NASEPTE 2 - PATHIEN LEKHABU THIENGTHO (BSI)

Thagau Thiengtho Hungtunna

¹ Chun, Pentekost ni a hung tun in, gingtute cheng chuh lungthim mun khat in abawn un mun khat ah a um khawm vek u a.

² Tichun, hatkhat in, van apat in thil gi, huihpi nung guolin a hungtung ta phut a. Zie chun, a chutna In u chuh a hihdim vek ta a.

³ Chun, lei haw chuh mei guola kihawm zak in, a chungu ah a chu ta a.

⁴ A bawn un Thagau Thiengtho in a dim vek tau a, Thagau in a pau sak guol zelin, pau zatchuom in a hung pau tau a.

⁵ Chun, khawvel gam tin apat a hung khawm; Pathien limsak Judate chuh Jerusalem ah a châm u a.

⁶ Tichun, zie gi chuh a zak phet un, mipi a hung kikhawm u a; mitin in, sawlchakte thugen chuh amau pau chieta a na zak ziekun a lungzîng ten tau a.

⁷ Tichun, a bawn u chun a lungkham u a, mak a sa mah mah u a, “En tiem u! zie a paute chengcheng hi Galili gam apat hilo ahiu hi?

⁸ Bangti’n a, I bawn u a, I pienpih pau guola I zak chiet theih uh?

⁹ Abang Parthaite, Medai te, Elam te apat I hiu a; abang Mesopotamia gama umte, Judea gama umte, Kappadokia gama umte, Ponto gama umte, Asia gama umte;

¹⁰ Phrugia gama umte, Pamphulia gama umte, Aigupta gama umte, Kurini khuo kieng vela Libia gama umte, I hiu a. Abang, Rome khuo malzin,

¹¹ Juda te leh a phungkaiteu tawh I hiu a, khenkhat hila, Kret tuikuol leh Arab gama umte I hi ngâl u a, himahlele, Pathien thilhih maktakte a gen hawu, eimau pau chieta I zak chiet ngâl u hih!” a tiu a.

¹² A bawn u chun maksa’n a ngai buoi mah mah u a, “Ziehaw hi bangti dân ahi?” a kitiu a.

¹³ Abang in a nuihsan u a, “Uain thak kham ahiu hi!” a tiu a.

Peter Thugen

¹⁴ Himahlele, Peter chuh sawmlekhatte tawh a ding khawm u a, amah chun ngeih tak in a kawm u ah a gen a, “Nanguh, Judea gama umte, nanguh Jerusalem khuo a um cheng chengte haw, ziehaw hi heu inla, ka thu le ngaiun.

¹⁵ Ziehaw hi na ginchak guol un a kham puou hi, vaihamsang phet ahi hi.

¹⁶ Ziehaw hi thiemgau Joel in a gen khah ahi zawi:

¹⁷ ‘Pathien in, Ni nunung haw achun hiti hi hi’n tin, Mi chengcheng chungah ka thagau sungtha’ng ka ting; Tichun, na chapateu, na chanuteu in ka thu gen un tin uh; Na tangvalteu in kilâkna muu un tin uh, Na teksieteu in mang in mat un tin;

¹⁸ A hii, zie nihaw a chun ka suokpate, ka suoknu te chung ale, Ka thagau sungtha’ng ka ting; ka thu gen un au;

¹⁹ Chun, chunglam van ah thilmak haw, nuoi lam lei ah melchikna haw muhsak ing ka ting; Thisan leh mei leh, meikhu sah tak haw,

²⁰ Nisa chuh hung thim intin, Tha thisan hung suok intin; Lalpa Ni lopitak leh minthang tak chuh a hungtun ma’n,

²¹ Chun, tihi hi’n tin, kuole, Lalpa min sam ta chuh bit un au, a ti ie!’ a tih khah.

²² “Nanguh Israel mite haw, zie thu haw hi zau in! Nazareth Isu, Pathien in amah manga na lak u a thil lopihaw, thilmak haw, melchikna haw a hih ngêi khan, a hun hêtchet sak na hiu hi. Nangmau ngêi in ziehaw khah na he ngâl u a, na lak u a hungtun tâk ziekin.

²³ Amah chuh Pathien lemguot leh hetlawk bangin, a matsak u a, nangun migilote khut in kross ah na khêndên u a, na sulum tau a.

²⁴ Amah chuh Pathien in thihna kânna haw chuh a phel sak a, a kaitho ta a; amah chuh thihna tuk den guol a hih loh ziekin.

