MATTHAI 5 - PATHIEN LEKHABU THIENGTHO (BSI)

Tang chunga Thugen

¹ Tichun, mipite chuh a muh phetin tângah a chieh to a, chun, a chu a. A sinsakte a kawmah a hung u a;

Hamphatna

² Tichun, a sinsak pan ta a:

³ “Thagau lama tasam kisate chuh a hamphau hi; van gam amau a ahi ngâl a.

⁴ “Pûlthuokte chuh a hamphau hi; lungmuon a hung um ding ahi ngâl u a.

⁵ “Nuoilutchuhte chuh a hamphau hi; lei hun luoh ding ahi ngâl u a.

⁶ “A diktatna ziek a gilkiel a dangchâkte chuh a hamphau hi; hung tai ding ahi ngâl un.

⁷ “Mi lungsiet thei takte chuh a hamphau ui; lungsietna hun lawh ding ahi ngâl u a.

⁸ “Lunggil a thiengthote chuh a hamphau ui; Pathien hun mu ding ahi ngâl un.

⁹ “Chamna siemte chuh a hamphau ui; Pathien cha a vawh a hung um ding ahi ngâl u a.

¹⁰ “Diktatna zieka sukgimtheih thuok sate chuh a hamphau ui; vangam a mau a a hi ngâl a.

¹¹ “Mi’n kei zieka a hun gaih u a, a hun bawl gimtheih u a, lepchieh a gitlohna tin chenga a hun hêk tieng u leh hung hampha’n lau.

¹² Kipak unla nasatak in lawp un, van ah na kipahman uh a um tam ngâl a; khutibangmah chun na mau a thiemgau umte khale a na bawl gimthei sek uh ahi kha.

Chi leh Vak a Tehkalna

¹³ “Lei chi na hiu hi; himahlele chi hi tam ta leh, bang in a hih al kit ta die? Zie a kipat chun paih dawk a, mihiemte tawhphah maimai ding ngâllo chun bangmah in a mat theih puoi.

¹⁴ “Khawvel vak na hiu hi. Tang chunga khuo um chuh selguk theih ahi puoi.

¹⁵ Mi’n thaumei de’n dan nuoi ah a kawih ngei puou a, thaumei kawihna ah a kawih zaw sek ui; tichun, In sunga um chengcheng chuh a salhvak sek hi.

¹⁶ Zie tawbang chun na vak u chuh mi mitmuh in vak hen; khutichun, na nasep phat teu chuh muu untin, na Pau van a um chuh pakcha thei un au.

Dan Thua Sinsakna

¹⁷ “Dan thu ahim, thiemgaute thu ahim sumangthai dinga hung ka hih gingcha kiu; sumangthai dinga hung ka hi puoh a, subukim dinga hung ka hi zawi.

¹⁸ Tihtakzet a ka hilh na hiu hi, lei leh van a beihmang masang sieh, dân thu a sutvawm neucha ahim, thaihvawm neucha ahim hi a bawna a tunkim masang sieh khatcha hile beimang hiel puo’n a.

¹⁹ Zieziekchun kuole zie thupiek neupen te laka khat mai le bawhsie a, zie banga chuh hih dinga mi sinsak ta chuh, van gam achun mi neupen te hi’n a; amahvang chuh kuole zawpa, zie banga mi sinsak ta chuh van gam ah milien tih hi’n a.

²⁰ Na diktatnau in Danthuzikte leh Pharisaite diktatna a khel loh chun van gam ah lut hiel puo’n lau, tih ka hilh na hiu hi.

Lungnatna Thua Sinsakna

²¹ “Malaia mite kawm, achun, ‘Tuol na thah ding ei puoi,’ tih leh, ‘Kuole tuolthat ta chuh vaihawmna a dingin lauhthawng-um takin um ding ahi,’ kiti na za tau hi!

²² Kei chun chuh, ‘Kuole a suohpih chunga lungna ta chuh vaihawmna a dingin lauhthawng-um takin um zing un tin’; kuole a suohpih kawma, ‘Raka’ ti ta chuh vaihawmte thutan saka um in lauhthawng-um takin um zing untin; chun, kuole ‘More’ ti ta chuh Gehen meia paih lauhthawng-um takin um un au, tih ka hilh na hiu hi.

²³ Zieziekchun maichâm bula na thilpiek ding na hun chawih a, zie muna chuh na suohpih in na chunga lungkim lohna a nei hi tih na het chun;

²⁴ zie maichâm maa chun na thilpiek chuh nusieh in la, chieh in la, na suohpih kichampih masa’n la, zie tieng chuleh chieh in la, na thilpiek chuh pieh.

