MATTHAI 26 - PATHIEN LEKHABU THIENGTHO (BSI)

Isu thah dinga phielgukna

¹ Chun, Isu’n zie thu chengcheng chuh a gen zawhin, a sinsakte kawmah,

² “Ni nih hal leh Chiehkân Kut hung um ding ahi tih heu un, Mihiem Chapa hi khetdên dingin matsak ding ahiu hi,” a ti a.

³ Zie lai chun Thiempu lienpen Kaiapha a tih pau in huongsung achun thiempu liente leh vantâng upahaw chuh a kikhawm u a,

⁴ Isu chuh a gûk a mata thah theihna dân ngaihtuoh in a kiho u a.

⁵ “Kut sungin vang I hih loh ding uh ahi, khutilochun vantâng lak ah buoina hung um khâna,” a tiu a.

Bethani a Isu Thaunuhna

⁶ Chun, Isu chuh Bethani khuo a Simon, mi phâkpa In a a um lai in,

⁷ numei khat alabasta bawma thau gimlim tak chawi in a kawmah a hung a, ankuong um dinga a chut lai takin a luchang ah a sung a.

⁸ Himahlele, sinsakte chun zie chuh a muh phet un a lungnau a, “Bang dinga ti a hi sumang maimai na him?

⁹ Zie thau hi man tamtak a khawt a, mi gimtheite kawma piek theih a hi ngâl a,” a tiu a.

¹⁰ Isu chun zie chuh a het phet in, a kawm u ah,

¹¹ “Numei hi bang dinga subuoi na hiu hi? Ka chunga hin thil phatak a hih ahi. Mi gimtheite chuh kumkhuo a na kawm u a um zing ahiu hi; kei vang chuh kumkhuo a na kawmuh a um ding ka hi puoi.

¹² Zie thau gimlim ka sapum a a sun hi vuih dinga kiguotlawk ding etsakna a a hih ahi.

¹³ Tihtakzet a ka hilh na hiu hi, khawvel pumpi ah, hâwi ale zie Chanchin pha hi a gen na cheng u ah, zie numei thilhih hile amah hetzingna dingin gen zel un au,” a ti a.

Juda’n Isu a Matsak hi

¹⁴ Zie nung chun sawm le nih te laka mi khat, Juda Iskariot a tih pau chuh, thiempu liente lak ah a chieh a,

¹⁵ “Amah chuh hun matsak ing ka ting, bang nei pie ding u?” a ti a. Tichun. dangka sawmthum chuh a sim u a, a pie tau a.

¹⁶ Zie apat chun a matsak theihna ding dân âwng hawl in a um ta a.

Chiehkân Kut Ankuong

¹⁷ Chun, chângthâk chawl tello Kut ni, ni khat ni chun sinsakte chuh Isu kawmah a hung u a, “Chiehkân Kut an nek na dingin hawi ah hun guot sak leng na nuom hi?” a tiu a.

¹⁸ Amah chun a kawm u ah, “Khawpi ah kuo ahim kawmah chieh un la, a kawmah; ‘Sinsakpa chun, Ka hun a nai ta a, ka sinsakte tawh Chiehkân Kut na In ah mang ung kau a tii,’ va tiu,” a ti a.

¹⁹ Isu’n a kawm u a a tih guol chun sinsakte chun a hih u a, Chiehkân Kut ankuong chuh a va guonggalh zo tau a.

²⁰ Chun, nitâk lam a hung hih phet in, sinsak sawm le nih te chu tawh ankuong a um uh a.

²¹ Ankuong a um lai un Isu’n, “Na lak uh a khat hin ei matsak in a,” a ti a.

²² Sinsakte chuh a lungkham ta mah mah uh a, a kawmah, “Lalpa, kei hi ka him?” a ti ta chiet u a.

²³ Amah chun, “Kuong ei sawkpihpa ngêi chun ei matsak ina.

²⁴ Mihiem Chapa hi, a chanchin a zik guol tak uh khan chieh ding ahii, himahlele, Mihiem Chapa matsak ding pa mihiem chung chuh a gik hi! zie mihiem chuh pieng kihen la hileh amah dingin phazaw’n a,” ti’n a dâwng a.

²⁵ A matsak ding pa Juda chun a dâwng a, “Rabbi, kei ka him,” a ti a. Isu chun, a kawmah, “Nangin na ti ta chula” a ti a.

Lalpa Nitâk Ankuong

²⁶ Chun, a nek lai un Isu’n chângthâk a la a, vang a pie a, a hekphel a, sinsakte kawmah a pie a, “Lau inla, neu in; ziehi ka sapum ahii,” a ti a.

²⁷ Chun, khawn a la a, kipahthu a gen a, a kawm u ah a pie a, “Na bawn un dâwn un,

²⁸ Ziehi ka thisana thugawlh thak, mi tamtak gitloh ngaihdamna dinga pawt chuh ahi.