²⁵ Chun, David chun a thu a gen a: ‘Ka ma ah kumkhuo’n Lalpa chuh ka mu sek a; Ka lunggim lohna’n ka changlam ah a um hi,

²⁶ Zieziekchun, ka lunggil a lawp a, Ka lei le a kipâk hi. Ka thagau mithi khuo ah nusieh puo’n na tin;

²⁷ Na mi thiengtho thâna a muot mang phal puo’n na tin, Zieziekchun, ka pheh le kinem takin um ina.

²⁸ Nangin hinna lampi le nei kâwkmuh a, Nangin, na mel in kipâkin nei sudim inla,’ ti’n.

²⁹ “Suohpihte haw, ei suonpau David thu hi lau lo in na kawm u ah ka gen thei hi; amah chuh a thi ta a, vuih le a vui tau hi, a thân le tuni chan hin I kawm u ah a um zing nalai hi.

³⁰ Amah chuh thiemgau a hi a, Pathien in amah suona mi, kuo ahim khat chuh, lenga hun chut sak ding ahi tih, kihâksiela a gen chuh a he a.

³¹ David chun, tunung a Pathien in thil a hun hih ding chuh a na mulawk a, tichun, Krista thawhkitna ding thu chuh a gen ta a: ‘Mithi khuo ale nutsieh in a um puoh a; a luong le thân a chun a muot den diek puoi,’ ti’n.

³² Zie Isu chuh Pathien in thihna apat in a kaitho ngêi a, zie thudik hetpihte chuh I bawnchau hin I hiu ui.

³³ Pathien khut changlam ah limbawl in a um ta a, Thagau Thiengtho tiem chuh Pa kawm apat a mu a, na muh u leh, na het u hi a hun sunthak ahi.

³⁴ David vang van ah a kal to puoi, amah ngêi in: ‘Lalpa chun ka Lalpa kawmah, Ka changlam ah chu zing ah;

³⁵ Na melmate na kêngpêk ngak dênna a ka siem masang sieh, a ti ie,’ ti ahi zaw kha.

³⁶ “Khutichun, Isu, na khetdênpau ngêi khah, Pathien in Lal leh Krista hi kawmin a siem tai tih, Israel namtin in he tei u hen,” a ti a.

³⁷ Chun, mipite chun zie thu haw chuh a zak phet un, a lunggil u chuh a kisun a hung bang ta a, Peter leh sawlchak dangte kawm achun, “Suohpihte, bang ka hih ta ding u leh?” a tiu a.

³⁸ Peter chun a kawm u ah, “Na gitloh uh ngaihdam ahih theih na dingin lunghei unla, chun, Isu Krista min in na bawn un baptistma chang chiet un; tichun, Thagau Thiengtho thawna piek hi mu’n lau.

³⁹ Pathien thutiem khah, nang haw leh na chateu ding leh, gamla taka mi chengcheng ding leh, Lalpa I Pathien un a kawma a sap tapohte ding le ahi ngâl a,” a ti a.

⁴⁰ Chun, Peter chun, a kawm u ah thu dang tamtak gen in, a tîlkhoh a, “Tulai khangthak, lungthim manlohte laka hin kivengphau in,” a ti a.

⁴¹ Mi tamtakin a thugen chuh a gingchau a, baptistma a chang u a, zie ni chun mi, sangthum vel behlap in a um tau hi.

⁴² Amau haw chun a hunteu chuh, sawlchakte kawma thu zilna’n a mang u a, kivawp khawm in, chângthâk phelsuoh in, paucham in, phachuomngai takin a um zing u a.

Gingtute Kipawlkhawmna

⁴³ Sawlchakte chun thilmak leh melchikna tamtak a hih u a, tichun, mitin in a lau tau a.

⁴⁴ Gingtute chengcheng chuh kipawlkhawm in a um zing u a, a thil neihteu a kikawp u a.

⁴⁵ A go hawu, a thil neih teu a zuok u a, tichun a dangkateu chuh a sinmawh dungzui zelin a laku ah a hawm chiet sek u a.

⁴⁶ Chun, ni chengin, lungthim munkhat in Pathien Ho-In a chun phachuomngai takin a um sek u a; a In lam hawu ale chângthâk phelsuoh in, lawp tak leh lungkim takin a an uh a ne sek u a.

⁴⁷ Pathien a pakchau a, tichun, mi cheng cheng deihsakna a lawh sek ui. Tichun, hukdama um masa tiem chuh, Lalpa’n nicheng in a kawm u ah a tel sak zel sek hi.