NASEPTE 17 - PATHIEN LEKHABU THIENGTHO (BSI)

Thessalonika Khuo a Nasepna

¹ Chun, Amphipolis khuo leh Apollonia khuo a chieh khel u a, Thessalonika khuo a tung tau a, tak achun Judate kikhawpna In a um a.

² Chun, Paul chuh a hihdan ngeina’n, kikhawpna In achun a lut a. Zie tak achun, Chawlhni thumvei, Pathien Lehkha Thu apat in guntaka sut pih in,

³ Krista chuh dahum thuok ding him a hih ziete chuh sulang in a hilhchien sek a, “Zie Isu, a thu nang haw ka hun hilh sek hi, amah hi Krista chuh ahi,” le a ti sek a.

⁴ Chun, a lak u a mi khenkhat chuh thuzawh a um in, Paul leh Silas chuh a pawl tau a; Pathien khawksak Grik mipi nasatak leh, numei lamkai tamtak inle khutibang mah chun a hih tau a.

⁵ Himahlele, Judate’n a mitthîp u a, khawlai a migilo kuote ahim a kawm u ah a pui u a, mipi a sam khawm u a, khawpi sung chuh a chawkbuoi u a; tichun, Jason In chuh a hun huol u a, vantâng kawma puih dawk dingin a hawl u a.

⁶ Chun, a muh loh phet u chun, Jason leh suohpih dang khenkhat chuh khuo a lawiupate kawmah a kailut u a, a kiko u a, “Van nuoi chawkbuoite khah, taka hin le a hung u a,

⁷ Jason hin a In ah a na tunsak viel a; ziehaw chengcheng hi, ‘A min Isu, leng dang a um hi,’ ti’n Kaisar thu kalh in a um sek ui,” a tiu a.

⁸ Tichun, mipite leh, khuo lawiupate chun zie thu haw chuh a vak zak u chun, a buoi tau a;

⁹ tichun, Jason leh mi dangte kawm apat chuh, a thahdawk theihna dingun bang ahim a lau a, a thahdawk tau a.

Beroi Khuo a Nasepna

¹⁰ Chun, suohpihte chun, a zan a zan in Paul leh Silas chuh Beroi khuo ah a sawl dawk tau a. Zie tak a va tun phet u chun, Judate kikhawpna In ah a lut u a.

¹¹ Zie taka mihaw chuh Thessalonika khuo a mite sang chun a na pha zawu a. Khutichun, lungthim kipâk takin thu chuh a pawm u a, a thugen u chuh a dik leh dikloh hetna’n, ni chengin Pathien Lehkhabu ah a hawl sek u a.

¹² Zieziekchun, a lak u a mi tamtakin a gingcha tau a, Grik numei zahum haw leh, pasal haw, mi tamtak inle a gingcha tau hi.

¹³ Himahlele, Thessalonika khuo a Judate chun, Paul in Beroi khuo ah Pathien thu a gen hi tih a het phet un, tak achun le a va chieh u a, mipite a tîlguu a, a subuoi kit tau a.

¹⁴ Khutichun, suohpihte chun, Paul chuh tuisuohgiet pang tienga chieh dingin a sawl dawk pai tau a; Silas leh Timothe vang chuh, tak achun a um zing tau hi.

¹⁵ Chun, Paul thak a chiehte chuh, Athen khuo tiengin a chieh u a, chun, Silas leh Timothe chuh a ma thei lam pena a kawma chiehna ding thu thâk ngâl in a kîkkit tau a.

Athen Khuo a Nasepna

¹⁶ Chun, Paul in Athen khuo a Silas leh Timothe a na ngak lai in, khuo chuh pathien lima dim in a mu a, a lung a vilh mah mah ta a.

¹⁷ Khutichun, kikhawpna In ah, Judate leh, Pathien khawksakte chuh a niel sek a, chuleh, dawlmunte leh mipi chieh khawm taphawtte chuh ni chengin a niel sek a.

