NASEPTE 21 - PATHIEN LEKHABU THIENGTHO (BSI)

Jerusalem Khuo a Paul Chiehna

¹ Tichun, amau haw chu tawh ka kikhen tau a, kuong in ka pawt u a, zie nung chun zang takin Koi tuikuol ka tung u a, a zingin Rhodes tuikuol ka tung kit u a, tak apan chun ka kitawl zel u a, Patara khuo ka tung tau hi.

² Zie tak achun, Phoinikia gama chieh ding kuong khat ka muu a, zie chun ka chuu a, ka kitawl zel tau a.

³ Chun, Kupra tuikuol ka hung tung u a, chun simlam zuonin ka kitawl u a, Suria gam lam ah ka chieh zel tau a, Tura ah, lui pang ah ka châwl tadih u a, taka chuh, kuong a thuomphuo haw chuh suoh thâk ding ahih ziekin.

⁴ Zie tak achun sinsakte khenkhat ka muu a, a kawm u ah ni sagih ka châm tau hi. Amau chun Thagau hetsak in, Paul chuh Jerusalem khuo a chieh lo dingin a hilh u a.

⁵ Himahlele amau haw tawh ka umkhawm zawh u chun, ka nusieh uh a, ka kitawl zel tau a, suohpihte chun a bawn un, a ziteu, a chateu chu tawh lui pang tiengin ei hung thau a, tak achun, khupdin in ka paucham u a.

⁶ Chun, dam takin, ka kitiu a, kuong a chun ka chuu a amau haw chuh In lam ah a kîkkit tau hi.

⁷ Chun, Tura khuo apat chuh kuong a kitawl zelin, Ptolemais khuo ka tung u a, suohpihte ka chibai u a, a kawm u ah ni khat ka nichuong tau a.

⁸ Chun, a zing chun ka pawtdawk kit u a, Kaisari khuo ka tung u a; tak achun Chanchin Pha gen pa Philip In ah ka tung u a, amah chuh, Jerusalem khuo a panpihtu dinga mi sagih tel dawka umte laka khat kha ahi.

⁹ Amah chun chanu li a nei a, nungak thiengtho ahiu a, Pathien thu a gen sek u a.

¹⁰ Zie tak achun ni hunkhawp ka nichuong u a, zielai chun, thiemgau khat, Agabas kiti chuh Judai gam apat in a hung suk a.

¹¹ Ka kawm u ah a hung a, Paul kâwnggak a la a, a khut leh a keng ama’n a kikan a, chun, “Jerusalem khuo a Judate chun, zie tawbang hin zie kâwnggak neipa hi kan un tin uh, Jentel te khut ah pie’nau, Thagau Thiengtho in a ti ie,” a ti a.

¹² Zie thu haw chuh ka zak phet un, kei u leh, zie khuo a mite chun, Paul chuh Jerusalem khuo a va chieh lo dingin hah nget in ka ngên tau a.

¹³ Himahleh, Paul chun, “Bang na tiu a ahim, na kah na kah uh a, ka tha na suksiet uh? Lalpa Isu min ziek chun, Jerusalem khuo ah kân maicha hi puo’ng ka ting, thih le hung thi ding ka hi a puo!” a ti a.

¹⁴ Chun, thoh zawh ding guol a hih loh phet chun, “Lalpa thu thu hi mai hen,” ti’n ka hai tau a.

¹⁵ Taka chuh hun sawt deuh ka mat nung u chun, ka thuomphuou ka siem u a, Jerusalem khuo a chieh dingin ka pawt tau a.

¹⁶ Kaisari khuo a um sinsak khenkhatte tawh le ka kitawn u a, amau chun a min Nason, sinsak masa lawi tak, Kupra tuikuol a um, mi khat ka tunna ding pau In achun ei pui u a.

Paul in Jakob a va Vehthakna

¹⁷ Chun, Jerusalem khuo ka tun u chun, suohpihte’n kipâk takin ei na lawp u a.

¹⁸ A zing chun Paul lawi in, Jakob kawmah ka lut u a, tak achun sapchuom upate chengcheng le a na um u a.

¹⁹ Chun, Paul in amau haw a chibai zawhin, a zenvielna Pathien in manga, Jentel te laka thil a hihsak cheng chengte chuh, a din a den in a gen a.

²⁰ Suohpihte’n zie thu haw chuh a zak un, Pathien a limbawl tau a, tichun, Paul kawm achun, “Suohpihpa Paul, Judate laka gingchate tam dân na mu a; a bawn un Dan chungah phachuom a ngai mah mah chiet u a.

²¹ Himahleh, nangin Jentel te laka Juda umte chengcheng kawm achun, Mosi Dante haihsan a, a chateu chuh a zek uh tan lo ding leh, Judate dân chuh zui lo dingin na sinsak sek hi tih, mi kam ah na thu a zau a.