²⁵ “Na kilanpih chuh lampi a na kitawn pet u chun kichampih vak ah; khutilochun na kilanpih chun vaihawmpa hun matsak in tin, vaihawmpa chun mi mante kawmah hun pie’n tin, suongkul a khum in um khan la.

²⁶ Tihtakzet a ka hilh na hiu, paisa khat chana na dit zawh masieh chuh zie apat chuh pawt hiel puo’n la.

Zawlsaihna Thua Sinsakna

²⁷ “Malaia mite kawmah, ‘Zawl na saih ding ei puoi,’ tih ahi tih na za tau hi.

²⁸ Ken chuh, ‘Kuole numei zawl mit a en ta chuh, lunggil in zawl a sai tai,’ tih ka hun hilh na hiu hi.

²⁹ Khutichun, na mit changlam in a hun sukpuk chun kheuhdawk in la, paih mang in; na sapum Gehen a paih a hih sangin na sapum ka khat beihmang chuh nang dingin a pha zawi.

³⁰ Chun, na khut changlam in a hun sukpuk chun tan in la, paihmang in; na sapumpi Gehen a paih a hih sangin na sapum ka khat beih mang chuh nang dingin a pha zawi.

Kimakna Thua Sinsakna

³¹ “ ‘Kuole zi ma ta chun kimâkna lehkha amah chuh pie hen,’ tih ahi.

³² Ken chuh, Kuole zawlsaih ziek hilo a zi ma chun amah chuh zawl a saih sak ahi a; chun, kuole kimasa nu kichênpih chuh zawlsai ahi tih ka hun hilh na hiu.

Thutiem Chunga Sinsakna

³³ “Malaia mite kawmah, ‘Zuou in kihâksiel ki’n la, himahleh, na kipautiemna chuh Lalpa kawmah hih muolsuoh zaw’n, tih ahi,’ tih na za tau hi.

³⁴ Himahleh ken ka hun hilh na hiu hi: Kihâksiel himhim kiu in; van sam in kihâksiel kiu; zie chuh Pathien lalchutphah ahi ngâl a;

³⁵ lei sâm in le kihâksiel diek kiu, zie chuh a keng ngakna ahi ngâl a; Jerusalem sâm in le kihâksiel kiu, zie chuh lal lopi tak khawpi ahi ngâl a.

³⁶ Na luchang uh sâm in le kihâksiel kiu, sam zang khat le na hih vawm un, na hih vam thei puoh ngâl u a.

³⁷ Na thugen u chuh ahi chuh hi, hi zieng hen la, a hilo chuh a hilo hi zieng hen; a vum a val chuh migilo apat a pawt ahi ngâl a.

Phuba Lâkna Thua Sinsakna

³⁸ “Mit sika mit, ha thasanga ha, a kiti na za tau hi.

³⁹ Ken chuh ka hilh na hiu hi: Na chung u a gilote chung achun phuba la kiu in. Kuon le, na bieng changlam u a bet u chun a lehlam le dawh un.

⁴⁰ Chun, kuon le na chung u a thusie bawla, na puonâk uh lak a guot leh na puon u le lâksak ngâl u.

⁴¹ Kuon le, mel khat chieh dinga a hun ngek leh mel nih chieh un.

⁴² A hun ngên chuh pieu inla, thil hun palâk nuom chuh kiheimangsan kih.

Melmate Hehpih Ding

⁴³ “Na vengte hehpih in la, na melma muhdah ah; a tih uh na za tau hi.

⁴⁴ Ken chuh ka hun hilh ahi: Na melmateu hehpih un la, a hun samsie te chuh paucham sak un la, a hun mudahte chuh bawlphau un la, bangmah a hun ngailote leh a hun sugimtheite chuh paucham sak un,

⁴⁵ ti a chuh na Pau van a um chate na hih theihna ding un. Amah chun mi gilote leh mi phate chunga le ni kibang in a suoh sak sek a; mi pha leh mi phalote chunga le guoh a zuk sak ngâl a.

⁴⁶ Nanguh hun hehpihte mai na hehpih u hin bang kipahman a na muh ding uh? Siehdawlte nasan in zie bang chuh a hih sek uh hilo ahim?

⁴⁷ Chun, na suohpihteu mai na chibai u hin mi dangte sanga banga na hih phat diek uh? Siehdawlte nasan in zie bang chuh a hih sek uh hilo maw?

⁴⁸ Khutichun, na Pau van a um a phat bukim guolin na phat bukim dinguh ahi.