²⁹ Himahlele, ka hilh na hiu hi, ka Pa gama nangmau haw tawh a thak ka dâwn ni a tun kit masangsieh, tu apat hin grep guia gah hi dâwn kit ta puo’ng ka,” a ti a.

³⁰ Chun, la a sau a, olive tâng achun a chieh tau a.

Peter in a Kilepsanna

³¹ Chun, Isu’n a kawm u ah, “Tu zan hin na bawn un ka chung thu ah lungkim lo in um vek un lau; ‘Belam chingpa chuh zêp ing ka ting, belam hawn chuh zak un au,’ tih zik guol khan.

³² Himahlele, ka thawh kit nung leh, Galili gam ah na mau ah chieh ing ka,” a ti a.

³³ Peter chun a kawmah, “A bawn un na chungah lungkim lo in um mah leu le, kei vang lungkim lo in um hiel puo’ng ka,” ti’n a dâwng a.

³⁴ Isu’n a dâwng a, “Tihtakzet a ka hilh na hii, tuzan hin âk a khuon man nangin thum vei ei kizuksan in la,” a ti a.

³⁵ Peter in a kawmah, “Na thihna achun thi ding hi lengle hun kizuksan puo’ng ka,” a ti a. Sinsakte cheng chun khutibang chun a ti ta chiet u a.

Gethsemani Huon a Isu Pauchamna

³⁶ Chun, zie zawh chun Isu chuh a sinsakte tawh mun khat Gethsemani kiti chuh a tung uh a, amah chun a sinsakte kawmah, “Taka khu ka va paucham sung cheng taka hin na chuu in,” a ti a.

³⁷ Peter leh Zebedai chapate nih chuh a kawmah a pui a. Lungkhamna leh thaphanna te’n a hun bawm ta a;

³⁸ tichun, a kawm u ah, “Ka lungthim a lungkham mah mah ta a, thihna kham hiel ahii; taka hin um unla, nei ven pih un,” a ti a.

³⁹ Chun, a malam ah kal bang zah ahim a suona, a khupbawk a, “Aw he pa, a hih theih ding chun, zie khawn hi ka kawm apat kichawn mang heh; himahlele, kei thu hilo in nangmah thu thu hi zaw hen,” tin a paucham a.

⁴⁰ Chun, sinsak te kawm lam achun a hung a, amau chuh ipmu’n a mu a, tichun, Peter kawmah, “E khai! nangun dâkkâl khat le ei venpih thei lo na hiu maw?

⁴¹ Thepna a na lut lohna dingun kiging zingin paucham un; thagau vangin a ngâp a, sapum vang chuh a hatlo ahi,” a ti a.

⁴² Tichun, Isu chuh a nihvei na ah a chieh kit a, a paucham kit a, “Aw hepa, ka dâwn loh a zie khawn hi kichawn mang theilo a hih chun, nang thu thu hi heh,” a ti a.

⁴³ A hung kita, amau haw chuh ipmu’n a mu kit a, a ihmut uh a suok ten ngâl a.

⁴⁴ Tichun, a taihsan kit a, a thumveina ah, a thugen ngei mah chuh gen in a paucham kit a.

⁴⁵ Zie zawh chun sinsakte kawm achun a hungkit a, a kawm u ah, “Tuhin chuh ipmuu inla, kichawl tau in! ngaitiem u! a phat a hung tung ta a, Mihiem Chapa hi mi gilote khuta matsak ding ahiu hi.

⁴⁶ Tho unla, chieh hitiu; entiem u! ei matsak ding pa chuh a hung nai tai,” a ti a.

Isu Mata A Umna

⁴⁷ Chun, a gen lai tak in Juda, sawm le nih te laka khat chuh a hung tung ta a, mipi tamtak tawh, Thiempuliente leh Danthuzikte leh upahaw kawm apat mipi nasatak, chemzâm leh khetbuk chawiin a hung tung kit zel tau a.

⁴⁸ A matsak ding pa chun mipite chuh a melchikna ding a na gen masak sa diem ahi a, “Ka châwp pên pên chuh hi’n a, amah chuh man un,” ti’n.

⁴⁹ Tichun, Isu chuh a va zuon pai zieng a, “Chibai, Rabbi,” ti’n, a châwp tuntun a.

⁵⁰ Isu’n a dâwng a, “Zawlpa, na hung lawh pên chuh hih kin in,” a ti a. Ziephet chun, Isu chuh a zuon u a, a man u a, a kân tau a.

⁵¹ Ziephet chun, Isu kawma umte laka khat chun a chemzâm a satdawk a, thiempu lienpen suokpa chuh a sat a, a bil a satthâk sak ta a.

