NASEPTE 13 - PATHIEN LEKHABU THIENGTHO (BSI)

Missionary Khuolzin Khatveina

¹ Chun, Antiokei khuo a Sapchuom umte haw lak achun thiemgau leh mi sinsakte a um u a; ziehaw chuh: Barnabas te, Sumeon Niger a tih teu, (Niger chuh “Vawm” tihna ahi) Kurini khuo a um Lukias te, leng Herod vaihawmna ina mi khat Manaen te, leh Saul ahiu hi.

² Lalpa a zenviel u a, an a ngawlh lai un, Thagau Thiengtho in, “Barnabas leh Saul hi, ka sap lawh pên hih dingin ei guot chuom sak un,” a ti a.

³ Khutichun, an a ngawlh u a, a paucham zawh un, a chungu ah khut a ngau a, a sawl dawk tau a.

Kupra Tuikuol Tawhna

⁴ Khutichun, Thagau Thiengtho sawl dawkin a chieh u a, Selukai khuo ah a chieh suk u a, tak apat chuh Kupra tuikuol ah kuong in a chieh u a.

⁵ Chun, Salamis khuo a a um lai un, Judate kikhawpna Inhaw ah Pathien thu a gen sek u a; Johan-Mark a tihpau khale amau kithuohpih dingin a pui u a.

⁶ Tichun, tuikuol chuh, Paphos khaw tiengin a fang suok u a, dawithiem, thiemgau lêm, Juda mi khat a muu a, a min chuh Bar-Isu ahi.

⁷ Zie pa chuh, tuikuol gam vaipawpa, Sergius Paul, mipil tak thasang ahi. Zie pa chun Barnabas leh Saul chuh a sama, Pathien thu zak a guo a.

⁸ Himahleh, Elimas, dawithiem, (ziehi Grik pau a a min chuh ahi), zie pa chun leng thasangpa chuh ginchak loh sak guo’n, amau chuh a na dodal a.

⁹ Khutichun, Saul, (Paul a sak mah u chuh), Thagau Thiengtho in a dim a, amah chuh a en chang kei a,

¹⁰ “Nang, mi lepbawlna diklo leh zakdah-um tin chenga dim pa! nang Diabol chapa! nang diktat tin cheng ma chuom pa, Lalpa lampi diktak haw hi suksiet hai lo ding maw?

¹¹ He ta’n, tuhin, Lalpa khut na chungah a um ahi hi, na mit hung dûk intin, khaw eng mu tadih puo’n la,” a ti a. Tichun, meibuol leh thimna’n amah a bawh ngâl ta a, khuta kai ding hawl in a vak a vak ta a.

¹² Chun, leng thasangpa chun zie thilhih chuh a mu a, Lalpa sinsak thu chuh mak a sa mah mah a, a gingcha ta a.

Antiokei leh Pisdia gam Fanna

¹³ Chun, Paul chuh a lawite chu tawh, Paphos khuo a kipat chun, kuong in a chieh u a, Pamphulia gama Perga khuo a tung u a; chun, Johan khan amau chuh a taihsan a, Jerusalem ah a kîkkit ta a.

¹⁴ Himahlele, amau haw chuh Perga khuo apat a chieh zel u a, Pisdia gama Antiokei khuo a tung u a, chun, Chawlhni’n kikhawpna In ah a lut u a, a chuu a.

¹⁵ Chun, Mosi Dan Lehkhabu leh Thiemgaute Lehkhabu a sim zawh un, kikhawpna In lawiupate’n a kawm u ah mi a sawl u a, “Suohpihte, mihaw tîlkhohna ding thu bang ahim na neih u chun gen un,” a tiu a.

¹⁶ Ziephet chun, Paul a ding dawk a, khut in a zap a, a gen ta a: “Israel mite leh Pathien laute haw, ngaithau in!

¹⁷ Zie Israel Pathien hin, ei uh ei suonte a tel a, Aigupta gama a tham lai u khan nam lopi takin a siem a; a khut thilhih thei tak chun tak apat chun a puidawk ta a.

¹⁸ Chun, kum sawmli sung chuh thalek gam akhan a enkawl zing a.

¹⁹ Kanaan gama nam sagihte chuh sumangthai in, a gam chuh luoh dingin a pie ta a.

²⁰ Zie hun sung cheng chuh, kum zali leh kum sawmnga a lut hi. “Ziehaw nung chun, vaihawmte a pie sek a, thiemgau Samuel tieng khan.

²¹ Chun, leng a hun nget phet u khan, Pathien in, Benjamin nam a mi, Kish chapa Saul khah kum sawmli sunga dingin, a leng dingun a pie ta a.

²² Chun, amah chuh a haihsak nung khan, a leng dingun David a siem ta a; Pathien in zie thu ding chuh hetsak in, ‘Ka deih guol cheng hih ding mi, ka lungthim bang pu, David, Jessai chapa ka mu tai,’ a ti a.

²³ Zie David suonte laka chun, Pathien in a thutiem bangin, Israel haw kawmah Hukdampa Isu a hun pie tai.

²⁴ Amah chuh a hung ma’n, Johan in lungheina baptistma thu, Israel mi chengcheng kawmah a na gen a.

²⁵ Chun, Johan in nasep a zawh ding kuon lam khan, mipite kawmah, ‘Nangun kuo ahi nei tiu a? Amah chuh ka hi puoi. Himahlele, ngaitiem u! ka nung ah mi kuo ahim hung ding ahi, kei hi chu vang, a kengtawbek sut hawi le ka hi puoi,’ a ti a.

