MIKA 1 - PATHIEN LEKHABU THIENGTHO (BSI)

Samari khawpi leh Jerusalem Kahchamna

¹ Juda leng Jotham leh Ahaz leh Hezekia te lal lai a Moresheth khawpi a um Mika kawm achun Lalpa’n Samari leh Jerusalem chungchang thu chuh a phuong ta a.

² Nang haw, namtin chengte haw, zie hi heu in! Aw lei leh a sunga um chengcheng te haw, ngaithau in! Lalpa Pathien chun nang haw do in thu gen in tin; A Ho-In thiengtho apat a a thugen chuh ngaithau in!

³ Ngaitiem u, Lalpa chuh a mun thiengtho apat chun hung in tin; hung suk intin, lei mun sang haw chuh chil ding ahi ngâla.

⁴ Khutichun, a keng nuoi achun tângte chuh khuoilu meia hâl guolin tuithau intin, Tichun, tâng apat a tui sunthak guolin luiguom a chun sungtha’nau.

⁵ Ziehaw chengcheng hi Jakob inkawte Pathien do a a kiphinna ziek u leh, Israel inkawte gitlohna ziek ahi. Jakob inkawte bawhsietna chuh kuo ngawh ding ahi? Samari khawpi ngêi chuh hilo ahim? Juda milim hona chuh kuo mawhpuok ahim? Jerusalem hilo ahim?

⁶ Zieziekchun, Samari chuh thilsie kawihkhâwm bangin siem ing ka ting, grep phuhna ding mun bang mai in, chun, zie muna suonghaw chuh guom lam achun lik tha’ng ka ting, suongphumte chuh dawk sak vek ing ka!

⁷ A milim siemkawmteu cheng chuh sukgawp vek hi’n tin; nawhchizawkna mante chuh hâltum vek hi’n tin, milim chengcheng chuh hihsie’ng ka ting; nawhchizuok mana a lâkkhâwm u chuh, nawhchizawk man mah in pang kit ina.

⁸ “Zieziek hin kap ing ka ting, kiko vuohvuoh ing ka ting, keng ngawnin leh sangawn in um ing ka: si-âlte bangin kiko ka ting, ostrich vacha bangin mau ing ka!

⁹ A liemte chuh sukdam theih ahi puoi, Juda gam chun thuok tei ding ahi ta ngâl a; ka mite chênna Jerusalem kawtkhak hiel le a tung ta ngâl a,” ti’n.

Melmate’n Jerusalem a Zuon ui

¹⁰ Gath achun gen ki’n la, kap le kap kiu inla, Beth-Leaphrah achun leivui lak ah kital in kilik viel un.

¹¹ Nang haw, Shaphir khuo a mite haw, ngawnchang leh zakcha takin salin chieh un! Zaanan a chêngte chuh a khawpiu apat chun a hung pawtdawk ngam ta puou a. Beth-ezel te lusûnna thawm na zak tieng chuleh, zie tak achun kihumbitna a um puoi tih hun he ta’n la.

¹² Maroth khuo a mite chun damna chuh ngaklah tak mai in a ngak u a, a ziek chuh Lalpa’n thil phalo chuh Jerusalem kawtkhak bul tieng nasana a tunsak tâk ziekin.

¹³ Nang haw Lakish a chengte haw, kangtalai chuh sakawl hât tawh sutuoh unla, Zion chanute dingin gitloh kipatna bulpi na hiu hi; Israel gitlohna chuh nangmau ah muh in a um ngâla.

¹⁴ Zieziekchun, tuhin, Juda mite chun, Meroseth, Gath khawpi kawma chun kithakna thilpiek na piek dinguh ahi. Tichun, Israel lengte chun, Achizeb khawpi apat chun panpihna mu puo’n au.

¹⁵ Mareshah khuo mite haw, Lalpa’n na khawpiu la ding, na melmateu khut achun hun pie ding ahi tai! Tichun, Israel te mapuitu lopitakte chuh tai untin, Adullam kawlpûk achun kisel un au!

¹⁶ Zieziekchun, Juda mipite haw, na cha deihtakteu ziekin lungkham in na sam uh met kawlh unla! Na chateu chuh nang haw apat a sala puih manga um ding a hih ziekun, mulukawlh luchang guolin na sam uh met kawlh un!