NASEPTE 10 - PATHIEN LEKHABU THIENGTHO (BSI)

Peter leh Kornelias

¹ Chun, Kaisari khuo ah a min, Kornelias kiti mi khat a um a; “Itali pawl” a tih uh, zie pawl a sepaih za lawiupa chuh ahi.

² Pathien khawksak mi ahi a, amah leh a inkawte chuh Pathien lau mi ahiu hi. Mi gimtheite kawmah thil tamtak a pie sek a, Pathien kawmah a paucham zing sek hi.

³ Zie pa chun, vaimim huon phat velin, vaulam in kichien takin, Pathien vânsâwlchâk khat a kawma lut a, “Kornelias,” ti a sam in a mu a.

⁴ Kornelias chun amah chuh lau takin a en a, “Lalpa, bang ahi?” a ti a. Amah chun a kawmah, “Na pauchamna haw leh na thilpiek thu haw khah, hetzing dingin Pathien ma ah a tung to ta a.

⁵ Tuhin, Joppa khuo ah mi sawl inla, mi khat, Simon, Peter a tihpau chuh va puih sak ah;

⁶ Savun siempa, Simon kawma tung ahi, a In chuh tuisuohgiet panga um ahi,” a ti a.

⁷ Chun, vânsâwlchâk, amah hopih chuh a chieh phetin, Kornelias chun a suokte laka mi nih leh, amah zenviel zingte laka Pathien khawksak sepaih khat a sama.

⁸ Thu chengcheng chuh a kawm u a a zak sak zawhin, Joppa khuo achun a sawl ta a.

⁹ Chun, a zinga a chieh lai u a, Joppa khuo kieng a tun ding kuon un, Peter chuh paucham dingin, sun an nêk phat velin, In chungah a kal to a.

¹⁰ Chun, a gil a hung kiel ta a, bang ahim nek a nuom ta a; himahleh, nek ding a siem lai u chun, vaulam thilmuh a hun nei ta a.

¹¹ Chun, van kihawng a, bangkhat bawm, puon lientak tawbang, a ning li a kikhit a, leia hung kitultha’n a mu a.

¹² Zie sung achun, keng li nei zat ganhing cheng leh, ganhing leh, chung leng vacha tincheng a um u a.

¹³ Chun, a kawmah aw khatin, “Peter, tho ah, that inla, neh,” a hun ti a.

¹⁴ Himahleh, Peter chun, “Lalpa, hilo e; thienglo leh a buok himhim ka ne ngei puoi,” a ti a.

¹⁵ Chun, aw chun a nih veina ah, “Pathien in a hih thiengthosa chuh, nangin thienglo ti ki’n,” a ti a.

¹⁶ Khutibang ngen chun thum vei a hung um a; chun, bawm chuh van a khaih toh in a um kit zieng ngâl ta a.

¹⁷ Chun, Peter in, vaulam a a thil muh chuh a ngaihna he lo a, a lungzîn lai in, Kornelias mi sawlte chun Simon In chuh a na dawng dawk tau a; kawtkhak bul ah a na ding u a.

¹⁸ Simon Peter a tihpau chuh, taka chuh a tun leh tun loh a dawng u a.

¹⁹ Khutia, Peter in a vaulam thu chuh a ngaihtuoh lai in, Thagau in a kawmah, “Ngaitie, mi thum in a hun hawl ui.

²⁰ Khutichun, kipan inla, kum suk inla, bangmah awlmawh lo hielin amau zui ah; amau chuh ka sawl ahiu hi,” a ti a.

²¹ Tichun, Peter chuh ziete kawm achun a chieh suk a, a kawm u ah, “Na hawl u chuh ka hi; banga na hung lawh uh?” a ti a.

²² Chun, amau chun, “Vânsâwlchâk Thiengtho khatin, Kornelias, sepaih za lawiupa, mi diktat, Pathien ging, Juda nam chengcheng laka mi minpha kawm achun, na thugen a zakna dingin, a In a nangmah hun sam dingin, a hilh ahi,” a tiu a.

²³ Khutichun, mihaw chuh a sam lut a, a giek sak ta a. Chun, a zing chun, Peter chuh a kipan a, a kawm u ah a chieh ta a; Joppa khuo a um, suohpih kuote ahim le a kawmah a chieh u a.

²⁴ Tichun, a zing kitin, Kaisari khuo achun a lut tau a. Chun, Kornelias chun, a behte leh, a guol deihpente sam khawm in, amau chuh a na ngak zing u a.

²⁵ Chun, Peter chuh a lut ding kuon takin, Kornelias chun a na muok a, a keng bul ah a bawkkhup a, Pathien chibai guolin a chibai a.

