NASEPTE 15 - PATHIEN LEKHABU THIENGTHO (BSI)

Jerusalem Khawmpi

¹ Chun, mi kuote ahim, Judai gam apat Antiokei khuo ah a hung u a, “Mosi dân guola zek na tan loh u chun, hukdam hi thei puo’n lau,” ti’n suohpihte chuh a sinsak u a.

² Zie thu achun, Paul leh Barnabas chuh amau haw tawh a kiniel lawh u a, a kilân chak kêi ziekun, Paul leh Barnabas chuh, Antiokei khuo a mi khenkhat chu tawh, zie thu buoi zieka chuh, Jerusalem khuo a sawlchakte leh upate kawma va chieh dingin a guot tau a.

³ Khutichun, sapchuomte chun a va thau a, amau chun Pathien lama Jentel te lunghei kit zie thu chuh a gen zel u a, Phoinikia gam leh Samari gam a fang suok tau a; zie chun suohpihte chengcheng a sukipak mah mah tau hi.

⁴ Chun, Jerusalem khuo a va tun u chun, sapchuomte, sawlchakte, leh upate chun a na lawp u a, tichun, Pathien in amau haw manga thil a hih chengcheng chuh a gen u a.

⁵ Himahlele, Pharisai pawl a mi, khenkhat a kipan u a, “Jentel te chun zek a tan ding ahi, Mosi dân zawp le a kawm u a tiem khel khel ding ahi,” a tiu a.

⁶ Tichun, sawlchakte leh upa haw chuh zie thu ngaihtuoh ding chun a kikhawm u a.

⁷ Chun, hah niel a a kiniel nung un, Peter a kipan a, a kawm u ah; “Suohpihte, Jentel te’n kei kama kipata Chanchin Pha thu a zak u a, a ginchak theihna dingun, Pathien in maa na lak u apat ei guot zie khah na heu hi.

⁸ Chun, Pathien, mitin lunggil he pa chun, ei uh ei piek guol khan, Thagau Thiengtho chuh amau haw kawm ale pien, a chungu ah a kipâk hi tih a hetsak a.

⁹ Chuleh, ei u leh amau khenchuom neilo in, a taksan ziekun a gitlohnateu a ngaidam a.

¹⁰ Khutichun, ei uh ei suonteu leh, eihawn le I zawh tâk loh uh puokgik khah, tuhin sinsakte chunga ngak guon, bang zieka Pathien chuh na niel kalh u a?

¹¹ Amau haw ginchak guol mah hin, eihaw le, Lalpa Isu lungsietna vanga hukdam hi dingin I kigingcha ngâl u a,” a ti a.

¹² Tichun, mi chengcheng chuh a thip kêi tau a, Barnabas leh Paul in, Pathien in amau manga Jentel te laka melchikna leh thilmak a hih thute a gen sung cheng u chuh a ngaithau a.

¹³ Chun, a gen zawh phet un Jakob in a gen a: “Suohpihte haw, ka thu ngaithau in!

¹⁴ Pathien in amah min pu dingin, a lak uh apat mi haw ladawk dingin Jentel te a veh tûng zie thu chuh Simeon hin a na gen ta a.

¹⁵ Zie thu haw chu tawh thiemgaute thugen haw chuh a kituok hi, tih zik guol khan:

¹⁶ “Ziehaw zawh chu leh kîkkit ing ka ting, David bâwkcha chim khah sapha kit ing ka, A sietna cheng le siempha kit ing ka;

¹⁷ Mi dang, Jentel chengcheng, ka min sam haw chun, Lalpa a hawlna dingun zie bâwkcha chuh tungding ing ka, ti’n,

¹⁸ Sawta kipan ta, ziehaw chengcheng hetsak sek pa Lalpa chun a tii,” tih zik ahi.

¹⁹ “Zieziekchun, Jentel te laka Pathien lam hun ngate chuh I sukbuoi loh dinguh ahi.

²⁰ Milim hona, thil buok nek bang, kideihchak bang, sa heklup nek bang, sa thisan nek bang haihna dingin, a kawm u a lehkha thâk zaw leuhing ka tih ahi.

