NASEPTE 20 - PATHIEN LEKHABU THIENGTHO (BSI)

Makedonia leh Akaia Gam ah

¹ Chun, husa chuh a thip phetin, Paul in sinsakte haw chuh a sam khawm a, tîlkhohna thu gen in, kampha’n a tha a, Makedonia gama chieh dingin a pawt ta a.

² Tichun, thu tamtak a sinsakte lawi tîlkhoh kawm zelin, zie gam chuh a fang suok a, Grik gam a tung ta a.

³ Chun, taka chuh tha thum a thâm nung in, Suria gam lama kuong a chieh dingin a kiguo a. Judate’n amah a phiel ziekun, Makedonia gama chieh a guo zaw ta a.

⁴ Chun, Beroi a um Purrha chapa Sopata, Thessalonika khuo a um, Aristarkas leh Sekundas te, Derbe khuo a um Gaia te, Timothe te, Asia gama Tukika leh Trophimas te chuh, Asia gam tiengin a chieh u a.

⁵ Ziehaw chuh a na chieh masau a, Troas khuo achun ei na ngak u a.

⁶ Keihaw vang chuh, Chângthâk Chawl sawhloh Kut nung in, Philippi khuo apat kuong in ka pawt u a, ni nga nung chun, Troas khuo a, a kawm u chuh ka tung tau a; tak achun ni sagih ka ni chuong u a.

Paul in Troas a Tawh Tawpna

⁷ Chun, ni sagih ni masapen achun, chângthâk phelsuoh dinga ka um khawm lai un, Paul in a zinga chieh a guot ziekin, a kawm u ah gunchuh takin thu a gen a; zan khang tiengin thu a gen zel ta a.

⁸ Chun, indan chungnung a ka umkhawmnau a chun thaumei tamtak a kide a.

⁹ Chun, a min Eutukas, tangval khat kawtcha bul achun a chu a, a na vuong, a na vuong a. Paul in thu a gen sawt ziek chun, amah chun a ihmutsuok a thuok zo ta puoh a, insawng thumna apat chun a kie tha ta a, a thisa’n a va la dawk tau a.

¹⁰ Himahlele, Paul chuh a kum suk a, a chungah a bawk a, a pawm a, “Lungdawng kiu in, a nuk a tan nai puoi,” a ti a.

¹¹ Tichun, Paul chuh a kalto kit a, chângthâk chuh a phelsuoh a, an a ne a, sawt tak, khawvak tieng hielin a kawm u ah thukhawchang a gen a, zie nung chun a chieh ta a.

¹² Chun, tangval chuh In lam ah dam in a pui u a, nasatak in a lungmuong tau hi.

Troas apat Miletus

¹³ Chun, kei u vang chuh, kuong in ka na kitawl masau a, Paul, kuong a ka lakmalam na dinguh, Assos zuon chun ka kitawl tau a. Zie tak chuh, thingtâng lampi a kenga chieh guo a hih ziekin, khutibanga chuh hih dingin ei hilhsa him ahi.

¹⁴ Tichun, Assos khuo a ei hun phâk phet chun, kuong ah ka chut sak tau a, Mitulini khuo ka tung tau a.

¹⁵ Chun, tak apat chuh kuong in ka kitawl kit u a, a zing chun, Kios tuikuol zawn ka tung u a; chun, a zing kitin, Samos tuikuol ka tung u a; a zing kitin, Miletus khuo ka tung kit tau hi.

¹⁶ Paul chun, Asia gama hun mat sawt a ut loh ziekin, Ephesi khuo chuh kuong a pelh hâm a guo a. A hihtheih chun, Jerusalem a Pentekost ni huom tei guo a hih zieka kinawh kin ahi.

Ephesi a Upate kawma Paul Thuvaithak

¹⁷ Khutichun, Miletus khuo apat chun, Ephesi khuo ah mi a sawl a, sapchuom upahaw chuh a kawmah a sap sak a.

