MATTHAI 9 - PATHIEN LEKHABU THIENGTHO (BSI)

Isu’n Zeng a Sukdamna

¹ Chun, Isu chuh lawng ah a chu a, dîl a galkai a, amah umna khawpi achun a chieh ta a.

² Chun, ngaitie, zeng khat, zâlkhun a kuol san a kawmah a hun zawn u a, Isu’n a taksan zieu a muh in zeng kawm achun, “Ka cha, lungmuong takin um ah, na gitlohna ngaihdam ahi tai,” a ti a.

³ Ziephet chun, Danthuzik kuote ahim in a lungthim un, “Zie pa hin Pathien a gensie ahi hi,” a tiu a.

⁴ Himahleh, Isu’n a ngaihtuoh hawu chuh a het in, “Bang dinga na lunggil u a gitloh ngaihtuoh na hiu hi?

⁵ ‘Na gitlohna haw ngaihdam ahi tai,’ tih leh ‘Tho in la, keng in chieh ta’n’ tih hi a khawi zaw a gen baihlam zaw?

⁶ Bang hitalele, lei chunga hin Mihiem Chapa’n gitloh ngaihdam theihna a nei hi tih na het theihna dingun,” a ti a. Khutichun, zeng kawm achun, “Tho inla, na puonphah la’n la, na In ah chieh ah,” a ti a.

⁷ Tichun, a tho a, a In ah a chieh ta a.

⁸ Chun, mipite chun zie chuh a muh un a lau tau a, mihiemte kawma khutibang thuneihna pie Pathien chuh a pakcha tau a.

Isu’n Matthai a Sapna

⁹ Chun, Isu zie apat chun a chieh zel a siehdawlna muna chu mi khat, a min Matthai kiti chuh a mu a; a kawmah, “Ei hun zui ah,” a ti a. Tichun, a kipan a, a zui ta a.

¹⁰ Chun, tihi ahi a, ina chuh ankuong a um lai in ngaitie, siehdawlte leh migilote tamtak a hung u a, Isu leh sinsakte chuh ankuong a ûmpih tau a.

¹¹ Pharisaite chun zie chuh a muh un, Isu leh a sinsakte kawm achun, “Bangati a na sinsakpau in siehdawlte leh mi gilote laka a nek a?” a tiu a.

¹² Himahlele Isu’n, zie chuh a zak phetin, “Mihatte’n daktor a ngai puou a, mi dammawhte’n a ngai zawu hi.

¹³ Khutichun, chieh un la, Pathien lehkhabu a, Kithawihna deihlo in, lungsietna ka deih hi tih umzie hi va mudawk un, mi diktatte sam dinga hung ka hi puoh a, mi gilote sam dinga hung ka hizaw a puo,” a ti a.

Anngawlh Thua Dawtna

¹⁴ Zielai chun Johan sinsakte a kawmah a hung u a, “Bangati a keihaw leh Pharisaite hin an ka ngawlh sek u a, na sinsakte hin a ngawlh loh uh a?” a tiu a.

¹⁵ Isu’n a kawm u ah, “Mo puite kawma a pasal ding a um lai cheng chuh mo puite chun a sun thei u a ahim? Himahlele a pasal ding chuh a kawm u apat puihmang ni hung tung intin, zie tieng chuleh an hun ngâwl un au.

¹⁶ Chun, kuoma’n puon lui puon khaih zung loh lai in a belh ngei puou; a belhbitna ding chun puon chuh kai ek zaw’n tin, hung ek lien zaw diek ding ahih ziekin.

¹⁷ Kuoma’n uain thak savun uain pêng luia le a khum ngei puou hi; khutilochun savun pêng haw chu puokcheh in, uain chu kibuo zo in tin, savun pêng haw chu sie’na. Zieziekchun uain thak chuh savun uain pêng thak haw achun a thun zaw sek ui, tichun, phatak in a um gêl gêl sek ui,” a ti a.

