MATTHAI 25 - PATHIEN LEKHABU THIENGTHO (BSI)

Nungak Sawm Tehkalna

¹ “Zie phat chu leh, van gam chuh nungak sawm, a thaumei uh chawia moneipa muok dinga pawtte chu tawh tehkal hi’n a.

² A lak uh a mi nga a ngawl uh a, nga a ching ui.

³ A ngawlte chun a thaumei hawu a chawi u a, a tui a chawi tel puou a;

⁴ himahleh, a chingte chun a thaumei hawu a chawi u a, a ûm haw a chun a tui le a chawi tel u a.

⁵ Chun, moneipa chuh a hung hak ziekin a bawnu chun a na vuong u a, a na ipmu tau ahi.

⁶ “Chun, zan khangkim tak chun, aw khat a hung gi a, ‘Ngaitiem u, moneipa chuh a hung hi! a muok dingin hung pawt u uo!’ a hung kiti a.

⁷ Ziephet chun, nungak thiengte haw chuh a tho u a, a thaumei chiet u chuh a kiguot u a.

⁸ Tichun, a ngawlte chun a chingte kawmah, ‘Na thautui u kha kei u le ei pieu; ka thaumei hawu mit ding ahi,’ a tiu a.

⁹ Himahlele, a chingte chun, ‘Kei u ding leh nang u ding kiting puo’n a; a zuokte kawma chieh unla, va chaw zawu in,’ ti’n a dâwng u a.

¹⁰ Chun, chaw dinga a chieh mang kal u chun moneipa chuh a hung ta a; tichun, a kisazosa haw chuh a mah tawh lawih-an ne’n a lut uh a; chun kawt chuh a khâk tau a.

¹¹ “Zie nung chun nungak thieng dangte chule a hung tung u a, ‘Hepu, kawt ei hung hawn sak in kei u le!’ a tiu a.

¹² Amah chun la, ‘Tihtakzet a ka hilh na hiu hi, nang haw ka hun he puoi,’” ti’n a dâwng a.

¹³ “Khutichun, kiging zingin um un, a ni leh a phat na he ngâl puou in.

Talent Vawp Tehkal Thu

¹⁴ “Van gam chuh mi khat, gam danga chieh ding, a suokte sama, amau haw kawma a sum vawp sakpa chuh tawbang ahi.

¹⁵ Suok khat kawmah talent nga a pie a, a dang kawmah talent nih a pie a, a dang kawmah talent khat a pie a; a hih theih bang chiet un a pie a, tichun, a chieh ta a.

¹⁶ Tichun, talent nga vawppa chuh zie chun a kivei pai zieng a; talent nga mah a vei dawk a.

¹⁷ Khutibangmah chun talent nih vawppa chule a kivei a, talent nih mah a hun vei dawk ta a.

¹⁸ Talent khat vawppa chuh a va chieh a, lei a lai a, a pu dangka chuh a selgu zaw ta a.

¹⁹ “Chun, hun sawttak nung in a puu chuh a kawm u ah a hungkit a, a kawm u ah sum thu chuh a su tuok u a.

²⁰ Tichun, talent nga vawppa chuh a hung a, talent nga mah a hun chawih beh a, ‘Hepu, nangin talent nga nei vawp sak khan, en tie, talent nga mah ka hun vei dawk hi,’ a ti a.

²¹ A pu chun a kawmah, ‘Suok pha leh taksanum, na hih pha ie; tawmchah chungah taksan na um in, tamtak chungah hun um sak ing ka, na pu kipahna ah lut ah,’ a ti a.

²² Chun, talent nih vawppa chule a hung a, ‘Hepu, nangin talent nih nei vawp sak khah; entie, talent nih mah ka vei dawk hi,’ a ti a.

²³ A pu chun a kawmah, ‘Suok pha leh taksanum, na hih pha ie; tawmchah chungah taksan na uma, tamtak chungah hun um sak ing ka; na pu kipahna ah lut ah,’ a ti a.

²⁴ Chuleh, talent khat vawppa khale a hung a, ‘Hepu, mi ningkhel na hih ka hun he a; na tuh lohna ale na ât sek a, na thehzak lohna ale na lakhawm sek hi, tih ka he a.

