MIKA 6 - PATHIEN LEKHABU THIENGTHO (BSI)

Israel te Chungthu a Lalpa Thu

¹ Lalpa thugen chuh tuhin ngaithau in! Aw Lalpa, kipan in la, tâng lien haw ma achun kilanpih in la, tâng neu haw chun na aw ngaithau hen!

² Nang haw, kumlekhuo a leisiet kingakna tângte haw, Lalpa hêkna thu chuh ngaithau in! Lalpa’n a mite do in, hêkna thu a nei hi. Israel te a hêkna thu chuh hun puodawk ina.

³ Lalpa chun, “Aw ka mite haw, na chungu ah banga ka hih le? Bang tiengin ahim nang haw ka hun suk lungkham? Ei hun dâwng tiem u!

⁴ Aigupta gam apat chun ka hun puidawk a, suok apat in ka hun tandawk a; na mau ah Mosi te, Aron te leh Miriam te, a hun pui dingin ka sawl kha!

⁵ Aw ka mite haw, Lalpa hukdamna na het theihna ding u a Moab leng Balak thupun leh Beor chapa Balaam a dâwn dân, Shittim apat a Gilgal tienga thil umzie haw kha hezing un!”

Lalpa Thil ngek pên chuh

⁶ Lalpa, van Pathien ho dinga ka hung tieng leh, a masang achun bang ahi die ka chawih ding? A masang achun hâlmang kithawihna a bâwngno kum khat a upa tawh hung ding ka him?

⁷ Belam sang khat ahim, olive thau luong kang lo khawp chawih in, Lalpa chuh a kipâk dinga ahim? Ka gitloh tatna dingin ka cha lutîl chuh pie’n, ka thagau sukkhelh ziekin ka taksa gah chuh pie ding ka him?

⁸ Aw mihing, Lalpa’n thilpha chuh a hun hilh ta a. Lalpa’n a hun ngêk pên chuh ziehi ahi: Thil dik hih leh, lungsietna suklat zing leh, I Pathien u tawh kingainiem taka kipawlkhawm zing hi ahi.

⁹ Lalpa’n khawpi chuh a kiko khum a, “Pilna nei mi chun na min lauh dân thiem ina; Khetbuk leh a bawl pa heu in.

¹⁰ Mi nunsiete In sung a nunsie taka a khawlkhawm uh hauhsakna chu ka hengilh in, tehna diklo tak a mat u chu ka hengilh thei dinga ahim?

¹¹ Tehna diklo leh bûkna diklo mangte chuh bangti’n ka ngaidam thei dem?

¹² Na mi hausateu chuh pawngbawl na’n a dim u a, mi chagahte chuh diklo takin a guoi u a, a kamsung u a a lei u chuh thephat ahi!

¹³ Zieziekchun, ken le na taka liem in ka hun zêp ta a, na gitloh na teu ziekin ka hun sugam ta a!

¹⁴ Neu in na tin la vah chuom puo’n na tin uh, na gil uh kiel tho tho ina. Thil kawihheh un na tin uh, himahleh hukbit diek puo’n lau; na kawihkhawl cheng u chuh gâl in sumangthai vek ding ahi ngâl a.

¹⁵ Buh chîng un na tin, himahleh ât diek puo’n lau. olive thau thawk un na tin uh, himahleh, a thau chuh kinuh puo’n lau; grep thawk un na tin uh, himahleh, dâwn diek puo’n lau.

¹⁶ Leng Omri leh a chapa leng Ahab thilhih sekte na zuih ziekun, zie thil haw hi na chungu ah hungtung ina. A lemguot hawu chuh na sunzawm u a, zieziekchun, na chungu ah sietna hun tunsak ka ting; tichun, mi chengin hun musit un tin; muntin a mite chun musit takin hun bawl un au!” Chun, ka mite minsiet na chuh puo’n la, ti’n.