¹⁸ A hung tun phet un, a kawm u ah, “Asia gam ka hun tawh masak pên ni a kipata, na kawm u a ka um sung chenga, ka hun mat dante khah na heu hi.

¹⁹ Judate’n ei phiel ziek u a, ka chunga thil dahum hungtungte thuok kawm a, kingainiem tak leh, mitthitui tamtak luong kawma, Lalpa na ka sep dante khah.

²⁰ Khati khan, a phachuom ding thu, na kawm u ah bangmah suklat ka kitim puoh a, vantâng lak ale, In tin ale, nanguh ka hun sinsak sek kha.

²¹ Judate leh Grikte kawm ale, Pathien lama lunghei thu leh, I Lalpau Isu Krista taksan ding thu ka hun hetsak sek kha.

²² Tuhin, lungthima chieh lo thei lo a ka kihet ziekin, Jerusalem khuo a chieh ding ka hi, zie tak achun ka chungah bang thil a hung tung dem tih vang ka he puoi!

²³ Thagau Thiengtho in, ‘Kânna leh dahumna’n a hun muok hi,’ ti’n, khawpi tin ah kei ei hetsak sek hi, ziehaw mai chuh ka het ahi.

²⁴ Himahlele, kitaihsiekna lampi, ka maban muolsuoh ding leh, Pathien lungsietna Chanchin Pha phuong dinga Lalpa Isu’n nasep ding ei piek chuh sem buting phawt leng, ka hinna le thaklah takin ka ngai puoi.

²⁵ “Chun, nang haw chengcheng, Pathien Lalgam thu gena ka vak, ka vak kawm sek na te hin, ka mel mu kit ta puo’n lau tih ka hêi.

²⁶ Zieziekchun, mi chengcheng thisan ah ka thieng hi tih, tuni hin ka hun hetsak na hiu hi.

²⁷ Pathien thiltup chengcheng a bawnin, na kawm u a suklat ka kitim puoh kha.

²⁸ Pathien sapchuom haw, amah thisan a a châwkte chuh vak dingin, nangmau haw leh na belam hawnteu chung achun chingthei un, Thagau Thiengtho in amau haw enkawl dinga a hun siem na hiu hi.

²⁹ Ka chieh nung leh, ngei hâng haw na laku ah hung lut untin, belam hawn chuh sit puo’n au tih ka hêi.

³⁰ Nangmau haw laka mi ngêi hile, sinsakte haw na kawm u apat puimang dingin zuou a thu chuom gen hung um un lau.

³¹ Zieziekchun, pilvang un, kum thum hiel, sun leh zan a mitthi luong kawmin mitin hilh ka hai puoh kha hezing un.

³² “Tuhin, Pathien venna leh, a lungsietna thu ah ka hun vawpsak na hiu hi, zie chun a hun khanlet sak thei a, Pathien in mi chengcheng dinga vangsakna a neih chule a hun pie thei ahi.

³³ Kuomah dangka le, sana le, silhlechen le ka awtcha ngei puoh kha.

³⁴ Zie ka khut ngêi hin, keimah leh ka guolte sinmawh cheng ka mai dawk sek ahi tih nangmau haw ngêi in na heu kha.

³⁵ Thil cheng chengah, zie tawbanga hi nasa taka nasem in na zuih dingun ka hun tatmuh sek na hiu kha, Lalpa Isu thu hezing kawmin mi hatlote na panpih dinguh ahi; amah ngêi in, ‘Lak sangin piek in lukhawng a nei zawi,’ a tih kha,” a ti a.

³⁶ Chun, khutibang thu chuh a gen zawhin, a khupdin a, a bawn un a paucham pih a.

³⁷ Tichun, a bawn u chun hah kah in a kap u a, a bieng u leh Paul bieng sutuoh in a châwp tuntun u a.

³⁸ A mel a muh kit takloh ding zieu thu a gen chuh a lungkhamna pên uh ahi. Khutichun, amah chuh, kuong tieng chun a va tha tau hi.