²¹ Malaia kipatin, Chawlhni cheng leh, kikhawpna In ah Mosi dân kha sim ahi sek a, khawpi tin ale a thu chuh tângsappih ahi sek kha,” a ti a.

Jentel Gingtute kawma Lehkhathâk

²² Chun, sawlchakte, upate, sapchuom chengcheng chu tawh kigawm in, a lak u a mi tel a dawk u a, Paul leh Barnabas chu tawh Antiokei khuo a sawl pha a sau a. A telteu min chuh, Juda (Barsabas a tih uh) leh Silas a hiu a, ziete chuh suohpihte laka lawiupa deuh te ahiu hi.

²³ Chun, zie tawbang hin a zik u a, a khut u ah a thâk tau a: “Sawlchakte leh suohpihte laka upate’n, Antiokei khuote, Suria gamte leh Kilikia gama Jentel suohpih umte a hun chibai ui.

²⁴ Ka lawi lak u a mi, kuote ahim in, thu gen in a hun subuoi un, na lungthim uh a gim ten hi tih ka zau hi, a kawm u ah thu bangmah ka pie puoh ngâl u a.

²⁵ Zieziekchun, thukhat kisa a ka kikhawp un, ka deih tak uh Barnabas leh Paul,

²⁶ Lalpa Isu Krista min zieka thih ngamte hung pêt hin, mi telte na kawm u a hun sawl pha ka sau hi.

²⁷ Khutichun, Juda leh Silas hi ka hun sawl uh ahi, amau hin, zie thu haw mah hih kam in hun hilh un au.

²⁸ Thagau Thiengtho leh kei hawn, zie thu pawimawh cheng tihloh ahin, puokgik dang na chungu ah nga dah leuhing pha ka sau hi:

²⁹ milim hona sa nek te, sa thisan nek te, sa heklup nek te, hûk leh kideihchak haw hi haihsan leu chin ka tiu hi; ziehaw hi na haihsan u chun, nang u dingin pha’na. Dam takin um un” tiin.

³⁰ Khutichun, sawlchakte chuh a sawl dawk tau a, a chieh u a, Antiokei khuo a tung suk u a; chun, mipi chuh a sam khawm u a, lehkha chuh a pieu a.

³¹ A sim zawh u chun, tîlkhohna thu ziek chun a kipâk mah mah tau hi.

³² Chun, Juda leh Silas chuh thiemgau mah ahiu a, thu tamtakin suohpihte chuh a lungmuon u a, a hihdet tau a.

³³ Chun, taka chuh sawt deuh a um nung un, amau haw sawlte kawma dingin, suohpihte chun lungmuong takin a pawtsak kit tau a.

³⁴ Silas chun taka a um zing chuh pha a sa a.

³⁵ Paul leh Barnabas vang chuh, Antiokei khuo achun Lalpa thu sinsak leh gen in, mi dang tamtak tawh a um zing tau a.

Missionary Khuolzin Nihvei na

³⁶ Chun, ni bang zat ahim nung chun, Paul in Barnabas kawmah, “Tuhin, chieh kit hiting un, khaw tina Lalpa thu I genna chenguh a suohpih umte veh kawm zel u hengla, a umdan uh en hitiu,” a ti a.

³⁷ Chun, Barnabas chun Johan (Mark a tih uh chuh) a kawmah puih a guo a, Paul chun amah chuh a kawm u a puih pha a sa puoh a,

³⁸ Pamphulia gama amau haw taihsana, a nasepnaua a tâwp tienga a umpih loh zieka khah Paul in a kawm u a puih pha a sak loh ahi.

³⁹ Tichun, nasatak in a kiniel tau a, khutichun, a kikhen u a, Barnabas chun Mark chuh a kawmah a pui a, Kupra tuikuol lam ah kuong in a chieh tau hi.

⁴⁰ Paul chun Silas a tel a, suohpihte’n Lalpa lungsietna a vawpsak zawh un, a chiehdawk ta a.

⁴¹ Tichun, sapchuom haw chuh hihdet kawm zelin, Suria gam leh Kilikia gam chuh a fang suok tau hi.