¹⁸ Chuleh, Epikuria mi leh Stoik mi laka sinsaktu khenkhat inle amah chuh a hung niel u a. A bangin, “Zie mi kamtam hin banga gen a guot?” a tiu a. A bangin, Isu thu leh thawhkitna thu a gen ziekin, “Gamdang pathiente thu gen pa a hih tuok hi,” a tiu a.

¹⁹ Khutichun, amah chuh a pui u a, Areopagi ah a dinsak u a, a kawmah, “Zie sinsakna thak na gen sek hi nei hetsak thei dem?

²⁰ Na thugen khenkhatte hi, ka na zau a, mak ka sau hi; zieziekchun, a thu umzie te chuh het ka nuom ui,” a tiu a.

²¹ (Athen khuo a mi chengcheng chuh, a khuou a gamdang mi umte chu tawh, a kimankal cheng u leh, thuthak taphawt chuh gen leh ngaitha khawm in a um sek him uh ahi.)

²² Chun, Paul chuh, khawpi vaihawmna, Areopagi masang achun a ding a, a gen a, “Nanguh, Athen khuo a mite haw, bang chengah, nang haw hi sakhuo ngaihsak mi tak na hiu ui tih ka hêi.

²³ Ka khawlai vak kawma na pathien chibainau munte ka et lai in, maichâm khat, a chunga, ‘Hetloh Pathien a ding,’ ti a zik ka mu dawk a. Khutichun, he lo a na chibai sek u khah, zie mawng chuh ka hun hilh na hiu hi.

²⁴ Pathien, khawvel leh a sunga thil chengcheng siempa chuh, lei leh van Lalpa a hih ziekin, khuta sak ina chun a cheng puoh a.

²⁵ Thil tasam guolin, mihiem khuta zenviel inle a um puoh a, amah ngêi chuh thil chengcheng hinna te, hatna te, leh, mitin kawma thil chengcheng piepa ahi zawi.

²⁶ Mi khata kipatin, lei chung chengchenga um dingin, namtin mi a siem a. A dingun hunbi te a guot a, a umnau gi le a zam sak a.

²⁷ Khutia chuh, amah a hawl u a, a mai a mai u a, a muh tei na dingun. Himahleh, Pathien chun eihaw ei gamlat puoh ngâl a.

²⁸ ‘Amah vangin I hing un, I tawi un, I um uh ahi ngâl a,’ ti a a gen guol u khan. Na lak u a laphuok thiemte mah in, ‘Ei u le a suonte I hi ngâl u a,’ ti a a gen guol u khan.

²⁹ Khutichun, Pathien suonte I hih tâk nung un, Pathien hihna chuh, sana, dangka, suong leh, mihiem themthiem leh lemguot a sekte tawbang hi ahim tih I ginchak dinguh ei puoi.

³⁰ Pathien in, mihingte’n amah a het loh lai hunteu chuh kihetmawh sak in, namtin cheng chuh, tuhin, a gitlohnateu apat kihei kitna ding thu a pie tai.

³¹ Khutichun, khawvel pumpi, a mitelte manga vaihawmna dika thu a tan khumna ding chuh a guot ta a. Zie chuh, Pathien in, amah chuh mithi lak apat kaitho in, mi chengcheng kawmah a hetsak tai,” ti’n.

³² Chun, mithi lak apat thawhkitna thu Paul in a gen chuh a zak phet un, a lak u a khenkhat chun a nuihsan u a, himahleh, khenkhat chun, “Zie thu hi na gen ngaitha kit ung kau,” a tiu a.

³³ Tichun, Paul chuh a laku apat a pawtdawk ta a.

³⁴ Himahlele, mi khenkhat chun amah a bel chak kêi tau a, a gingchau a; ziehaw laka abang chuh, Areopagi mi, Dionusias leh, numei khat a min Damaris leh, mi dang khenkhatte tawh ahiu hi.