²⁵ Zieziekchun, ka lau a, ka va chieh a, na talent kha lei ah ka vui gu a, entie, nanga mah kha na muh kit ahii,’ a ti a.

²⁶ A pu chun a kawmah, ‘Suok gilo leh zawmthaw pa, ka tuh lohna a le ka ât a, ka thehzak lohna ale ka lakhawm sek hi tih na he maw?

²⁷ Khuti a hih chun, ka dangka chuh sumkawlveite kawma na kawih ding na hi ta a, khutichun, ka hung hin keia hi a lawk tawh ka muh kit ding a hi a.

²⁸ Tichun, talent khat kha lâksak unla, talent sawm neipa kawmah pieu.

²⁹ Kuole, a nei ta piek beh un tin, hung hau ina. Kuole a neilo chuh a neihsun le lâksak un au.

³⁰ Suok phachuom lo kha pawlam thim ah paih dawk un; tak achun kah leh hagiel chuh um in,’ a ti a, a dâwng a.

Vaihawmna Ni

³¹ “Mihiem Chapa hi leng guola a vânsâwlchâkte tawh a lopina a kithuoma a hung tieng leh, a lopina chutphah chungah chu’n tin, a ma achun namtin kikhawm un au.

³² Belam chingpa’n kel apat a belam a khen guolin amau haw chuh khen in tin;

³³ belam haw chuh a changlam ah kawih in tin, kelhaw vang chuh a veilam ah kawih in a.

³⁴ Zie phat chu leh Lalpen chun a changlama mite kawm achun, ‘Ka pa vangsakte haw, hung un la, khawvel kisiem tûng apat nang u dinga guotsa chuh luoh un.

³⁵ Ka gil a kiel in nangun nek ding nei pieu a, ka dang a châkin nangun dâwn ding nei pieu a; malzin ka hih in nei tun sak uh a.

³⁶ Sangawn a ka um in, puon nei silh sak u a, ka damloh in nei veh u a, suongkul a ka um in, ka kawmah na hung ngâl u a,’ hun tina.

³⁷ Zie phat chu leh, mi diktatte chun, ‘Lalpa, bang tikin e, gilkiel a ka hun muh uh a nek ding ka hun piek uh? Dangchâk a ka hun muh uh a dâwn ding ka hun piek uh?

³⁸ Bangtik in e malzin a ka hun muh uh a ka hun tun sak uh? Sangawn a ka hun muh uh a, ka hun silh sak uh?

³⁹ Bangtik in a damlo in ahim, suongkul ah ahim ka hun muh uh a, na kawma ka hung uh?’ ti’n a na dawng un au.

⁴⁰ Zie tieng chuleh Lalpen chun a kawm u ah, ‘Tihtakzet a ka hilh na hiu hi, Zie ka suohpih neupen te laka khat chunga na hih u chuh, kei chunga hih na hiu hi,’ ti’n hun dâwng ina.

⁴¹ “Zie zawh chu leh, a veilam a mite kawm achun, ‘Hansie dawlte haw, kumkhuo mei, Diabol leh a sawlchakte dinga a guot sak uh achun nei chieh mangsan un.

⁴² Ka gil a kiel in, nangun nek ding nei pie puou a; ka dang a châkin nangun dâwn ding nei pie puou hi;

⁴³ Malzin ka hihin, nei tun sak puou a; sangawn a ka um in, puon nei silh sak puou a; damlo leh suongkul a ka um in, nei veh puou hi,’ hun tina.

⁴⁴ Zie phat chu leh, amau inle, ‘Lalpa, bangtik in e gilkiel in ahim, dangchâk in ahim, malzin in ahim, sangawn in ahim, damlo in ahim; suongkul ah ahim, ka hun muh uh a, ka hun zen loh uh?’ tin a na dâwng un au.

⁴⁵ Tichun, Lalpen chun a kawm u ah, ‘Tihtakzet a ka hilh na hiu hi, zie mi neupen te laka khat chunga na hih loh u chuh kei chunga hih lo na hiu hi,’ ti’n a na dâwng ina.

⁴⁶ Tichun ziehaw chuh kumkhuo gawtna ah chieh un tin, mi diktatte vang chuh kumkhuo hinna ah chieh un au,” a ti a.