NASEPTE 23 - PATHIEN LEKHABU THIENGTHO (BSI)

¹ Tichun, Paul chun vaihawmte chuh chang takin a en a, a kawm u ah, “Suohpihte haw, tuni tieng hin, Pathien mitmuh a phalam a ka het taphawt hih in ka um sek hi,” a ti a.

² Thiempu Lienpen Ananias chun, Paul kienga dingte kawm achun, a kam betsak un, a ti a.

³ Paul chun a kawmah, “Nang, suong pal nuh vam pa, nang Pathien in hun bêng zaw’na! Nang, Dan guola mi chungthu tan dingin, Danlo guola ei bet dingun thu na pie maw?” a ti a.

⁴ Chun, Paul kienga dingte chun a kawmah, “Pathien Thiempu Lienpen na gai viel maw?” a tiu a.

⁵ Paul chun, “Suohpihte haw, Thiempu Lienpen ahi tih ka het loh ahi; ‘Na chipihte lawiupa chungah thu phalo gen ki’n,’ tih le zik ahi ngâl a,” a ti a.

⁶ Chun, Paul in abang Sadukaite, abang Pharisaite ahiu hi tih a muh phetin, vaihawmte lak achun a kiko dawk a, “Suohpihte haw, Pharisai ka hi, Pharisai chapa le ka hi; mithite thawhkitna a um hi tih kinepna ka neihna thu a suohsalh a um ka hi hi,” a ti a.

⁷ Zie thu a gen zawh zawh chun, Pharisaite leh Sadukaite chuh a kiniel tau a, vaihawmte chuh a kilangseh tau hi.

⁸ Sadukaite chun, “Mithi thawhkitna himhim a um puoh a, vânsâwlchâkte leh thagau le a um diek puoi,” a ti sek u a; Pharisaite chun la, zie lampi nih chuh a um hi tih a gingcha ngâl u a.

⁹ Tichun, nasatak in a buoi tau a, Pharisai lama mi, Dan thuzikte laka khenkhat a ding dawk u a, nasatak in a niel u a, “Zie pa hi, bangmah a gitlohna I mu puou hi; thagau inle, vânsâwlchâkte’n le amah a hopih ahih khâk chun, Pathien I do loh dinguh ahi!” a tiu a.

¹⁰ Khutia, a kiniel nasat deuh deuh phet u chun, sepaih lawiupa lienpen chun, Paul chuh a maltel khâk diu a lau a. Tichun, sepaihte chuh, alak u a va chieh a, Paul va puidawk a, kulh sunga puilut dingin thu pie ta a.

¹¹ Zie zan chun, Lalpa chuh Paul kieng ah a ding a, a kawmah, “Lungmuong takin um ah, Jerusalem khuo a ka thu na hetpih guol mah hin, Rome khuo ale na hetpih ding ahi,” a ti a.

Paul Thah Dinga Phielgukna

¹² Chun, ni a suok phetin, Judate khenkhat chuh a kikhawm u a, Paul a thah masangsieh uh, bangmah ne leh dâwn lo dingin a kihâksiel u a.

¹³ Zie thu a gûka thahna ding hun guonggalh khawmte chuh sawmli sanga tamzaw ahiu.

¹⁴ Amau haw chuh Thiempu Liente leh upate kawmah a chieh u a, “Paul ka thah masangsieh uh, bangmah tep lo dinga kihâksiel ka hiu hi.

¹⁵ Zieziekchun, nangun le, vaihawmte tawh, a thu dik zaw deuha ngaihtuoh guo bangin, na kawm u a pui tha dingin sepaih lawiupa lienpen kawmah thu va thak un. Chun, na kawmuh a hung tun ma’n, kei uh hi amah that dingin ka kisazo zing uh ahi,” a tiu a.

¹⁶ Himahlele, a chângguu hi tih Paul suohpihnu chapa’n a na het in, kulh sung achun a va lut a, Paul a va hilh ta a.

