NAHUM 3 - PATHIEN LEKHABU THIENGTHO (BSI)

¹ Thisan suoh hât khawpi chuh, a chung gik hi, lepchieh leh kisuomna’n a dima; buluh a na um hin tâwp nei puo’n a; na tawpna ding chuh a nai tai!

² Zepna khauhuol veigitte, kangtalai keng kinawttuoh gitte; sakawl taih thawmte leh kangtalai tai nguotnguotte chuh ngaiin!

³ Sakawl chungchuong mite thupiek leh, chemzâm te zawlzawl leh; tiengcha phe zawlzawl leh mi thiluong vum velvul te, mi thiluongte chuh simsen guol ahi puoh a; mithi luong achun a a kisuipai hiel u a.

⁴ Zie chuh nawhchizuok melhawih, dawithiem nu, a zawlsaih zieka a nam khâwnga, a dawi chîn zieka a inkuon khâwng nu zawlsaihna nasa tak zieka hung um ahi.

⁵ Ngaitie, ka hun kilanpih na hi, Sepaih hawnte Lalpa chun a tii. Na nîk chuh na maichang tiengin lipto ing ka ting, na sangawnna chuh namte muhsak ing ka ting, lalgamte chun na zahchâkpih cheng chuh mu’n au.

⁶ Muhsit-um takin hun bawl ing ka ting thil kihdak-um takin hun tuom ing ka. Tichun, mitin in kihdak takin hun en un au.

⁷ Chun, hiti hi hi’n tin, a hun mu taphawt in luchang hun thinkhum untin, “Ninevi chuh a chim ta a! Kuo a a sun ding? A thamuon ding chuh khawi apat in ka hawl ta die?” ti’n gen un au.

⁸ Ninevi! Aigupta Thebes sangin na phazaw diek em? A man le kulhpi guola amah veng dingin luipi a nei a, Nile luipi chuh a kihumbitna ahi.

⁹ Ethiopia leh Aigupta chungah vai a hawm a, a thuneihna chun tâwp a nei puoi; Put leh Lubim chuh nang hun panpihte ahiu hi.

¹⁰ Khutisa chun le puihmang ina um u a, sala puih in a um tau a; a chasen hawu chuh khawpi lailung achun chilgawp in a um zo tau a; A lawiupa teu chuh phunsân khum in a um u a, a milienteu chengcheng chuh thikkawl buhsak in a um tau hi.

¹¹ Ninevi! Nang le zukhamte huong sung ah puk in na tin; Na melmate apat in taih dawk guo ding na hi.

¹² Na kulhpi chuh theipi gah min masa tawbang ahi: a kilin thet u chun a gahte chuh na kama a hung kiek lut zieng tawbang hi ahi!

¹³ Na sepaihte chuh numei tawbang hiu untin, na gam chuh na melmate masangah vengtu bei guolin ding in a. A kawtkhak chunga thikte chuh mei in katum ding ahi.

¹⁴ Um kimvela na um sung a dingin tui khai in la, na kulhpi te siem pha’n, bellei tung umna achun chieh in la, chun, suongchâlna chilnâng in la; lei hâl takna thukkhuk chuh sudet in.

¹⁵ Zie tak achun meia hâltum ahim, chemzâm a thah ahim a um ding na hi. Khaupete’n buh kung a nek zawh guol u a nek zawh a um ding na hi. Khaupe hawn bangin na pung mah mah tau a!

¹⁶ Aksite sanga tamzaw hielin sumkawlveite na pung u a. Himahleh tuhin a bei zo tau a, thingnget chun a susie a, a leng mang sek ui.

¹⁷ Na milienteu chuh khuo vawt laia khaupe hawn huonpal a chu lemlum guolin a um u a. Himahleh nisa a hung sat tieng leh a leng mang sek u a, tichun kuoma’n a umna gam uh a he ta sek puou ui.

¹⁸ Aw Asuria lengpa, na belampute chuh a vuong u a, na mi zahum teu chuh a ipmu tau a! Na mipite chuh tâng chunghaw achun a kithehzâk tau a, a puikhawm ding a um puou hi.

¹⁹ Na natna chuh sukdam theih ding guol ahi puoh a, na liemna chuh thihpih kham ahi. Na puksiet na he taphawt chun kipâkin khut a bêng u a. Na nunsietna tâwp nei lo apat a suokcha hi a um mawng em? ti’n.