⁵² Isu’n a kawmah, “Na chemzâm kha a pai ah thun kit ah; chemzâm mangte chuh chemzâm mah in thi ding ahi ngâl un.

⁵³ Tuhin le, vânsâwlchâk sanggup mun sawm le mun nih sanga tamzaw ei hun sawl sak dingin ka Pa kawma ngên thei lo dingin nei gingchau a ahi leh?

⁵⁴ Himahlele, ngên ta leng, bangti’n a, Pathien lehkha thu hiti banga hung um ding hi a tun theih ding?” a ti a.

⁵⁵ Zie lai tak chun, Isu’n mipite kawm achun, “Chemzâm haw, khetbuk haw chawi in suommangte man ding guolin ei man dinga hung pawt na hiu maw? Pathien Ho-In ah ni chengin mi sinsak in ka chu sek a, nei man ngâl puou a.

⁵⁶ Himahlele, thiemgaute lehkha thu haw chuh a hung tun kim theihna dingin ziehaw chengcheng hi hung um ahi ta hi,” a ti a. Ziephet chun, sinsakte cheng chun amah chuh a taihsan u a, a tai mang tau a.

Isu Vaihawmte Masanga A Dinna

⁵⁷ Isu mante chun Thiempu lienpen Kaiapha In a, danthuzikte leh upa te umkhawmna achun Isu chuh a pui a.

⁵⁸ Himahlele, Peter in gamla taka kihal in amah chuh a zuia. Thiempu lienpen In umna huongsung Inmai tiengin a va zui a, a tawpna muh guo’n mivengte lak achun a va chu a.

⁵⁹ Thiempu lienpen leh vaihawmte chun Isu a thah theihna dingun hêknadinga hawl u a,

⁶⁰ zuou thu a hetpihtu tamtak hung mah leu le a mu thei puou hi.

⁶¹ A tâwp chun mi nih a hung u a, “Zie pa hin Pathien Ho-In hi phel a, ni thum sunga sakit thei ka hi, a tii,” a tiu a.

⁶² Tichun, thiempu lienpen chuh a ding dawka, a kawmah, “Bangmah in na dawng paw maw? ziete hun hêkna hi bangti dân ahim?” a ti a.

⁶³ Isu chuh la a thip kêi a. Ziephet chun, thiempu lienpen chun a kawmah, “Pathien Hing min a ka hun vau na hi, Krista, Pathien Chapa chuh na him? Kei uh nei hilh in,” a ti a.

⁶⁴ Isu’n a kawmah, “Hi e, himahlele, ka hun hilh na hi, tunung leh, Mihiem Chapa hi Bangakai hihtheipa khut changlama chu a, van meipi chunga hung hun mu ding na hiu hi,” a ti a.

⁶⁵ Zie chun, thiempu lienpen chun a silhlechen haw chuh a bawtthêk a, “Pathien a gensie tai, hetpih dang bang zieka ngaih beh ding I hiu hi? Ngaitiem u, Pathien a gensiet dân chuh tuhin na he tau hi.

⁶⁶ Bangti’n na ngai u?” a ti a. Amau haw chun, “Thi tâk ahi,” ti’n a dâwng u a.

⁶⁷ Tichun, a maichang chuh chil a sietkhum u a, a zêp u a, chun, midang te chun a khut un a bêng u a.

⁶⁸ a bangin, “Nang Krista, kuo a hun bêng chuh? Kei uh nei hilh ah,” ti’n a bêng u a.

Peter in Isu a Kizuksanna

⁶⁹ Chun, Peter chuh pawlama huongsung achun a chu a, thiempu lienpen suok laka nungak khat a kawmah a hung a, a kawmah, “Nang le, Galili gama Isu kawma um khah na hi hi,” a ti a.

⁷⁰ Amah Chun, “Na thugen chuh ka he hiel puoi,” ti’n amau achun a kizuk a.

⁷¹ Huongsung apat a a hung pawt phet in nungak dang khatin amah chuh a na mu kit a, zie a umte kawm achun, “Zie pa hile Isu, Nazareth mi kawma um kha ahi hi,” a ti a.

⁷² Peter chun, “Zie mihiempa chuh ka he puoi,” ti a kihâksiel in a kizuk kit a.

⁷³ Hun chawmkhat hal in a kawma dingte chun Peter kawmah, “Nang hile, amau haw laka tel na hi chien kêi hi, na pau in a kihêi,” a tiu a.

⁷⁴ Chun, amah chun, “Zie Mihiempa chuh ka he puoi,” ti’n amah kisam sie’n a kihâksiel a. chun, âk a khuong pai zieng ta a.

⁷⁵ Tichun, Isu’n Peter kawmah, “Ak a khuon ma’n nangin thumvei nei kizuksan inla,” a tih kha a hun he dawk ta a. Chun, a pawtdawk a, hah kah in a kap ta a.