Sukdamna Thilmak Nih te

¹⁸ Zie thu haw chuh a kawm u a a gen lai takin, ngaitie, vaihawmtu khat a kawmah a hung a, a chibai a, “Ka chanu tu tak khan a thi a, himahlele hung in la, a chungah na khut hung nga leh chin hung hing kit ina,” a ti a.

¹⁹ Tichun, Isu chuh a kipan a a zui ta a, a sinsakte’n le a zui u a.

²⁰ Chun, ngaitie, numei khat, kum sawm leh kum nih thiput a damlo a nung ah a hung a, a puonmawng a tham a;

²¹ “A puonmawng mai tham leng le hihdam in um ing ka” tih a lungvei ahi.

²² Tichun, Isu a kiheia, amah nu chuh a mu a, “Ka chanu, lungmuong takin um ah; na taksanna hi na dampih ahi,” a ti a. Tichun, numei chuh zie dâkkâl apat chun a hung dam ta a.

²³ Chun, Isu chuh vaihawmpa ina a lut phet in, châmngai mût haw leh, mipi puok vengvung haw chu a va mu a,

²⁴ “Pawtdawk un, chapangnu chuh a thi puoi, a ipmu ahi zawi,” a ti a. Ziephet chun, amau haw chun amah chuh a nuihsan mai tau a.

²⁵ Himahlele, mipite chuh a nawhdawk zawh nung u chun a lut a, chapang chuh a khut in a tu a, tichun a hung tho dawk ta a.

²⁶ Zie apat chun zie gamsung chengcheng achun a thu a kithang dawk ta a.

Isu’n Mitdûk Nih a Sukdamna

²⁷ Chun, Isu chuh zie tak apat chu a chieh zel a, mitdûk nih in a zui u a. “David chapa, kei uh ei lungsiet ah,” tin a kiko u a.

²⁸ Chun, In a a lut phetin, mitdûk haw chuh a kawmah a hung u a. Isu’n a kawm u ah, “Ziehi hih thei dingin nei gingchau hi?” a ti a. Amau haw chun, “Gingcha e, Lalpa” a tiu a.

²⁹ Ziephet chun, Isu’n a mit uh a khawih sak a, “Na taksan bangun na chungu ah tung hen,” a ti a. Tichun, a mit uh a hun hak tau a.

³⁰ Isu’n a kawm u ah, “Chingthei unla, kuomah hetsak kiu in,” ti’n a khap chakkêi a.

³¹ Himahlele, amau haw chuh a pawtdawk u a, zie gam chengcheng achun a chanchin a kithan sak tau a.

Isu’n Pautheilo a Sukdamna

³² Chun, a pawt lai tak un, ngaitie, mi khat thitha mat, pautheilo a kawmah a hun pui u a.

³³ Thitha chuh a delhdawk phetin, pautheilo chuh a hung pau ta a, mitin chun mak a sa mah mah tau a. “Israel te lak ah zie tawbang hi I mu kha puou hi,” a tiu a.

³⁴ Himahlele Pharisaite chun, “Thitha lengpa ziekin ahi, thithate a delhdawk sek hi,” a tiu a.

Isu’n Mipite a Hehpihna

³⁵ Isu chuh khawpi leh khuo neu haw achun a chieh viel a. Kikhawpna Inhaw achu sinsak in, Gam chanchin pha thu gen in; natna tin cheng leh damlo tin cheng chuh a hihdam a.

³⁶ Khutichun, mipite chuh a muh in, chingpa neilo, belamte guola gimthei leh dalh a a um ziekun a lungsiet ta mah mah a.

³⁷ Tichun, a sinsakte kawm achun, “Buh ât ding a tam ten ngâl in, himahlele a sem ding mi atawm ui;

³⁸ khutichun, a buh ât ding a sem ding haw chu sawl dingin buh neipa kawm achun ngên un,” a ti a.