MIKA 7 - PATHIEN LEKHABU THIENGTHO (BSI)

Israel Umdan Diklohna

¹ Ka chung a gik na e! Nipi theigah kisungkhawm leh grep lawh hun laia a kilo hengilh lawh ding tawbang ka hi ngâla; theipi gah min masa tawbang ka hi a, ka hinna’n a utchak le a um diek puoi!

² Pathien mite chuh leichung a hin a mangthai u a, mi diktat kuomah a um ta puoh a; thisan suoh ding mai ngaihtuoh in a chângthau a; mitin in amah suohpihte chuh len a mat a guo chiet tau hi.

³ Thil gilo hih chuh a thiem chiet u a. Miliente leh thutante chun gawlhgukna a ngek chiet tau ui. A milienteu chun a hinna’n thil phalo a utchak chuh a gendawk u a; tichun, thil a guonggalh khawm tau ui.

⁴ Tichun, a lak u a mi phapen chuh hampa tawbang ahi a, mi dik pên chuh hamlingnei tawbang ahiu. Pathien in thiemgaute manga a genlawk masak guol khan, a mite a gawtna ding ni chuh a hungtung tai! Tuhin, a buoi na niu chuh a hungtung tai.

⁵ Na invengte chungah kinga ki’n la, na guolte chung ale na kinepna kawih ki’n. Na mûk kawtkhak veng tûp in, zie apat chun na angsung ngêi ah lepchieh a gen sek hi.

⁶ Chapa’n a pa a suminsie a, chanu chun a nu thu a nielkalh a, mo in a talpi a kinakpih a; mihing melma chuh a in sung mi ngêi ahiu hi!

Lalpa Hukdamna Siem

⁷ Himahleh, ken vang chuh Lalpa lam en ing ka ting, ka hukdamna Pathien chuh ngak ing ka. Ka Pathien chun ei ngaitha ding ahi ngâl a.

⁸ Aw ka melma, ei eu lau mai ki’n, puk mahleng le thokit ing ka; Thim laka chu mahleng le Lalpa’n vak ei pie kit ding ahi.

⁹ Lalpa chunga thil ka hihkhelh tâk ziekin, a lungnat na chuh thuok ing ka ting; ka chungthu ei genpih a, kei dinga vaihawmna chuh a muolsuoh masieh chun, tichun, vak ah ei puidawk in tin, chun, hukdawkna chuh mu’ng ka.

¹⁰ Zie phat chuleh, ka melma, ka kawma, “Lalpa na Pathien chuh khawitaka um a?” ti a ei dawng te khan zie chuh muu in tin, zakcha ta’n au. Ka mitte chun amahnu chuh en intin, tuhin chuh khawlai buonthuok guola tawhden hita’n a.

¹¹ Na kulhbang te siemna ni ding chuh hung tung ding ahi. Zie tieng chuleh na gam chuh nasa taka keklet hita’n a.

¹² Zie ni chuleh Asuria apat Aigupta tiengin, Aigupta apat Euphrates luipi tiengin, tuipi leh tuipi kikal apat te leh tâng leh tâng kikal haw achun na kawmah hung khawm un au.

¹³ Himahlele, lei chuh, a chunga mi nunsiete ziek chun a hawm a nutsieh a um ding ahi.

Israel te chunga Lalpa Lungsietna

¹⁴ Lalpa, na mi telte a ding hin belampu leh mawlh hi’n la. Na go luoh gan guolte chuh na mawlh in veng in la; amau mai a gammâng leh huon gam lailung a chêngte chuh, malai nite guol khan Bashan leh Gilead gama hamhing mun haw achun kivâk u hen.

¹⁵ Aw Lalpa, Aigupta gam apat a nei puih dawk laia, thilmak na hih bang khan, tuhin le ka kawm u ah hih in.

¹⁶ Namte chun zie chuh muu un tin, a hâtnau chuh zahchâkpih un tin, a khut un a mûk uh him un tin, a beng uh ngawng ina.

¹⁷ Gûl guolin lei liek un tin, leia bawkvaka chiehte guolin a umnau kuo haw apat chun kithing kawmin hung pawtdawk un tin, lau leh kilîng in Lalpa lam ah kihei kit un au; nang haw ziekin amah chuh lau un au.

¹⁸ Aw Lalpa, nang tawbang Pathien, a goluoh ding a mite, a suokcha sunte gitlohna ngaidam leh a sukkhelhnau subei dang a um puoi. A lungnat na chu kumlekhuo’n a vawp zing puoh a, zahngaihna chuh a kipahpih lam tak ahih ziekin.

¹⁹ Amah chun I chung u ah zahngaihna nei kit in tin; I sukkhelh na teu chuh tawhden in tin, I gitlohna teu chuh tuipi lituong ah paih lut ding ahi ngâla.

²⁰ Malaia ka pileputeu kawma na tiem guol khan Jakob kawm achun na ginumna sulang in na tin, Abraham kawm achun na zahngaihna sulang ding na hi ngâla.