NASEPTE 22 - PATHIEN LEKHABU THIENGTHO (BSI)

Judate kawma Paul thugen

¹ “Suohpihte haw. Pate haw, tuhin na kawm u ah ka thiemna thu, nang haw hun hilh ding ka hi, ngaithau in,” a ti a.

² Chun, Hebrai pau a, a kawm u a thu a gen chuh a zak phet un, a thip zaw deuh tau a; chun amah chun,

³ “Juda mi ka hi a, Kilikia gama Tarsas khuo a pieng ka hi a, himahleh, zie khuo ahih Gamaliel keng bula sin a, seilien ka hi. Ei suonteu Dan, umzie meinei tak chuh sin a um sek ka hi a, tunia nangmau haw chengcheng guol hin, Pathien a dinga kikawih thiengtho sek ka hi.

⁴ Chun, zie Lampi zui taphawtte chuh, thi khawp hielin ka sugimthei sek a, a mei a pa’n ka kân a, suongkul ah ka khum sek a.

⁵ Thiempu Lien leh vaihawm upate cheng inle, zie thu haw chuh a dik hi tih ei hetpih ui. A kawm u apat le suohpihte piek dingin lehkha ka mu a, chun, amau haw chuh a gawt ding u a kansa a Jerusalem khuo a pui dingin, Damaska khuo achun ka chieh sek kha.

Paul in a Pienthakna a Gen

⁶ “Chun, ka chieh lai in, Damaska khuo kieng ka tun chun, sun-an nek phat velin, hatkhat in van apat eng nasatak ka vel ah a hung eng ta phut a.

⁷ Tichun, tuol ah ka puk a, ‘Saul, Saul, nangin bangati a nei sugimthei?’ ti’n aw ka za a.

⁸ Chun, ken, ‘Lalpa, kuo na hi?’ ti’n ka dawng a. Amah chun ka kawmah, ‘Nazareth Isu, na sukgimtheih kha ka hi,’ a ti a.

⁹ Chun, ka guolte chun eng chuh a mu nau a, ei hopihpa aw vang chuh a za puou hi.

¹⁰ Chun, ken, ‘Lalpa, bang ka hih die?’ ka ti a. Lalpa chun ka kawmah, ‘Tho inla, Damaska khuo ah lut ah, thil, na hih dinga guot chengcheng hun na hilh un au,’ a ti a.

¹¹ Chun, zie eng lopitak ziek chun khuo ka mu thei ta puoh a, ka guolte’n khut in ei kai u a, Damaska khuo ah ei puilut tau a.

¹² “Chun, zie khawpi achun mi khat, Ananias, Dan lama Pathien khawksak leh, taka Juda um cheng chengte laka min pha mah mah chuh a um a.

¹³ Amah chuh a hung a, ka kieng ah a ding a, ka kawmah, ‘Suohpihpa Saul, khuo mu thei kit ah,’ ei ti a. Zie lai tak chun, ka mu thei kit ta a, amah chuh ka mu ta a.

¹⁴ Chun, amah chun, ‘Ei uh ei suonte Pathien in, amah deihlam he ding leh, a Suok Diktat chuh mu ding leh, amah kam ngeia a thugen za dingin a hun tel na hi.

¹⁵ Mi chengcheng kawma na thil muh te leh zakte kha gen dingin, amah a dinga hetpihtu hi ding na hi.

¹⁶ Tuhin, bang zieka ngak nalai ding na him? Kipan inla, baptistma chang inla, Lalpa min chuh sam inla, na gitlohnate tauhngim ta’n la,’ ei ti a.

Jentel te dinga Paul Sapna

¹⁷ “Chun, Jerusalem khuo a ka chieh kit nunga, Pathien Ho-In a ka paucham lai in, kilâkna thil muh ka nei a,

¹⁸ Zie achun, Lalpa chun, ‘Kin inla, Jerusalem khuo apat hin kin takin pawt ah, ka chanchin na gen ding hi pawm lo ding ahiu hi,’ ei tih pêt ka mu a.

¹⁹ Ziephet chun, ken, ‘Lalpa, kikhawpna In tin ah ka chieh a, na thu awi taphawtte ka man a, ka zêp sek khah a heu a.

²⁰ Chuleh, na thu hetpihpa Stephan a thah lai u khan, kei le a kieng u ah ka ding a, pha ka na sakpih ngêi a, a thatte puonhaw le ka na etkawl sak ahi,’ ka ti a.

²¹ Chun, amah chun, ‘Chieh ah, tak apan hin gamla tak ah, Jentel te kawmah hun sawl zaw’ng ka,’ ei ti ta a,” a ti a.

²² Mipite chun, zie thu a gen tieng chun a ngaithau a; chun, aw ngeih takin, “Zie tawbang mi poh hi, khawvel apat sumangthai in! hing tâk a hi puoi!” a ti tau a.

²³ Chun, a kiko kawm u chun a puonhawu a vawk u a, van lam ah leivui a vawk u a.

²⁴ Ziephet chun, sepaih lawiupa chun Paul chuh kulh sunga puilut dingin a mite chuh thu a pie a, chuleh, khuti lâwm lâwma Judate a chunga a kiko na ziek u chuh hetna dinga zêp ding inle thu a pie a.

²⁵ Chun, savun khau a a kân phet u chun, Paul chun a kienga ding sepaih lawiupa kawm achun, “Rome mi himhim, mawh chansak a hih loh chun zêpna ding thuneihna na nei um?” a ti a.

²⁶ Sepaih za lawiupa chun zie chuh a zak phetin, Sepaih lawiupa Lienpen kawm achun a chieh a, “Na thilhih dinga hin chingthei tie! Zie pa hi Rome mi ana hi ie!” a ti a.

²⁷ Ziephet chun, Sepaih lawiupa Lienpen chuh a hung a, a kawmah, “Rome mi na hi maw? nei hilh ah,” a ti a. Chun, Paul chun, “Hi e!” a ti a.

²⁸ Chun, sepaih za lawiupa lienpen chun, “Ken vang zie khaw-mi hihna ding chun dangka tamtak ka seng a puo!” a ti a. Paul chun, “Kei vang Rome mi hisa a pieng ka hi,” a ti a.

²⁹ Ziephet chun, amah sinsadawt dinga chiehte chun a taihsan pai tau a, sepaih zalawiupa chun le, Rome mi a hi tih a het ziek leh, a kân ziek chun a lau ta a.

Vaihawmte maa Paul Dinna

³⁰ Chun, sepaih zalawiupa lienpen chun, Judate’n bang zieka Paul hêk ahiu em tih hêtchet a guo ta a; a zing chun Paul thikkhau buh chuh a phel sak a, thiempu Liente leh vaihawm pawl chengcheng kikhawp ding thu a pie a. Khutichun, Paul chuh a puisuk a, a mau ah a dinsak ta a.