NAHUM 2 - PATHIEN LEKHABU THIENGTHO (BSI)

Ninevi Puksietna

¹ Nang hun do a hun sugawp ding ahung ta a, kulhbang hawmna achun mi hangsante pansak in la; lampi chuh entha zing in la, kâwnggak in la, na hatna la thak in. Na kulh siem phan la, lam tin chuh veng in. Kido dingin kiguonggalh khawl in.

² Israel lopina bang khan, Lalpa chun Jakob lopina chuh pie kit ding ahi ngâla, hihhawmte chun amau chuh a hih hawm zo tau a, grep guite le a hih sie zo tau hi.

³ A mi hangsan te phaw chuh a san ahi a, a sepaihte chuh a sandup in a kivan u a; a kangtalai teu chuh galdo dinga a kitien lai un, kahpathik guolin a val lenglung a; a tiengcha hawu chuh tizat um takin a phe zawt zawt a. A sakawlteu chuh hât takin a tai u a.

⁴ A kangtalai te chuh khawpi sung ah a tai zung zung u a: khawpi ning tina chun a suk atung in a taiviel u a. Mei guolin a vak zawt zawt a, Kawlphe bangin a te zawl zawl u a.

⁵ A milien teu chuh kin taka sap khawm in a um u a; malam a nawh dungzui u chun a kisuipai lemlum u a. A dote chun kulh bâng lam a zuon u a, tichun a susie dingin kiselgukna a siem u a.

⁶ Lui kawtkhak chuh sukhawn in a um ta a; leng-In lopi tak chuh sukmang in a um tai!

⁷ Lengnu chuh sala puih in a um ta a, a suokte chuh vakhu bangin a mau u a; lungkham in a âwm uh a kichup tau hi.

⁸ Ninevi chuh tui kithawk kangsa dîl tawbang ahi ta a, “Khawngai in, khawngai in” ti’n kiko mahleu, kuomah a kinunghei puou hi.

⁹ Dangkaguote chuh chawm unla! Sanate chuh kilak un! Khawpi chuh hauhsakna a dim ahi ngâla!

¹⁰ Ninevi chuh suksiet leh nutsieh ahi a, a hawmngawn ahi ta ngâl a. Lauhna’n lungthim a tuitha zo ta a; khûpte kithing in, kâwng a tha hatna a bei zo ta a; a mai uh a dângtha zo tai.

¹¹ Tuhin khawpi sakeibaknei kuo bang mai chuh khawitak ahi ta? Sakei note kul; sakeibaknei in a note umna a kuomah sukbuoi loh a a nek dinguh sa a hun chawihsak na mun chuh?

¹² Sakeibaknei chal in a note nek ding luoi tel a, a pi leh a note dinga bawttel in a kulh chuh sa nek mawk in a hih dim sek a, a kawhawm haw chuh sa luong bawhtel in a hih dim hi.

¹³ “Ngaiin, nang ka hun do hi!” Sepaihte Lalpa chun a ti a. “Na kangtalaite chuh hâltum vek ding ka hi. Na sepaihte chuh kidonaa thah in um untin, chun, lei chung akipat in na salmatte sutawp ing ka ting, na thangkote aw mawng mawng kiza ta puo’n a,” ti’n.