MIKA 3 - PATHIEN LEKHABU THIENGTHO (BSI)Mika’n Israel Lawiupate a Gaihna 1 Aw, nanguh Jakob haw mapuite leh, Israel inkawte vaihawmte haw, ngaithau in! Vaihawmna dik chuh na het dinguh hilo ahim? 2 Thilpha na hawu a, thil phalo na ngainau a; ka mite chuh a vun uh na hâwk sak u a, a guh uh apat in pheh na leuthau a; 3 Ka mite sa le na neu a; a vun uh na lip u a, a guhteu na sukbawt sak uh a, ahi, bela sa huon ding bang mai in na chennêl u a; sa so bel sunga sa semnel bang mai in. 4 Zie tieng chuleh Lalpa sam un tin, himahleh, amau dâwng puo’n tin: ahi, zie tieng chuleh a thilhih u a a hih phatloh zieu bang zelin amau apat in a mai sel ina. 5 Piek ding a neih lai u a “Muonna” thu tiem khum a, piek ding neilote kawma kidona thu phuong a gen lauhsak thiemgaute chun ka mite a thêm u a, a chungchâng thu Lalpa’n hiti hin a gen hi. 6 “Nang thiemgau, na nite bei ding ahi tai! na chungah nisa tum ding ei tai! Ka mite na puihkhelh ziekin, thiemgaute’n kilâkna a muh uh chuh mu ta puo’n na tin, bangmah genlawk theih nei diek ta puo’n la,” ti’n. 7 Tunung thu ding genlawkte chuh a lawhsap ziekun, zakchau un tin. Pathien in dawnna a piek loh ziekin, a bawn un sukzahhuoi in um un au! 8 Himahleh, kei vang Jakob sukkhelhna sulang ding leh, Israel gitlohna hetsak dingin, Lalpa thagau zieka thil hihtheihnate, vaihawm nate leh hatna te chun ka dim takzet hi. 9 Nang haw Jakob insung mapuitute leh Israel insung vaihawmte, vaihawmna dik deihlo a, dikna tin cheng lehbulhte haw; ziehi ngaitha dingin ka hun ngên hi! 10 Zion chuh thisan in na sau a, Jerusalem suongphum chuh gitloh na’n. 11 Khawpi a lawiupate chuh gawlhgukna kinem in vai a hawm tau a. Thiempute chun lawh kinem in dân a sinsak u a; thiemgaute chun, dangka muh kinem in kilâkna thu a gen u a, a bawn u chun, Ka kawmah Lalpa a um hi, a ti chiet u a. “Ka chunga ah thil phalo hungtung puo’n a, Lalpa chuh ka kawm u ah a um ngâl a,” a ti tei tei u a. 12 Zieziekchun, nang haw ziekin Zion chuh lo lei guola kalh hi’n tin; Jerusalem chuh thilsie kawihkhâwm guolin um ina. Chun, Ho-In umna tâng chuh gammâng hungsuok ina. |
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
Bible Society of India