¹⁷ Chun, Paul chun sepaih lawiupa khat a sama, “Zie tangvalpa hi, lawiupa lienpen kawmah pui ah, thu bang ahim, gen ding nei a hih tuok hi,” a ti a.

¹⁸ Khutichun, sepaih lawiupa lienpen kawm achun a va pui a, “Paul suongkul lut pa khan ei sama, zie tangvalpa hi, na kawma hun pui dingin ei sawl a, na kawma thu, bang ahim gen ding nei a hih tuok hi,” a ti a.

¹⁹ Chun, sepaih lawiupa lienpen chun a khut in a tu a, a chieh chuom pih a, a gûkin, “Banga hilh ding nei neih chuh?” ti’n a dawng a.

²⁰ Chun, amah chun, “Paul thu chuh dik zaw deuha na ngaihtuoh ding bangin, zing leh vaihawmte kawma puih suk dingin Judate’n na kawma hung nget a lem a sau a.

²¹ Himahlele, a thuu a na ngai ki’n; a lak u a mi sawmli sanga tamzaw’n a chang zing u a, ziete chun, amah a thah masangsieh uh, bangmah ne lo dâwn lo dingin a kihâksiel u a, tuhin, na thu ngak in, kisazosa a um zing ahiu hi,” a ti a.

²² Ziephet chun, sepaih lawiupa lienpen chun tangvalpa kawm achun, “Zie thu haw hi nei hetsak tai tih kuomah hilh ki’n,” a ti a. Tichun, tangval chuh a sawl mang ta a.

Felix ânga Paul a Dinna

²³ Chun, sepaih lawiupa chun a miliente nih a sama, “Zan ihmut thip tieng leh, Kaisari khuo tienga chieh dingin, sepaih zanih tawh, sakawl chunga chuthiem mi sawmsagih tawh, tiengcha chawi mi zanih tawh guot un.

²⁴ Chuleh, gam vaipawpa Felix kawma chuh bit taka a tut theihna dingun, Paul chutna dingin sakawl le na piek dinguh ahi,” a ti a.

²⁵ Chun, sepaih lawiupa chun tawbang hin lehkha a zik a:

²⁶ “Klaudias Lusias in, Gam vaipawpa phapen a chibai hi.

²⁷ Zie pa hi Judate’n a man u a, thah a guot lai un, a kawm u ah sepaih hawn pui in ka va chieh a, Rome mi ahi tih ka he a, ka hukdawk ta a.

²⁸ Chun, a hêk lawhna pên uh het ka nuom a, a vaihawmteu kawmah ka puisuk a.

²⁹ Himahleh, bangmah, thihna leh kânna kham hiel ding a hih ka mudawk puoh a, a hêkna thuu chuh amau haw dân bang ahim ziek mai ahi a.

³⁰ Judate’n amah a chângguu ui tih, mi’n ei hetsak phet un, na kawma ka hun sawl pai zieng ahi. Amah hekte ngêi le, a chungthu na masanga gen dinga ka hilh tai ahi, ” ti’n.

³¹ Khutichun, sepaihte chun a thupiek guol chun, Paul chuh a zan a zan in a puidawk u a, Antipatris khuo a tunpih u a.

³² Chun, a zing chun, keng sepaihte chuh kulh lam achun a vaikit u a, sakawl chung chu mihaw chuh amah tawh chieh zel dingin a taihsan tau a.

³³ Tichun, Kaisari khuo a tunpih tau a, Gam vaipawpa kawmah lehkha chuh a pieu a, Paul le, a kawmah a pie dawk tau hi.

³⁴ Chun, Gam vaipawpa chun lehkha chuh a sim zawhin, Paul chuh a umna gam a dawng a. Kilikia gam mi ahi tih a het phetin

³⁵ A kawmah, “A hun hekte a hung tun tieng u leh, na thu chuh ngaihtuoh ing ka,” a ti a. Tichun, Gam vaipawpa Herod ina chin dingin thu a pie ta a.