MIKA 5 - PATHIEN LEKHABU THIENGTHO (BSI)

Bethlehem apat Hukdampa

¹ Tuhin nang chuh kulh a ûmkimvel na hita a, a hawn in pangkhawm un; Israel puitu chuh mawlh in a bieng a zêp sak tau hi.

² Himahleh, Aw nang Bethlehem Ephrathah, Juda gamsung a khawpi te laka neupen na hi a, himahlele, nang apat in Israel te vaihawm ding tungdawk ing ka, a phunggui malai pek apat a sût a um ngêi chuh.

³ Zieziekchun, naunei ding nu chun chapa a hin masang sieh chuh, Lalpa a mite chuh melmate khuta pie’n, kiheimangsan ina. Tichun, a suohpih dangte cheng chuh Israel gam achun vaikit un au.

⁴ Amah a hung tieng chuleh, Lalpa apat a hatna leh, Lalpa Pathien lopina ngêi chun, a mite vaihawm sak ina. Lei chung pumpi a mi chengcheng in a lopina chuh a het tâk ziekun, amau chuh bit takin um zing un tin; amah chu lei tâwp chanin lopi ding ahi ngâla.

⁵ Chun, ziehi I kichamna dinguh hi’n a; Asuria ten I gam uh a hun do u a, I lal In hawu a hung tawh tieng leh amah do dingin belampu sagih leh mi lopi tak tak giet kiteldawk hitiu.

Hukdawkna leh Gawtna

⁶ Asuria gam chuh chemzâm in susieu intin, Nimrod gam chule a lutna achun susie’n au. Amah chun I gam u a Asuria mi ahung a, I gam giu ahun tawh tieng leh, amah apat chun ei hukdawk ina.

⁷ Tichun, Jakob suonte a hing dawk sunte chuh, nam tamtak te a dingin Lalpa apat a sukhalhthak kitna dâitui kie leh, thai kung dâwngte chunga guohmal kie sieusieu bangin um un tin, mihingte chunga kinga lo in Pathien chungah kinga zaw’n au.

⁸ Jakob te laka a suokchate chu vang, gammânga sate laka sakeibaknei in tawbang leh belam hawn laka sakeibaknei vanglai bangin um ina: amah chun a chieh pai phawt chuh a tawh den a, a bawtthêk a, a panpih ding kuomah a um puou hi.

⁹ Na khut chuh nangmah hun dote chunga thak in um hen la, na melmate cheng cheng chuh sukmangthai in um u hen.

Lalpa ’n Israel a Sukthienna

¹⁰ Zie ni chuh hiti hi hi’n a, Lalpa’n a tii: Nang apat in na sakawlte sumang ing ka ting, na kangtalaite susie’ng ka.

¹¹ Na gam khawpite chuh sumangthai ka ting, na kulhte cheng chuh hihchim ing ka:

¹² Na khut u apat in na dawithiemnate chuh sumang ka tin, khutlam-en thiemte nei ta puo’n la.

¹³ Na lak uh apat in na milim siemkawmteu leh na suongphuhteu chuh sumangthai ka ting, na khutsuok thilte chuh ho ta puo’n la.

¹⁴ Na gamsung uh apat in, Asher pathien te chu bawt dawk ing ka ting, na khawpiteu chuh susie’ng ka.

¹⁵ Ka thu zawp lo namte chung achun lungna tak leh thangtawm takin phuba hun la ding ka hi.