NASEPTE 12 - PATHIEN LEKHABU THIENGTHO (BSI)

Sukgimtheihna, Peter Matna

¹ Chun, zie hun lai vel chun, Leng Herod in Sapchuom laka mi khenkhatte chuh sukgimtheih guon a khut a tha ta a.

² Chun, Jakob, Johan suohpih chuh, chemzâm in a satlum a.

³ Zie chun, Judate a sukipak hi tih a het in, Peter chule mat a guo kit zel a. (Zie chuh, Chângthâk Chawl sawhloh Kut hun lai ahi.)

⁴ Chun, Peter a mat nung chun suongkul ah a khum a, sepaih lawi li, li zelin a ven sak a, Chiehkân Kut zawh a, mi chengcheng kawma puih dawk ding a guo a.

⁵ Zieziekchun, Peter chuh suongkul achun a kawih tadih a, himahleh, Sapchuom haw’n amah dingin phachuomngai takin a paucham sak sek u a.

Peter Suohchakna

⁶ Chun, Herod chun a puih dawk ding ni, zie zan tak chun, Peter chuh sepaih nih kikal ah, thikkhau nih but in, a ipmu a; a chingte le kawtkhak bula um in, suongkul chuh a veng u a.

⁷ Chun, ngaitie! Lalpa vânsâwlchâk khat a kieng ah a hung ding a, suongkul achun vak bang ahim a hung vak a; chun, Peter chuh a liengko a tu’n, a hun phawng halh a, “Hung tho vak ah!” a ti a. Tichun, thakhat in, thikkhau haw chuh a khut apat a kie tha ta a.

⁸ Ziephet chun, vânsâwlchâk chun a kawmah, “Na puon silh pha’n la, na kengtawbek but inla ei zui ah,” a ti a.

⁹ Tichun, Peter chuh a pawt dawka, a zui ta a; vânsâwlchâk thilhih chuh a tak ahi tih a he puoh a, mang lama a muh ahim, a ti zaw a.

¹⁰ Chun, a chingte tuoh masak leh a bana te a khel nung u chun, pawlama pawtna ding thik kawtkhak chuh a va tung u a, zie chuh amau dingin a kihawng kawm ta a; tichun, a pawt u a, kawtthêl khat a khel u a, chun, vânsâwlchâk chun a taihsan pai ta a.

¹¹ Chun, Peter chun a halh phetin, “Lalpa’n a vânsâwlchâk a sawl dawk a, Herod khuta um leh, Juda mite kinepna chengcheng apat ei hukdawk tai tih tuhin, dik takin ka he tai,” a ti a.

¹² A umdan a hung kihetdawk phet chun, Johan-Mark nu, Mari In achun a va chieh a; tak achun mi tamtak, paucham in a na um khawm u a.

¹³ Chun, Peter chun sumphung kawtkhak a kiuh phetin, suok nungak khat, a min Rhoda chuh a dawng dingin a va chieh a.

¹⁴ Chun Peter aw a zak phetin, a kipâk ziekin kawt chuh hawng lo in a tailut kit zaw ta a, “Kawtkhak bul ah Peter a ding hi” tih a va hilh ta a.

¹⁵ Himahlele, amau chun a kawmah, “A ngawl na hi ta hi!” a na tiu a. Amah chulah, “A tak tak ahi,” ti’n a pang chak kêi a. Ziephet chun, amau chun, “A vânsâwlchâk ahi chuh,” a tiu a.

¹⁶ Himahleh, Peter chun a kiu zing a; chun, a vak hawn u chun, amah chuh a muu a, mak a sa mah mah tau a.

¹⁷ Khutichun, amah chun a thipna dingun khut in a zap a, thamuong takin um un, ti’n, Pathien in suongkul apat amah a puihdawk dante chuh a hilh ta a. Chun, “Zie thu haw hi Jakob suohpihte va hilh un,” a ti a. Tichun, a pawtdawk a, mun chuom ah a chieh ta a.

¹⁸ Chun, zingkal a hung hih phetin, sepaihte chuh, “Peter khawia um ahi ta’m?” ti’n buoi atih cha’n a buoi tau a.

¹⁹ Chun, Herod chun a hawl a, himahleh, a mu puoh a, a vengte chuh a suohsalh a, amau haw thah dingin thu a pie ta a. Zie zawh chun, Herod chuh Judai gam apat Kaisari khuo ah a va chieh a, tak achun a um zing ta a.

Herod Thihna

²⁰ Chun, Herod chuh Tura leh Sidon khuo a mite chung achun a lungkim puoh mah mah a; amau haw chun, Blasta kiti, leng zâlkhun vengpa chuh a panpih dingin a kichiel u a. Tichun, thu khat kisa’n, Herod kawmah a hung u a, a khuou chuh, leng khaw lama pûk chaw sek a hih ziekun, kichamna ding a ngên u a.

²¹ Chun, a ni tiem ni’n, Herod chun a leng puon a silh a, lalchutphah ah a chu a, kamthiem takin a kawm u ah thu a gen a.

²² Chun, mi chengcheng chun, “Pathien aw ahi hi, mihiem aw ei puoi,” tiin a kiko u a.

²³ Chun, Herod chun, Pathien kawma limbawlna a piek loh ziekin, Lalpa vânsâwlchâk in phulo-halo in a man a, hût in a ne a, a thi ta a.

²⁴ Zielai chun Pathien thu chuh a dalh a, a pung zel ta a.

²⁵ Chun, Barnabas leh Saul chun zenvielna chuh a bawl zawh phet un, Jerusalem khuo apat chuh a kîkkit tau a, Johan-Mark a tihpau chuh a kawm u ah a pui u a.