NASEPTE 14 - PATHIEN LEKHABU THIENGTHO (BSI)

Ikonium Khuo a Nasepna

¹ Chun, Ikonium khuo achun, Paul leh Barnabas chuh Judate kikhawpna In achun a lut khawm u a, thu a gen sek u a; khutichun, Judate leh Grik tamtak inle a gingcha tau a.

² Himahlele, awi nuom lo Judate chun, Jentel te chuh, a lunggil u a suohpihte haw dingin a tîlguu a.

³ Zieziekchun, Lalpa chanchin hangsan taka gen in tak achun sawt deuh a um u a, amah chun, a lungsiet thu a gen hawu chuh, a dik ahi tih hetsakna dingin, a khut u ah melchikna leh thilmak a hih sak sek a.

⁴ Khutichun, khuo a mite chuh a kilangseh tau a, abang in Judate chuh a panpih u a, a bangin, sawlchakte chuh a panpih tau a.

⁵ Chun, Jentel te leh Judate chuh, a lawiupateu tawh pangkhawm in, sawlchakte chuh zahhuoi taka bawla, suong a seh a guo tau a.

⁶ Zie chuh, sawlchakte chun a het phet un, Lustra leh Lukaonia a Derbe khawpi leh, a gam kimvel khuo haw achun a taimang tau a.

⁷ Zie tak haw achun Chanchin Pha a gen zel tau a.

Lustra leh Derbe Khuo a Nasepna

⁸ Chun, Lustra achun, mi khat, a pientûng apat kêngbâi, kenga chieh khalo hiel a um a.

⁹ Zie pa chun Paul thugen a ngaitha sek a. Paul chun amah chuh a en zing a, damna dingin taksanna a nei hi tih a he a,

¹⁰ Aw ngeih tak in, “Na keng in ding zang ah!” a ti a. Tichun, amah chuh a chawm tho a, keng in a chieh ta a.

¹¹ Chun, mipite’n Paul thilhih chuh a muh phet un, Lukaonia pau in, ngeih takin, “Pathien haw chuh mihiem guolin I lak u a hung suk ahi ta hi!” a tiu a.

¹² Tichun, Barnabas chuh, “Jupiter” a sau a, Paul chuh thugen zaw a hih ziekin, “Merkuria” a sau a.

¹³ Chun, khawpi daikieng a Jupiter ho-in thiempu chun, bâwngchal haw leh pakcha khivuihaw, kawtpi bul ah a hun chawi a, mipite chu tawh amau nih kawma kithawihna dingin thah a guo tau a.

¹⁴ Himahlele, sawlchak Barnabas leh Paul chun, zie chuh a zak phet un, a puon uh a bawtthêk u a, mipi lak achun a tai lut u a,

¹⁵ “Pute haw, ziehaw hi bang dinga hih? Kei u le, na nungchang bang uh pu mihiem ka hiu a puo! Zie thil manloh haw hi nungngat a, van te, lei te, tuisuohgiet te leh, a sunga um chengcheng tawh siempa, Pathien Hing lam na hung ngat theihna dingun, Chanchin Pha ka hun tut na hiu hi.

¹⁶ Amah chun, malai in, namtin, amau lampi chiet hawh a phalsak seka;

¹⁷ Himahleh, amah chuh kihetsakna um lo in a um puoi; thilpha hihin, van apat guohtui haw leh, kum phat kum bang a hun pie sek a; nek ding hun pie’n, na lunggil uh kipahna’n a hun hihdim sak sek hi,” a tiu a.

¹⁸ Khutichun, zie thu haw chun, mipite’n amau hona dinga gan a thah ding u chuh a dal zo hâm hâm tau a.

¹⁹ Himahleh, Pisdia gama Antiokei leh Ikonium apat Judate khenkhat, tak achun a hung u a, mipite chuh a thempai u a, tichun, Paul chuh suongin a sep u a, thi dinga a ginchak ziekun, khuo a kipat chuh a kaidawk tau a.

²⁰ Himahlele, sinsakte haw chuh, a vela a din pet un a hung tho dawk a, khuo achun a lut kit ta a. A zing kit chun, Barnabas tawh Derbe khuo achun a chieh tau hi.

Antiokei a a Vaihkitnau

²¹ Chun, Paul leh Barnabas chun, Derbe khuo a chun Chanchin Pha a gen u a, sinsak tamtak a siem beh tau a. Zie zawh chun. Lustra khuo te, Ikonium khuo te leh Pisdia gama Antiokei khuo lam achun a kîkkit tau a.

²² “Dahum tamtak thuokin, Pathien gam ah I lut ding him uh ahi,” ti’n, sinsakte haw lungthim a sudet u a, taksanna a chuh um zing dingin a tîl zel u a.

²³ Chun, sapchuom pawl tin achun a upa dinguh a guot sak zel u a, an ngawl kawma a paucham zawh un, a ginchak uh Lalpa kawm achun a vawpsak sek u a.

²⁴ Chun, Pisdia gam chuh a fang suok u a, Pamphulia gam a tung tau a.

²⁵ Tichun, Perga khuo a thu a gen zawh un, Attalia khuo ah a chieh u a,

²⁶ tak apat chuh kuong in a pawt u a, Antiokei khuo chuh a hung tung kit tau a; zie mun chuh a thilhih zawh taksau chuh hih dinga, suohpihte’n Pathien lungsietna vawpsaka a kipat dawknau khah ahi.

²⁷ Tichun, Antiokei khuo a tun nung u chun, Sapchuom mipite chuh a sam khawm u a, Pathien in amau haw manga thil a hih cheng chengte leh, Jentel te dinga taksanna kawt a hawn sak ziehaw chuh a gen u a.

²⁸ Chun, sinsak haw kawm achun sawt tak a um tau hi.