MATTHAI 23 - PATHIEN LEKHABU THIENGTHO (BSI)

Pharisaite leh Danthuzikte a gaihna

¹ Chun Isu’n mipite leh a sinsakte kawmah thu a gen a,

² “Danthuzikte leh Pharisaite chuh Mosi dante lehdawk dinga guot ahiu a.

³ Zieziekchun, a hun hilh tâk u chuh hih unla, zawp zel un; himahleh, a thilhih guol vang u chuh hih kiu in, gen vang chuh a gen sek u a, a zawp sek puoh ngâl u a.

⁴ Puokgik dahum tak a siem u a, mi liengko ah a nga sek u a; amauhawn la, zie puokgik dâwn ding chun a khutzung khat u le a tawih sak nuom puoh ngâl u a.

⁵ A thilhih chengcheng u chuh mihiemte muh dinga a hih sek uh ahi. A thilbuhteu leh kawpteu chuh a pêk a hih lien sek u a, a puonmawng uh a hih bawk lien u a,

⁶ guolvakna a mun phapen leh, kikhawpna In a chutphah phapen leh,

⁷ dawlmun a chibai leh, mi’n ‘Rabbi’ a tih hawu chuh a deihchuom sek ngâl u a.

⁸ Nang haw vang chuh ‘Rabbi’ tih dingin um kiu in, na sinsakpau chuh khat chauh ahi ngâla, zie chuh Krista ahi. Chuleh, nang haw chengcheng le unau na hi ngâl u a.

⁹ Chun, lei chunga hin kuomah, ‘Hepa’ ti kiu in, na Pau chuh khat chauh ahii van a um khuh.

¹⁰ ‘Lamkaite’ tih dingin le um kiu in, na lamkai u chuh khat chauh ahi,

¹¹ Na lak uh a lienpen chuh nang haw hun zen viela pang zaw ding ahi.

¹² Kuole, amah kingailul ta chuh niem intin, kuole amah kingainiem ta chuh chawihsân in um ina.

Isu’n Migukhahte a Demna

¹³ “Himahlele, nang haw, Danthuzikte leh Pharisai gukhahte haw, na chunguh a gik hi! van gam chuh mi dingin na khâk u a,

¹⁴ Nang haw la na lut ngâl puou a, mi lut ding le na zanuom kit puou a.

¹⁵ “Na chung uh a gik hi! Nang haw, Danthuzik leh Pharisai, mi gukhahte haw, gingtu khat siemna dingin, tuisuohgiet leh lei chung na chieh kimvel u a, chun, tawbanga chuh a hung um tieng leh, amah chuh nangmau haw sangin a lehnih in Gehen chapa’n na siem kit ngâl u a.

¹⁶ “Nang haw, lamkai mitdûk, ‘Kuole, Pathien Ho-In sama kihâksiel ta, zie chuh bangmah ahi puoi; himahlele, kuole Pathien Ho-In a sana sama kihâksiel ta chun, zie chuh a muolsuoh tei ding ahi,’ tite haw, na chunguh a gik hi!

¹⁷ Nang haw, mingawl, mitdûk haw, sana suthiengtho pên Ho-In leh, sana chuh a hâwi hi a lopi zaw?

¹⁸ ‘Kuole, Maichâm sama kihâksiel ta, zie chuh bangmah a ti puoi; a chunga thilpiek um sama kihâksiel vang chun chuh a muolsuoh tei ding ahi,?’ na tiu hi.

¹⁹ Nang haw mitdûkte haw, thilpiek hih thiengtho pên maichâm leh, thilpiek chuh a hâwi hi a lopi zaw?

²⁰ Khutichun, kuole, maichâm sama kihâksiel chuh, maichâm leh a chunga thil um chengcheng sâm in a kihâksiel ahi.

²¹ Kuole Pathien Ho-In sama kihâksiel ta chun, Pathien Ho-In leh a sunga thil um chengcheng sam chun a kihâksiel ahi.

