ a ti a.

Paul in a Nasep a Genna

¹⁹ “Zieziekchun, aw leng Agrippa, van apat a vau lam thil ka muh chuh ka niel puoh a,

²⁰ Himahleh, a tûngin Damaska khuo a mite kawmah, zie nung chun, Jerusalem khuo a mite kawmah, chun, Judai gamtina mite kawm leh, Jentel te kawm nasan ale, lunghei min pu kham a thilhih a, lunghei a, Pathien lam a ngatna dingun, ka hilh zawk sek ahi.

²¹ Ziehaw ziek chuh ahi, Judate’n Pathien Ho-In a ka um laia ei mat u a, thah ei guot uh.

²² Himahlele, Pathien kawm apat panpihna ka muh ziekin, tuni tieng hin, mi neute leh mi liente kawmah thu ka hetsak zel a; ka thugen chuh, thiemgaute leh Mosi’n, hung tung ding ahi ti a a na gen:

²³ Krista’n dahum thuok intin, amah chuh mithi lak apat thokit masapen, Judate leh Jentel te kawma hukdamna vak muhsak masapen hi’n a, a tih uh thu khah,” a ti a.

²⁴ Chun, khutibanga a thiemna thu a gen lai chun, Festas chun aw ngeih tak in, “Paul, a ngawl na hii, na sin tam na’n a hun sungawl ahi hi,” a ti a.

²⁵ Himahlele, Paul chun, “Zahum, Festas phapen, ka ngawl dang e! thudik tak leh thu ching tak ka gen ahi zawi.

²⁶ Zie thu hi Leng hin na he apuo, na kawm ale lau lo in ka gen hi. Ziehaw hi na kawma îm a hi puoi, tih dik takin ka hêi, ziehaw hi ningthip a hih a hi puoh ngâl a.

²⁷ Leng Agrippa, thiemgaute thu na gingcha? Na gingchai tih ka hêi!” a ti a.

²⁸ Ziephet chun, Agrippa chun Paul kawmah, “Chawmlo kal mai thepa, Kristien a ei siem guo na hi hi!” a ti a.

²⁹ Paul chun, “Sawt leh, pal leh, nang mai ka hun ti puoi, tunia ka thu hete chengcheng hile, keimah guola um dingin Pathien kawma ka nget ahi, thikkawl hi vang but lo in,” a ti a.

³⁰ Ziephet chun, leng tawh, Gam paw pa tawh, Berniki tawh, a kawm u a chute chu tawh a kipan u a, a chieh chuom u a,

³¹ a kiho tau a, “Zie pa hin, thihna ding leh, kawlbuhna kham hiel thil bangmah a na hih puoh hi.” a kitiu a.

³² Chun, Agrippa chun Festas kawmah, “Zie pa hin Kaisar kawma tut ding ana tiem lo hileh, thahdawk mai theih hi ven!” a ti a.