MATTHAI 7 - PATHIEN LEKHABU THIENGTHO (BSI)

Awihmawhna Thu ah

¹ “Awimawh kiu, awihmawha na um lohna dingun.

² Na awihmawh guol mah un hun awimawh ding ahiu a, na tehna mah u a hun teh sakkit ding ahiu hi.

³ Chun, bang zieka nang mita inkam um chuh ngaihtuoh sam lo a, na suohpih mita buok neucha lut chuh na muh a?

⁴ Ahihloh leh, bangti’n a na suohpih kawma, ‘Na mita buok thêm ei lâkdawk sak in,’ na tih theih ding, nang mita inkam um zing ngâl a?

⁵ Nang, migukhah! nang mita inkam chuh ladawk masah; zie tieng chuleh na suohpih mita buok them um lâkdawk ding chuh chientakin mu thei in la.

⁶ “Uicha thil thienglim pie kiu; vawk masanga le na tuikawk suong uh paih kiu in, khutilochun chil sie khau in tin, kihei in hun pîk tel kha’n au.

Ngên un, Hawl un, Kiu un

⁷ “Ngên un, tichun piek in um unlau; hawl un, tichun mu’n lau; kiu un, tichun hawn sak in um unlau;

⁸ kuole a ngên ta chuh piek in um untin, a hawl ta chun mun au, a kiu ta chule hawn sak in um un au.

⁹ Ahihloh leh, na lak u a kuole a chapa’n chângthâk ngên leh, kuo a suong pie ding?

¹⁰ Ahihloh leh, nga hun ngên taleh kuo a gûl pie ding?

¹¹ Khutichun, nang haw migilote’n bawn na chateu thilpha piek na dân na het u chun, na Pau van a um chun a ngente chuh thilpha pie zaw khawp lo ding maw?

¹² “Khutichun, thil bangakai mi’n na chung u a hih dinga na deih ding u chuh mi chunga le hih un; zie chuh Mosi dân thu leh thiemgaute thu ahi ngâl a.

¹³ “Kawt chîp a chun lut un, manthaina a chiehna kawt chuh a zan a lampi le a za ngâl a; zie lama lut chuh tam le a tam ui.

¹⁴ Hinna a chiehna kawt chuh a chîp a, a lampi le a tiek a, a mute le tawmcha ahiu hi.

Thing leh a Gah

¹⁵ “Thiemgau lêmte lak achun chingthei un, ziete chuh belam vun silh in na kawm u ah a hung sek u a, a sunggil lam u chulah ngei gawlham tak tawbang ahi ngâl u a.

¹⁶ Amau haw chuh a gah u ah he zieng un lau. Mi’n khaulingnei kung ah grep gah a lo ngei u a ahim? Lenling a le theipi a lo ngei u a ahim?

¹⁷ Zie guol mah chun thing pha ta chuh a gah pha sek a; himahleh, thing sie vang chuh agah sie sek hi.

¹⁸ Thing pha chuh a gah sie thei puoh a, thing sie le a gah pha thei diek puoi.

¹⁹ Thing tin gah phalo ta chuh a phuk u a, meia seh lut ahi sek hi.

²⁰ Zieziekchun amau haw chuh a gah u ah he’n lau.

Ka Hun He Kha Puoi

²¹ “Lalpa, Lalpa, ei ti tacheng van gama lut zieng ding ahi puou a; ka pa van a um deih bang hihte vang lut un au.

²² Zie ni chuleh mi tamtak in, ‘Lalpa, Lalpa, na min in thu ka gen u a, na min in thithate ka nawhdawk un; na min in thilmak tamtak ka hih sek uh hilo ahim?’ hun ti’n au.

²³ Zie tieng chuleh, ‘Nang haw thil gilo hihte, ka hun he kha puoi, ka kawm apat chieh mang un’ tin amau haw chuh hilh ing ka.

In Satu Nih te

²⁴ “Khutichun, kuole zie ka thugente hi za a, zawp chuh mipil, suongpi chunga In sa tawbang chuh ahi.

²⁵ Guoh a hung zu a, tui a hung lien a, huih a hung nung a, zie In chuh a hun mût ek ek a; himahleh a chim diek puoi, suongpi chunga kilem det ahih ziekin.

²⁶ “Chuleh, kuole zie ka thugen haw hi za a, zawp lo chuh mi ngawl, pîlnel chunga in sa tawbang chuh ahi.

²⁷ Guoh a hung zu a, tui a hung lien a, huih a hung nung a, zie in chuh a hun mût ek ek a; a chim ta a, a chim chuh a nasa mah mah hi,” a ti a.

²⁸ Zie thu haw chuh Isu’n a gen zawh phet chun, mipite chun a thu sinsak dân chuh mak a sa mah mah u a.

²⁹ Dan thu zik haw bang lo a, thuneihna nei guol taka mi a sinsak ziekin.