²⁶ “Suohpihte haw, Abraham suonpa chate haw, na lak u a Pathien ging chengcheng te haw, eimau haw kawma hin zie hukdamna thu haw hi I hun thâk dawk uh ahi hi.

²⁷ Jerusalem khuo a umte’n a lawiupateu tawh, amah chuh a het ziek u leh, thiemgaute thu, chawlhni chenga a sim sek u khah a het diek loh ziekun, amah chuh mawh chansak in, a chungchâng thu kigen chuh a muolsuoh tau a.

²⁸ A thihna khawp hiel, a chunga bangmah a muh loh nasan un le, Pilate kawmah, thah dingin a ngên nalai u a.

²⁹ Chun, a chungchâng thu, thiemgaute’n a zik lawk chengcheng u khah a muolsuoh zawhin, kross apat chuh a la thau a, thân ah a siel tau a.

³⁰ Himahlele, Pathien in mithi lak apat a kaitho kit ta a;,

³¹ tichun, Galili gam apat Jerusalem khuo a amah tawh va chiehte kawm achun, ni sawttak sung chuh a kilak sek a. Ziete haw chuh tuhin, mite kawma thu hetpihte ahi tau hi.

³² Kei un le ei suonteu kawma thutiem khah a chanchin kipah-um ka hun tut na hiu hi:

³³ Khati a Pathien in Isu a kaihthawh khan I chateu kawm ahin ziehaw chuh a hun muolsuoh ahii. Sam nihna ah: ‘Ka Chapa na hi; tuni hin ka hun hin na hi,’ tih zik guol khan.

³⁴ Muotna muna chieh kit lo dinga, Pathien in amah chuh mithi lak apat a kaihthawh ding zie thu chuh hiti hin a gen: ‘David kawma vangsakna thiengtho leh thawnlo ka tiem khah, nangmah hun pie’ng ka,’ ti’n.

³⁵ Zieziekchun, La dang ale, ‘Na Mi Thiengtho chuh muot mang phal puo’n la,’ le a ti a.

³⁶ David vang, Pathien vaihawm sak guolin, a khan guolpihte a zenviel zawh khan, a thi ta a, amah hun suonte kawmah a siel u a, a muot mang ta ahi.

³⁷ Himahleh, Pathien in a kaihthawhte vang chuh a muot mang puou hi.

³⁸ Khutichun, suohpihte haw, heu in, Isu vang chun gitloh ngaihdamna thu na kawm u a a gen ahi;

³⁹ kuole, a gingcha ta, bang chengah thiemchan sak in a um ui, ziehaw achun Mosi dân in thiemchan sak in na um thei puou hi.

⁴⁰ Zieziekchun, chingthei un, khutilochun thiemgaute lehkhabu a a gen u khah na chungu ah hung tung kha’na:

⁴¹ ‘Mi musitte haw, en un, Mak sau inla, beimang un; Na damsung un thil khat ka hih a, Zie chuh mi’n hun hilh mahleu le, Gingcha hiel puo’n lau, tih khah!’” a ti a.

⁴² Chun, a chiehdawk phet un, Chawlhni kita zie thu haw chuh gen kit dingin a ngên u a.

⁴³ Chun, kikhawmte chuh a kikhen phet un, Judate tamtak leh, Jentel, Juda a kipiete chun Paul leh Barnabas chuh a zui u a;, amau chun a na hopih u a, Pathien lungsietna a chuh um zing dingin a tîl u a.

⁴⁴ Chun, a zing kit chun, a khawzang un, Pathien thu ngaitha dingin a hung kikhawm u a.

⁴⁵ Himahlele, Judate’n mipite chuh a muh phet un, a mitthîp mah mah tau a; Paul thugen chuh a nielkalh u a, a zehawt ten tau a.

⁴⁶ Chun, Paul leh Barnabas chun hangsan takin a gen dawk u a, “Pathien thu hi nangmau haw kawma gen masak ding him ahi; himahlele, na nawlh kit u a, kumkhuo a hing hâwi lo a na guot tâk nung un, heu in, Jentel te lam nga tang kau.

⁴⁷ Zie tawbanga hi Lalpa’n thu ei piek ka hiu hi: ‘Jentel te vak sak dinga ka guot na hiu hi, Khutia chuh khawvel pumpi hukdama a um theihna dingin,’ tih zik guol khan,” a tiu a.

⁴⁸ Chun, Jentel te chun zie thu haw chuh a zak un, a kipâk u a, Pathien thu a limbawl u a, tichun, kumkhuo a hing dinga tel a um cheng chuh, gingtu a hung hi tau hi.

⁴⁹ Tichun, Lalpa thu chuh zie gam kimvel chenga chun a hung dalh zâk ta a.

⁵⁰ Himahlele, Judate chun numei zahum, Pathien khawksate leh, khuo a upahaw chuh a tîlguu a, Paul leh Barnabas chuh a bawlsiet sak u a, a gam u apat a nawhdawk tau a.

⁵¹ Ziephet chun, sawlchakte chun, a chungu ah, a kêngpêk u a leivui chuh a tatthau a, Ikonium khuo tiengin a chieh tau a.

⁵² Chun, sinsakte chuh kipakna leh, Thagau Thiengtho in a dim tau hi.