²² Na hung hi tih he tei ding ahi ngâl u a, mipi hungkhawm tei ding ahih ziekun, bang lawh ding ahi ta die leh?

²³ Zieziekchun, ka gen guol u hin hih mai ah: Thutiem neisa mi li ka kawm u ah a um u a,

²⁴ amau chuh pui inla, kithiensak a bawlnau achun va tel inla, a dangka sen ding cheng u chuh va piek sak ah, tichun, a sam uh met thei ding ahiu hi. Khutichun, mi chengin, mi kama na thu a zak hawu khah thudik ahi puoi tih heu u’ntin, chun, nangmah ngêi le Dan zawp in diktat takin na um zawi tih he ding ahiu hi.

²⁵ Jentel te laka gingchate chungchâng thu vang chuh, milim hona thil nek thu ale, sa thisan nek thu ale, sa heklup nek thu ale, hûk leh kideihchakna thu ale, a kikiengkawih dinguh ahi, ti’n, thupukna ka siem u a, lehkha ka thâk tau kha,” a tiu a.

²⁶ Chun, a zing chun, Paul in pasalte chuh a pui a, amau chu tawh kithiensakna a bawl u a, chun, Pathien Ho-In achun a lut a, a kithiensaknau hun tawp ni ding leh, a bawnu a dinga kithawihna a latna dinguh hun chuh thiempute a hetsak a.

Pathien Ho-In a Paul a matnau

²⁷ Chun, ni sagih a tin ding kuon in, Asia gama Juda mi khenkhat te’n, Paul chuh Pathien Ho-In ah a muu a, mipite chuh a tîlguu a, Paul chuh a man tau a.

²⁸ “Israel mite haw, ei hung panpih un,” ti’n a kiko u a. “Zie pa hi, gamtina vakviel a, Israel mite, Mosi Dante, leh zie Pathien Ho-In hi gensie, mi chengcheng sinsak sek khah ahi. Zielo chun, Pathien Ho-In ahin Grik mite le a lutpih a, zie in thiengtho hi a subuok ahi tai,” a tiu a.

²⁹ (Zie ma chun, khawpi achun Ephesi khuo a um Trophimas chuh a kawmah a muu a, Paul in zie pa chuh Pathien Ho-In a a lutpih a ginchak ziek u a, zie thu chuh gen uh ahi)

³⁰ Khutichun, a khawzang un a phu mul mul zieng tau a, mihaw chuh a taikhawm u a; Paul chuh a man u a, Pathien Ho-In apat a kaidawk tau a. Tichun, kintakin kawt chuh a khâk tau a.

³¹ Mipi’n Paul thah a guot lai u chun, Jerusalem khuo a mi chengcheng a buoi ui tih thu chuh, sepaih lawiupa lienpen kawm a tung ta a.

³² Tichun, amah chun, sepaihte leh, sepaih za lawiupate pui in, a kawm u ah a tai suk pai zieng a; mipite chun, sepaihte tawh hung a muh u chun, Paul a khet u chuh a hai tau a.

³³ Chun, sepaih lawiupa lienpen chuh Paul kawmah a va chieh a, a man a, thikkhau nih buh sak ding thu a pie a. Ziephet chun, “Zie pa hi kuo ahi? Banga a hih siet?” ti’n a dawng a.

³⁴ Mipi laka abang chuh thu khat gen in a kiko u a, khenkhat chuh thu dangin a kiko tau a. Zie tawbanga ngaih buoi na a um vengvung ziek chun, sepaih lawiupa chun le lawh ngaihna a he ta puoh a, a mite kawm achun, kulh sunga Paul puihlut ding thu a pie ta a.

³⁵ Paul chuh kemkai a tun phetin, mipite’n a hah bawl bêk ziek chun, sepaihte chun a dawm kâng zel u a.

³⁶ Mipi cheng chengin, “Sumangthai un,” ti a kiko kawmin a zui hut hut u a.

Paul in a Chungthu a Kigenna

³⁷ Chun, sepaihte’n Paul chuh kulh sunga a puih lut ding kuon u chun, amah chun sepaih lawiupa lienpen kawm achun, “Na kawmah thu kamkhat ka gen thei dem?” a ti a.

³⁸ Sepaih lawiupa chun, “Grik pau na he a ahim? Ma a mipite tîlgua, mihiem phil mang haw sangli gamthip a puidawkpa, Aigupta gama pa khah hilo na him?” a ti a.

³⁹ Paul chun, “Juda mi ka hi a, Kilikia gama Tarsas khuo a pieng ka hi, khawpi pawimawh taka khawpi mi hihna nei ka hi; nei lungsiet inla, mipi chengcheng te kawma hin thu nei gen sak ah,” a ti a.

⁴⁰ Chun, sepaih lawiupa chun lem a sak phet chun, Paul chuh kemkai achun a ding a, mipite chuh thip dingin khut in a vak zap a; chun, a thip huou phet un Hebrai pau in a kawm u ah: