NASEPTE 16 - PATHIEN LEKHABU THIENGTHO (BSI)

Timothe’n Paul leh Silas a Zuihna

¹ Chun, Paul chuh Derbe khuo leh Lustra khuo achun le a chieh a; zie tak achun amin, Timothe kiti, sinsak khat a um a. A nu chuh gingtu Juda numei ahi a, a pa vang chuh Grik mi ahi.

² Lustra leh Ikonium khuo a suohpih umte chun Timothe chuh a pakcha mah mah u a.

³ Paul in amah chuh a kawma puih dingin a deih a; tichun, a zek a tan sak a. Zie lama Juda umte chun a pa chuh Grik mi ahi tih a het suok kêi ziekun.

⁴ Tichun, khaw tina a chieh kawm zel un, Jerusalem khuo a sawlchakte leh Upate thupukna siem khah zawp dingin suohpihte kawmah a pie zel u a.

⁵ Khutichun, Sapchuomte chuh taksanna achun a hung det zaw deuh deuh tau a, ni chengin a pung deuh deuh tau hi.

Paul in Vaulam thil a Muhna

⁶ Chun, Thagau Thiengtho in Asia gama thugen a khap ziekin Phrugia leh Galati gam chuh a fang suok tau a,

⁷ chun, Musia gam kieng a tun un, Bithunia gama lut a guou a, himahleh, Isu Thagau in a phal puoh ngâl a.

⁸ Khutichun, Musia gam chuh a chieh khel u a; Troas khuo ah a chieh suk tau hi.

⁹ Zie zan chun, Paul in kilâkna thil muh a nei a, zie tak achun mi khat in, “Makedonia gam ah hung kai inla, kei uh ei hung panpih ah,” ti a, hah nget a ngên in a mu a.

¹⁰ Paul in zie chuh a muh zawh zawhin, Makedonia gam achun chieh ka guo zieng tau a. A kawm u a Chanchin Pha gen dingin Pathien in ei sam hi tih ka heu a.

Philippi a Ludia Pienthakna

¹¹ Chun, Troas khuo apat kuong in ka pawt u a, zang takin Samothraki khuo ah ka chieh u a, a zing chun Neapoli khuo ah ka chieh u a.

¹² Zie tak apat chun, Philippi khuo ah ka chieh kit u a, zie khuo chuh Makedonia gama khuo khat ahi a, zie biel achun khaw pawimawh pên ahi a, Rome khuo a pata kipemte khuo ahi. Zie khuo achun ni tam deuh ka châm tau a.

¹³ Chun, Chawlhni’n, kulh kawtkhak pawlam lui pang ah, pauchamna mun hi dinga ka ginchaknau achun ka chieh u a; tak achun ka chuu a, numei hung khawm haw kawm achun thu ka gen tau a.

¹⁴ Chun, a min Ludia, puonsandup zuoknu, Thuatira khuo a um, Pathien ho sek numei khatin ka thugenteu chuh a za a, chun, Paul thugen zawp dingin Lalpa chun a lunggil a hihvak ta a.

¹⁵ Chun, amah leh a inkawte’n baptistma a chan zawh un, “Lalpa taksang takzet hi a nei ngaih u chun, ka In ah hung tung un,” ti’n hah nget in ei ngên a, ei thoh ta a.

Philippi Suongkul Tânna

¹⁶ Chun, tihi ahi a, ni khat chuh, pauchamna muna ka chieh lai un, suok nungak kuo ahim, thitha zawlnei, phunsân thiem khatin ei kituokpih a. Amah chun, a phunsân thiem ziekin a pute chuh sum tamtak a muhsak sek a.

¹⁷ Zie nu chun, Paul leh kei uh ei zui a, “Zie mihaw, hukdamna lampi hun hilhte hi, Chungnung pên Pathien thu-awi ahiu hi,” ti’n a kiko a.

¹⁸ Khutibang chun, ni sawt tak a hih sek a. A tâwp chun, Paul chuh a lungkim ta puoh a, a kihei a, thitha kawm achun, “Isu Krista min in a sung apat pawt ding thu ka hun piek na hi,” a ti a. Chun, khutih lai tak chun a pawt ngâl ta a.

¹⁹ Chun, a pute chun, suok nungak apat a sum muh nau a bei hi tih a het un, Paul leh Silas chuh a man u a, dawl muna lawiupate masangah a kai lut tau a.

²⁰ Tichun, thutante kawmah a pui u a, “Zie mihaw hi Judate ahiu a, ka khuou a subuoi mah mah u a,

²¹ dân bang ahim, ka pawm u leh ka zawp thieng loh hawu a gen sek u a, Rome mi ka hi ngâl u a,” a tiu a.

²² Khutichun, mipite chule sawlchakte lang dingin a hung kipan u a, thutante chun a puonhawu chuh a sahthek sak u a, mawlh a zêp ding thu a pieu a.

²³ Chun, tamtak vei a zêp zawh un, suongkul ah a khum u a, a chingte kawmah, bit taka ven ding a ti chak kêi tau a.

²⁴ Khuti khawpa thu a piek ziek u chun, suongkul vengpa chun dân sungnung ah a khum a, a kenghawu achun thikkawl a buhsak ta a.

²⁵ Himahlele, zânkhang in, Paul leh Silas chuh, Pathien kawmah a paucham u a, la a sau a, suongkul tângte’n a ngaithau a.

²⁶ Tichun, hatkhat in, inling nasatak in a hung lîng a, tichun, suongkul khuom nasan chule a kilîng a. Chun, kawtkhak chengcheng a hung kihawng a, mi tin kawlbuhhaw chuh a hung kiphel vek ta a.

²⁷ Chun, a chingpa ipmu chuh a hung khanglo a, suongkul kawtkhak haw kihawngsa a um chuh a mu a, suongkul lut haw chuh a tai mang ahiu em a ti a, a chemzâm a zuk dawk a, a kisutlup guo ta a.

²⁸ Himahlele, Paul chuh aw ngeih tak in a kiko a, “Bangmah kilawh ki’n, ka bawn un taka hin ka um vek uh a puo!” a ti a.

²⁹ Chun, suongkul vengpa chun, thaumei! a ti a, a chawm lut a, lau a kilîng kawmin, Paul leh Silas masang achun a khupbawk a;

³⁰ tichun, amau chuh a puidawk a. “Pute haw, hukdama um dingin banga ka hih ding?” a ti a.

³¹ Amau chun, “Lalpa Isu gingcha’n la, tichun, hukdam in um inla, nang leh na inkawte tawh,” a tiu a.

³² Tichun, amah kawm leh, a In a um cheng chengte kawm achun Lalpa thu chuh a gen tau a.

³³ Chun, zie zan chun, zie pet mawngmawng chun a pui a, a zêpnau kigawlhhaw chuh a silngim a, chun, amah leh a inkawte cheng chun baptistma a chang tau a.

³⁴ Chun, In ah a pui to a, nek ding a luihsak a, chun, Pathien a ginchak ziek u chun, amah leh a inkawte chengcheng chuh kipahna’n a dim tau hi.

³⁵ Chun, ni a hung suok phetin, thutante chun, “Zie mite khah thahdawk ah,” tiin mimante chuh a sawl u a.

³⁶ Tichun, suongkul vengpa chun, Paul kawmah a thuu chuh a hilh a, “Thutan te chun nanguh thahdawk dingin mi a hun sawl uh ahi; zieziekchun, tuhin hung pawt un la, lungmuong takin chieh un,” a ti a.

³⁷ Himahlele, Paul chun a kawm u ah, “Rome mi ka hi ngâl u a, ka mawh u leh, ka mawh loh uh he lo in, vantâng mitmuh in ei zêp u a, suongkul ah ei khum u a; tuhin, a gûka sawl mang ei guou ahi maw? Hithei naisai puo’n a, amau haw mawng hung u hen la, ei hung puidawk u hen,” a ti a.

³⁸ Khutichun, mimante chun, zie thu haw chuh thutante kawm achun a tut kit u a.

³⁹ Tichun, Rome mi ahiu hi tih a zak phet u chun, a lau tau a; chun, a va chieh u a, hah thep in a va thêm u a, a puidawk u a, khuo apat chieh mang dingin a ngên tau a.

⁴⁰ Tichun, suongkul apat chuh a pawt u a, Ludia In achun a lut u a, chun suohpihte chuh a muu a, a thamuon u a, a pawtdawk tau hi.