²² Kuole, van sama kihâksiel ta chun le, Pathien lalchutphah leh a chunga chuh pa sâm in a kihâksiel ahi.

²³ “Na chunguh a gik hi! Nang haw, Danthuzik leh Pharisai gukhahte haw! Pudina leh pathikhawm, chuleh zira cheng hi sawma-khat na tuok sek u a, himahleh, dân thu khawk zaw diktatna, lungsietna, ginumna haw chuh na ngaitam ngâl sek un; ziehaw chuh a puo na hih dinguh chuh, a dangte chuh haihsan diek lo in.

²⁴ Nang haw lamkai mitdûk, thosi thit ngim a, sangawngsau valh zawte haw!

²⁵ “Na chunguh a gik hi! Nanguh Danthuzik leh Pharisai gukhahte haw! khawn leh kuong pawlam na sawp ngim u a, a sunglam chuh la nekgûkna leh kidêklohna’n a dim ngâl in.

²⁶ Nang Pharisai mitdûk, khawn leh kuong sunglam chuh sawp ngim masa’n ti a chuh a pawlam le a hung thien theihna dingin.

²⁷ “Na chunguh a gik hi!” Danthuzikte leh Pharisai gukhahte haw, Thân nuh vam, pawlam hawih taka lang, a sunglam chula, mithi guh leh thil thanghuoi tin chenga dim guol chuh na hiu a puo!

²⁸ Nang haw le ziehaw guola chuh, pawlama mihiem muh a diktata kilang, na sunglam u chuh la, gukhah na leh gitlohna’n na dim ngâl u a.

Gawt na ding Genlawkna

²⁹ “Na chunguh a gik hi! Nang haw Danthuzikte leh Pharisai, gukhahte haw,

³⁰ Thiemgau haw dingin thân na bawl u a, mi diktatte thân le na zem hawih u a, ‘I pileputeu damlai khan na um, hi leuhing le, thiemgau te thahna achun na tel puoi tiu,’ na ti sek ui.

³¹ Khutichun, nangmau ngêi chuh, thiemgau haw thatte cha na hih uh na kihetsak uh ahi.

³² Na pileputeu tehna chu hih dim ngâl mai un.

³³ Nang haw gulte haw, gûl suonte haw, Gehen a vaihawmna chu bangti’n a na pelhthâk theih dinguh?

³⁴ Ngaitiem u, ziebang tak chun na kawm u ah thiemgaute, miching te, danthuzikte hun sawl ding ka hi; abang chuh that un na tin uh, kross ah khên den unlau, a bang chuh na kikhawpna In hawu ah savun khau in zêp un na tin uh, khaw tin ah bawl gimthei zui zel unlau.

³⁵ Khutichun, mi diktat Abel thisan apat in, Pathien Ho-In leh maichâm kikala Berekiah chapa Zakaria na thah pau thisan ngêi khan, lei chunga mi diktat thisan a suoh teu chengcheng phuba chuh na chungu ah hung tung thei ina.

³⁶ Tihtakzet a ka hilh na hiu hi, ziehaw chengcheng chuh tulai khang thakte chunga hin hung tung ina

Isu’n Jerusalem A Kahchamna

³⁷ “Aw Jerusalem, Jerusalem, thiemgau haw that, na kawma Pathien in thupuo a hun sawlte that a, suong a sep lum! Akpi’n a note a tha nuoia a awp khawm guolin, na chate bang zat vei a awp khawm ka guot khah! Himahlele, na ut ngâl puou a.

³⁸ En tiem u, na Ho-In chuh taihsan leh a hawm a um ding ahi.

³⁹ Ka hilh na hiu hi, ‘Lalpa min a hung chuh a hamphai,’ na tih masangsieh uh, tu apat hin nei mu kit ta lo ding na hiu hi,” a ti a.