MATTHAI 8 - PATHIEN LEKHABU THIENGTHO (BSI)

Isu’n Phâk a Sukdamna

¹ Chun, Isu tâng apat a a hung suk lai in, mipi nasatak in amah a zui u a;

² Chun, ngaitie, a kawmah phâk khat a hung a, “Lalpa, na nawp leh nei hih thiengtho thei hi,” tin a masang ah a khupdin a.

³ Ziephet chun, Isu’n a vak bân a, a na tham a, “Ka nuom hi, a na thiengtho tan,” a ti a, tichun thakhat in a phâk chuh a hung thieng ta a.

⁴ Tichun, Isu’n a kawmah, “Kuomah hilh lo dingin chingthei ah; amahvang chuh chieh in la, thiempu kawmah va ki-etsak in la; Mosi’n thilpiek ding a tih haw kha va pie’n, mipite’n a hetchetna dingun,” a ti a.

Sepaih Hotu Suok Sukdamna

⁵ Chun, Isu Kapernaum khuo a a lut phetin, a kawmah sepaih za lawiupa khat a hung a,

⁶ “Lalpa, ka suokpa zeng in In ah a kuol zing a, a na gim mah mah mai hi,” ti’n a vak ngên a.

⁷ Isu’n a kawmah, “Hung ing ka ting, hihdam ing ka,” a ti a.

⁸ Sepaih za lawiupa chun, “Lalpa, ka in sung na lutna tak ahi puoi, thu mai gen leh chinle ka suokpa chuh dam zieng ina.

⁹ Keile mi thunuoi a um ka hi a, ka nuoi ah sepaihte a um u a. Khat kawma chuh, ‘Chieh in,’ ka tih leh a chieh sek a; a dang kawma chuh, ‘Hung ah’ ka tih leh a hung sek hi; chuleh, ka suok kawma chuh, ‘Ziehi hih in’ ka tih leh a hih sek ngâla,” ti’n a dâwng a.

¹⁰ Chun, Isu’n zie thu haw chuh a zak in mak a sa a, amah zui haw kawm achun, “Tihtakzet a ka hun hilh na hiu hi, Israel te lak ale hitibang taka taksanna nasa hi ka mu kha puoi.

¹¹ Ka hun hilh na hiu hi, suohlam leh tumlam apat in mi tamtak hung untin, van gama guolvakna achun Abraham te, Isak te leh Jakob te chu tawh chu khawm un au.

¹² gam chate vang chuh pawlam thima paih dawk in um untin, zie tak achun kah leh hagiel um ina,” a ti a.

¹³ Chun, Isu’n sepaih za lawiupa kawm achun, “Chieh ta’n, na ginchak guol tak chun nanga dingin hihin um hen,” a ti a. Tichun. a suokpa chuh zielai tak chun a dam ta a.

Mi Tampi Sukdamna

¹⁴ Chun, Isu Peter ina a lut in, a zinu nu chuh khawsik a kuol a mu a.

¹⁵ Tichun, a khut chuh a tham sak a; a khawsik chuh a pha ta a, tichun a tho a, Isu zenviel chun a pang ta a.

¹⁶ Chun, nitâk lam a hung hih phetin, a kawmah thitha mat haw tamtak a hun pui u a; chun, a thu’n thitha haw chuh a nawhdawk a, damlo chengcheng a sudam a.

¹⁷ Ziehaw chuh thiemgau Isai in: Amah ngêi in I hatlohna teu a lamang a; I natnateu a puoi! ti a a gen chuh a hung guitun theihna dingin ahi.

Isu Nungzui Dingte

¹⁸ Isu’n mipi nasatak a kimvela um a muhin, a Sinsakte chuh dîl gâl leh lama kai ding chun thu a pie a.

¹⁹ Chun, dân sinsaktu khat a hung a, a kawmah, “Sinsakpa, na chiehna lam chengah hun zui ing ka,” a ti a.

²⁰ Isu’n a kawmah, “Si-âlte’n kuo a nei u a; vachate’n bu a nei u a, himahleh, mihing chapa hin vang lungakna ding a nei puoi,” a ti a.

²¹ Chuleh, a sinsakte laka mi dangin a kawmah, “Lalpa, ka pa ei vuih sak tadih in,” a ti a.

²² Himahlele Isu’n a kawmah, “Nei zui ah; mithi’n amau mithi kivuih u heh,” a ti a.

Isu’n Huihpi a Vauthipna

²³ Chun, Isu chuh lawng sung ah a lut a, tichun, a sinsakte’n a zui lut tau a.

²⁴ Chun, ngaitie, dîl achun huihpi nasatak a hung nung ta a, tichun, tui kinawk in kuong chuh a khuh thulthul zieng a, Isu chulah lawng mei lam achun a ipmu a.

²⁵ Sinsakte chuh a kawmah a chieh u a, a phawng u a, “Lalpa, ei hukbit ah, mangthai ding ka hiu hi uo,” a tiu a.

²⁶ Isu’n a kawm u ah, “Taksan tawm te haw, bang dinga lau na hiu hi?” a ti a. Zie nung chun a tho a, huih leh dîl chuh a gai a; tichun a hai kêi zieng ta a.

²⁷ Tichun, mihaw chun mak a sau a, “Zie pa hi bang tawbang mi a hi die! Huih leh dîl nasan inle a thu a ngaih u hi?” a tiu a.

Thitha mat Mi nih Sukdamna

²⁸ Chun, gal khat lam Gedarin mite gam chuh a tun phetin, thitha mat nih, thân apat a hung pawt hin a kituokpih u a, a hâng mah mah u a, a lauh-um ziekun kuoma’n zie lampi chuh a hawh ngam puou hi.

²⁹ Chun, ngai tie, amau chun, “Isu, nang Pathien chapa, nang leh kei u nih in banga kitihmatna I neih uh? a hun maa ei sugimthei dinga taka hi hung na him?” tin a kiko u a.

³⁰ Chun, a umnau apat a gamla deuh ahin vawk hawn a tau a.

³¹ Thitha haw chun, “Nei nawhdawk leh vawk hawn sunga lut ei phalsak in,” tin Isu kawmah a ngên u a.

³² Isu’n a kawm u ah, “Chieh tau un la,” a ti a, tichun a hung pawt u a, vawk hawn sung achun a va lut tau a. Chun, ngaitie, vawk hawn chengcheng chuh kâwl lak ah a taitha suk u a, dîl ah a tailut u a, tui hapvah in a thi zo tau hi.

³³ Tichun, a vulhte chuh a tai u a, khawpi achun a chieh u a, thil umzie chengcheng leh thitha mat te chunga thil tungte chuh a va hilh tau a.

³⁴ Chun, ngaitie, a khawzang un Isu dâwn dingin a hung dawk u a; amah a muh phet un a gam u apat pawtdawk dingin a ngên uh a.