NASEPTE 19 - PATHIEN LEKHABU THIENGTHO (BSI)

Ephesi Khuo a Paul Nasepna

¹ Chun, tihi a hi a, Apollos chuh Korinth khuo a a um kâl in, Paul chun khawsak gam cheng a fang suok zet a, chun, Ephesi khuo chuh a tung ta a. Zie tak achun, sinsakte khenkhat a mu a.

² a kawm u ah, “Na awih tûng lai u khan, Thagau Thiengtho na chang um?” a ti a. Amau chun a kawmah, “Chang lo, Thagau Thiengtho a um hi tih zak le ka za kha puou hi,” a tiu a.

³ Chun, amah chun, “Bang baptistma ahim, na chan u leh?” a ti a. Amau chun, “Johan baptistma,” a tiu a.

⁴ Paul chun, “Johan khan chuh, ‘Ei hun zui ding pa Krista Isu na hun ginchak dinguh ahi,’ ti’n, lungheina baptistma’n mi a baptist sek ahi kha,” a ti a.

⁵ Chun, zie thu chuh a zak phet un, Lalpa Isu min in baptistma a chang tau a.

⁶ Chun, Paul in a chungu ah a khut a nga a, Thagau Thiengtho chuh a chungu ah a hung tung ta a; ziephet chun, pau hetloh bangin thu a gen u a, Pathien thu le a phuongzak tau a.

⁷ A bawn u chun mi sawm le nih vel ahiu hi.

⁸ Chun, Paul chuh kikhawpna In ah a lut sek a, tha thum vel, hâng takin thu a gen a, Pathien Lal gam lampi thu achun mi a hopih a, a thuzawh sek a.

⁹ Himahlele, abang a lochal u a, a awih nawp loh u a, mipite masanga, Lampi chuh a gensiet phet un, Paul chun amau haw chuh a chieh mang san a, sinsak haw chuh a kawmah a pui a; ni chengin Turanas sinsakna In achun mi a niel sek a.

¹⁰ Khutibang ngen chun, kum nih vel a hih a; tichun, Asia gama um chengcheng, Judate leh Grikte’n le, Lalpa thu chuh a zak lawh hiel tau hi.

Skeva chate

¹¹ Chun, Pathien in, Paul khut in thilmak chuong diekte a hihsak sek a.

¹² Khutichun, a sapum apat, khawsa-ul thiekna puon bang, chenthuoh puon bang, damlote kawmah a chawi u a, tichun, a natnateu chuh nawhmang in a um zel ta a, chun, thitha haw le a sung u apat a pawtdawk sek u a.

¹³ Chun, zawnvak a vak, Juda mi kuote ahim in le, “Paul in a thu a tângsappih sek Isu min in ka hun vau na hiu hi,” ti’n, thitha vawpte chungah Lalpa Isu min a lo poh poh sek u a.

¹⁴ Chun, Juda mi, thiempu lien khat, Skeva chun zie tawbang hih sek chuh, chapa sagih a nei a.

¹⁵ Himahleh, thithabuok chun a kawm u ah, “Isu ka he a, Paul le ka hêi, himahleh, nang u hi kuote na hiua ahim?” a tiu a.

¹⁶ Chun, a sunga thitha buok vawppa chuh a chunghawu achun a chawm kai a, a bawn u chun a zo vek ta a, tichun, zie In a kipat chuh, sangawn leh liem in a taidawk tau a.

¹⁷ Khutichun, Ephesi khuo a mite chengcheng, Judate leh Grikte kawm ale, zie thu chuh a kithang ta a; tichun, a bawn u chun a lau tau a, Lalpa Isu chuh, nasa taka chawihsân in a um ta a.

¹⁸ Chun, a lak u a gingcha haw, mi tamtak chule a hung u a, a thilhih hawu thupha a chawi u a, a kiphuong tau a.

¹⁹ Chuleh, mi tamtak, dawi thilhih a na sin sekte chun le, a lehkhabu hawu a hun chawi khawm u a, mi chengcheng mit muhin a hâl tau a, a man a sut u leh, cheng singnga man hi’n a heu hi.

²⁰ Khutibang taka nasa chun Lalpa thu chuh a kithehzak a, a guolzo zel ta a.

Ephesi Khuo a Mipite Buoina

²¹ Chun, ziehaw zawh chun, Paul in, Makedonia gam leh Akaia gam chuh fan suok takdih a, Jerusalem khuo a chieh a lunggulh a, “Zie tak haw chuh ka tawh zawh tieng chu leh, Rome khuo le tawh ing ka,” a ti a.

