MATTHAI 28 - PATHIEN LEKHABU THIENGTHO (BSI)

Isu Thawhkitna

¹ Chun, chawlhni zawh a, chawlhkal khat dinga ni masapen a, khuo a vak ding kuon in, Mari Magdalin leh Mari dang chuh thân en dingin a chieh u a.

² Chun, ngaitie, inling nasatak in a hung kilîng a, Lalpa vânsâwlchâk, van apat in a hung kum a, suong chuh a hun lik chawn a, a chungah a chu ta a.

³ A mel latdan chuh kawlphe bang ahi a, a silhlechen chuh vuk guolin a vam a.

⁴ Chun, amah a lauh ziekun a ngakte chuh a kithing u a, mithi guolin a um tau a.

⁵ Chun, vânsâwlchâk chun numeite chuh a hopih a, a kawm u ah, “Nangun chuh lau kiu in! Isu a khetdên u kha hawl na hiu hi tih ka hêi!

⁶ Zie tak ahin a um ta puoi; a gen guol ngêi in a tho kit ta kha. A kuolna mun hi hung en mah tiem u.

⁷ Khutichun, chieh vak unla, a sinsakte kawmah, ‘Mithi lak apat a thokit tai; ngaitiem u, Galili gam ah na mau ah a chieh hi; zie tak achun amah chuh mu’n lau,’ ti’n hilh un. Ka hun hilh sa kha hezing un,” a ti a.

⁸ Tichun, lau leh kipâk mah mah kawmin thân apan chun a chieh mengmeng u a, sinsakte hilh dingin a tai tau a.

⁹ Chun, ngaitie, Isu’n amau chuh a kituokpih a, “Chibai le,” a ti a. Tichun, amau chun a kêngpêk chuh a tuu a, a chibai u a.

¹⁰ Chun, Isu’n a kawm u ah, “Lau kiu in, chieh tau in la, Galili gama chieh dingin ka suohpihte va hilh un, zie tak achun, ei mu ding na hiu,” a ti a.

Thân Veng Sepaihte

¹¹ Chun, numeite chuh lampi a a chieh lai u chun, thân veng sepaihte chuh khawpi lam zuon chun a chieh u a, thil umzie chengcheng chuh thiempu liente chuh a va hilh tau a.

¹² Tichun, thiempu liente chuh upate chu tawh a kihokhawm uh a, sepaihte kawma chun dangka tamtak a pieu a,

¹³ A kawm u ah “Zan a ka ihmut kal un, a sinsakte chuh a hung uh a, amah chuh a hung gûk uh ahi, mipite kawma na tih dinguh ahi, a tiu a.

¹⁴ Tichun, gam vaipawpa’n zie chuh a na het tieng leh, amah chuh thêm lungdam ing ka ting un; tichun, hun hukdawk thei ding ka hiu hi,” a tiu a.

¹⁵ Khutichun, dangka chuh a lau a, a hilh guol u chun a hih tau a; tichun, zie chuh tu tieng hin Judate lak achun a gen vengvung u a.

Nungzuite kawma Isu kilâkna

¹⁶ Himahlele, sinsak sawmlekhatte chuh, Isu’n tâng a guot sak na muna chun a chieh u a.

¹⁷ Chun, amah a muh phet u chun, a chibai u a; kimkhat chun chuh a ginglah u a.

¹⁸ Tichun, Isu chuh a kawm u ah a hung a, a kawm u ah, “Lei leh van a thuneihna chengcheng ka kawma piek ahi tai.

¹⁹ Khutichun, chieh un la, namtina mi sinsak in siem un la, Pa leh Chapa leh Thagau thiengtho min chun baptist un la;

²⁰ Chun, thu ka hun piek chengcheng hi pawm dingin hilh un. Chun, ngaitiem u; Kei, kumkhuo’n, khawvel beih tiengin le na kawm u ah um zing ing ka,” a ti a. Amen.