NAHUM 1 - PATHIEN LEKHABU THIENGTHO (BSI)

¹ Zie hi Ninevi chungchâng a hilhlawkna, Elkos mi, Nahum in kilâkna a muh chuh ahi:

Ninevi chunga Lalpa Lungnatna

² Lalpa chuh thikthusie Pathien leh phuba la Pathien ahi. Lalpa chun phuba a la a, lungnatna a dim ahi. Lalpa’n a melmate chungah phuba la’n tin, chun, a melmate dingin lungnatna a khawlkhawm hi.

³ Lalpa chuh lungna vak zieng lo, himahleh, thilhih theihna nasa tak nei ahi; gitlohna chuh bangti zawng in le gawt loh in kawih puo’n a. A lampi chuh chinpei leh huihpite achun a um a; meipite khuh a kêngpêk a leivui ahi!

⁴ Tuipi chuh kang dingin thu a pie a! luipite chuh a luon kang sak a. Bashan gama lote chuh a chultha ta a, Karmel tângte chuh a ngui zo ta a; Lebanon tânga pakchate chuh a vuoi zo hi.

⁵ A masang achun tâng liente chuh a kithing a, tâng neute chuh a tuitha zo tau hi; a masang achun leisiet hi hawmngawn ahi a, khawvel leh a sunga um chengcheng te le bangmahlo ahi.

⁶ A lungnat tieng leh kuo a ding zo ding? A lungnatna nasa tak chuh kuo a thuok zo ding? A lungnatna mei chuh a thahdawk a, Suongpite chuh A masanga chun a phel zo tai.

⁷ Lalpa chuh a pha a, beidawn ni a kulhpi dettak ahi a; Amah a ginna ngate chuh a he sek hi.

⁸ Himahleh, tui kinawk nasa tak guolin, a melmate chuh a sumangthai vek a; Amah dodal taphawtte chuh thimna’n a delhzui sek hi.

⁹ Lalpa dona dingin banga na guonggalh? Hun sumangthai ding ahi a; a melmate chung achun a vela phuba lak ngai puo’n a.

¹⁰ Zukhamte guola kham in um mahleu, lingbawk kisepkhawm guolin amau chuh meia hâltum in a um u a; buhpawl gaw guolin hâltum ahiu hi.

¹¹ Nang apat in mi khat, Lalpa kalh a thil gilo ngaihtuoh, Lalpa ngêi phielgu a um hi.

¹² Ziehi ahi, Lalpa’n Israel mipite kawma a gen chuh: “Asuria te chuh hat in tam mahleu le, satthak in um untin, beimang kei ding ahiu ui. Ka mite haw, nang haw ka hun sugimthei a, himahleh hih kit ngei ta puo’ng ka.

¹³ Tuhin, na chung u a Asuria te thuneihna chuh sutawp ing ka ting, a hun kân nau thikkhau chuh bawttan ding ka hi,” ti’n.

¹⁴ “Lalpa na chungchâng thu ah thu a pie a, na min pu dingin suonlepak nei puon la. Na pathien haw In apat milim siem kawm leh milim kisung haw chuh hih mang ing ka ting; na thân siem ing ka, na gilo ngâla” ti’n.

¹⁵ Tang haw a Chanchin pha tun a, chamna thu tângsappih te kengte chuh entie! Aw Juda na guolvak nate kipahpih in la, na thutiem te chuh muolsuoh in. Migilo chun la hun palzut kit ding ahi ta puoh ngâl u a, kichien taka sukmang ahi tau hi.