²² Khutichun, amah kithuohpihte nih, Timothe leh Erastas chuh, Makedonia gam ah a sawl masa zet a, amah vang chuh Asia gam ah a um tadih nalai a.

²³ Chun, zie lai vel chun, Lampi ziek chun mi buoina mai in a buoi ta puou a.

²⁴ Mi khat, a min Demetria, dangkaguo a pathiennu Diana lim siempa chun a nasemte dingin lawkna tamtak a pie sek a.

²⁵ Zie pa chun, amau haw chuh a sam khawm a, mi dang amau sep bang semte chu tawh, tichun, a kawm u ah, “Mite haw, I neihzawh nau hi zie nasepna apat hi ahi tih na heu a.

²⁶ Zie Ephesi khuo mai ahin hilo in, Asia gamsung cheng hiel ale, Paul hin, khut a siem pathien haw hi Pathien ahi puoi, ti’n mi tamtak a thempai a, a zui tau hi tih nangmau ngêi in na muu a na he tau hi.

²⁷ I nasep uh minsiet ding lauh-um chauh hi hilo in, pathien nu lopitak Diana ho-in hile hun ngaihtam lawh un au. Asia gama mi chengcheng leh, khawvel mi’n a ho sek uh hi bangmahlo hung suok ina tih lauh-um ahi,” a ti a.

²⁸ Chun, zie thu chuh mipi’n a zak phet u chun, a lungna mah mah tau a, “Ephesi khuo a Diana hi lopitak ahi!” ti’n a kiko u a.

²⁹ Tichun, khawpi sung chuh a buoi vek tau a. Gaia leh Aristarkas, Makedonia gama mi, Paul nungzuite chuh a man u a, kintakin etnawp bawlna In achun a taihpih tau a.

³⁰ Chun, Paul chuh mipi laka lut a guot leh, sinsakte chun a phal puou a.

³¹ Chun, Asia gam lawiupa pente laka khenkhat chuh Paul guolte ahiu a, a kawmah mi a sawl u a, etnawp In a chuh êngsiekhan a lut lo dingin a va gen sak u a.

³² Khutih lai chun, mipi kipunkhawm haw chuh nasatak in a buoi tau a; mi tamzaw chun, a hung kikhawp lawh pên nasan uh a he puou a, zieziekchun, khenkhat chuh thil khat gen in a kiko u a, abang chuh, thil chuom dang gen in a kiko u a.

³³ Mipi laka khenkhatte chun, Aleksandar hi mawhpuo hi’n a, Judate’n amah chuh mipi malam a a sawtpheih ziekun, a tiu a. Tichun, Aleksandar chun, mipite chuh thip dingin khut in a vak zap a, mi chengcheng te kawma chun, a mawh lohna thu gen a guo ta a.

³⁴ Himahlele, amah chuh Juda mi ahi tih a het phet un, dâkkâl nih sung vel chuh kiguol takin, “Ephesi khuo a Diana hi lopitak ahi!” ti ngen in, a kiko, a kiko tau a.

³⁵ A tâwp chun, khawpi lehkhazikpa chun mipite chuh a suthip zo hâm ta a. “Ephesi khuo a mite haw, Diana lopitak ho-in leh, van apat a milim kie khah, Ephesi khuo a mite hi a veng na hiu hi tih kuo a helo um?

³⁶ Zie thu haw chuh niel guol a hih loh ziekin, na thip kêi dinguh ahi, khawningai lo in bangmah na hih dinguh ei puoi.

³⁷ Zie taka na hun puihteu hile, ho-in suommangte ahi puou a, I pathiennuu gensiete le ahi diek puou hi.

³⁸ Zieziekchun, Demetria leh a guol themthiemte’n le, kuo kawm hileh thukhawk a neih u chun, thukhawk genna In haw chuh hawnsa a puo, hausa thasangte le a um u a, tak achun gen u hen.

³⁹ Thil dang deih nei zaw na hih u chun, dân dungzui in mipi kikhawpna mun ah tan hi’n a.

⁴⁰ Tunia husat ziek hin, mipite ei suohsalh ding lauh-um in I um tau ahi, zie buoina ziek hi gen ding a um puoh a, a ziek kilawm tak gen ding le I nei diek puou hi,” a ti a.

⁴¹ Chun, khutibang thu a gen zawh chun, kikhawm khawm haw chuh a kikhen sak ta a.