²⁶ Himahleh, Peter chun amah chuh a kai tho a, “Ding ah, keile mihiem ka hi a puo,” a ti a.

²⁷ Chun, a kawma thugen kawm chun a lut a, mi tamtak na um khawm chuh a va mu ta a.

²⁸ Chun, a kawm u ah, “Juda mi’n, Jentel te kivawppih leh, a kawm u a chieh a thien loh zie nang un na heu hi; himahleh, ken, kuomah thienglo leh buok, ka tih ding ei puoi, tih Pathien in ei hetsak ahi.

²⁹ Zieziekchun, nei hun sap taka khah, niel lo a hung zieng ka hi. Tichun, ka hun dawt na hiu hi, banga nei hun sap lawh u le?” a ti a.

³⁰ Chun, Kornelias chun, “Ni li ahi ta a, tu phat ding vel hin, vaimim huon phat paucham huna, ka In a ka paucham lai in, ngaitie! mi khat, puon tesepsup silh ka ma ah a hung ding a,

³¹ ka kawmah, ‘Kornelias, na pauchamna khah zak in a um tai, mi kawma na thil piek haw khale, Pathien in a hezing hi.

³² Zieziekchun, Joppa khuo ah mi sawl inla, Simon Peter a tihpau chuh na kawmah sam ah; amah chuh tuisuohgiet panga savun siempa Simon In a tung ahi,’ a ti a.

³³ Zieziekchun, na kawma mi ka hun sawl zieng ahi; na hung hi a phai. Khutichun, Lalpa’n thu a hun piek chengcheng za dingin, tuhin, Pathien mit muh ah, I bawn un taka hih um I hiu hi,” a ti a.

Peter Thugenna

³⁴ Tichun, Peter chun a gen pan a: “Pathien in mi, deihsak chuom a nei puoi tih, diktakin ka hêi.

³⁵ Chuleh, namtin laka kuole, amah ging a, diktak a hih ta chuh, a kipahlam ahi sek hi.

³⁶ Amah chun, Lungmuonna Chanchin Pha, Isu Krista kama gen in, Israel suonte kawmah thu a thâk a, (Isu chuh mi chengcheng Lalpa ahi a),

³⁷ Johan in baptistma thu a gen nung a, Galili gama hung kipan a, Judai gam cheng chenga thil hungtung lopitak kha na heu a puo!

³⁸ Nazareth Isu chungchâng thu khah, khati a, Pathien in a chunga Thagau Thiengtho leh thilhih theihna a vuk zie thu haw kha. Amah chuh thilpha hih leh, Diabol bawlsiet chengcheng hihdam in, muntin a fang viel sek a, Pathien a kawma a um ziekin.

³⁹ Chun, Judate gam leh, Jerusalem khuo a a thilhih chengcheng hetpihte I hiu hi; amah chuh kross a khêndên in, a sulum tau a.

⁴⁰ Himahleh, Pathien in ni thum ni’n a kaitho kit a, chientakin a kilatsak kit a,

⁴¹ Amahvang chuh, mi chengcheng kawmah ahi puoi; Pathien in a hetpih dinga a guotlawkte kawm mah ah ahi eimau haw, mithi lak apat a thawh kit nunga a kawma ne a, dawnte kawm ngêi ahin.

⁴² Chun, amah chuh, mi thite leh mi hingte chunga vaihawm dinga Pathien guot chuh ahi, tih mite kawma tângsappih leh hetsak dingin, Pathien in thu ei piek ahi.

⁴³ Kuole, amah gingcha ta, a min ziekin gitlohnate ngaihdam in um un au tih, thiemgau chengcheng in a chanchin a hetsak sek u khah,” a ti a.

Jentel ten Thagau Thiengtho a Muh nau

⁴⁴ Chun, Peter in zie thu haw chuh a gen lai takin, thu ngaitha chengcheng te chung achun Thagau Thiengtho a hung tung ta a.

⁴⁵ Chun, zektan haw laka gingchate, Peter hun zuite chun, Thagau Thiengtho piek chuh, Jentel te chung ale sunthak ahih ziekin mak a sa ten u a.

⁴⁶ Amau chuh pau hetloh banga thugen leh, Pathien lopina pakcha’n a he ngâl u a.

⁴⁷ Chun, Peter in a phuong a: “Ziete haw hin, eimau mah bangin Thagau Thiengtho a mu ta ngâl u a, tuia baptistma a chan lohna dingun mi’n a khap thei ding u a ahim?” a ti a.

⁴⁸ Khutichun, Isu Krista min a baptistma chan ding thu a pie a. Ziehaw zawh chu leh, ni bang zat ahim châm dingin a ngên a.