MATTHAI 21 - PATHIEN LEKHABU THIENGTHO (BSI)

Zotu a Jerusalem a Lutna

¹ Chun, Isu leh a sinsakte chuh Jerusalem khuo a tun ding kuon un, Bethphage khuo, olive tâng chuh a tung uh a. Taka chun Isu’n a sinsakte nih a sawl a a kawm u ah,

² “Na ma zawn uh a khuo a khun va chieh unla, sabiltung kihên, a kienga a no um tawh mu zieng un na tin; phel unla, ka kawmah hun kai un.

³ Chun, kuon le na kawm u ah bang gen leu le, ‘Lalpa’n a deih ahi.’ tiu in na tin uh; tichun, amah chun hun sawl zieng ina,” a ti a.

⁴ Zie chuh thiemgau in: “Entie, na leng chuh, nunnem takin, sabiltung chungah sabiltungno chung ngeia chu’n;

⁵ Na kawma hung ding ahi, ti’n, Zion chanu chuh hilh ah.” ti a thiemgau kama a gen khah a hung guitun theihna dinga hung um ahi tai.

⁶ Tichun, sinsakte chuh a va chieh u a, Isu’n a kawm u a thu a piek bang chun a bawl u a,

⁷ sabiltung leh a no chuh a hun kai u a; a chung achun a puon uh a phah u a, amah chuh a chut sak tau a.

⁸ Tichun, mipi laka a tamzaw chun lampi achun a puon uh a phah u a, a dangin thing theubawk a sat u a, lampi ah a phah u a.

⁹ Chun, mipi, a malam a chiehte leh a nunga zuite chun: “David chapa kawmah, Hosanna! Lalpa min a hung chuh a hamphai! Chungnung pên a khun Hosanna!” ti’n a kiko u a.

¹⁰ Chun, Isu chuh Jerusalem khuo a hung lut phetin, a khuozâng un: “Zie pa hi kuo ahim?” ti’n a phu mul mul zieng tau a.

¹¹ Mipite chun, “Zie pa hi thiemgau Isu, Galili gama Nazareth khuo a um chuh ahi.” a tiu a.

Pathien Ho-In Sukthienna

¹² Chun, Isu Pathien Ho-In achun a va lut a, Ho-In a thil zuokte leh chawte chengcheng chuh a delh dawk a, dangka thengte dawhkhâng leh, vakhu zuokte chutphah haw chule a sawtpaih sak a, a kawm u ah,

¹³ “Ka In chuh, pauchamna In ti’n au tih zik ahi ngâla; himahleh, nanghaw’n la suommangte kisêlna In in na siem zawu in,” a ti a.

¹⁴ Chun, Ho-In achun mitdûkte leh kêngbâite a kawmah a hung u a, amau haw chuh a na sudam a.

¹⁵ Himahlele, Thiempuliente leh Danthuzikte chun a thilmak hih haw leh, Ho-In a, “David chapa, Hosanna!” ti a chapang kikote chuh a muh un a lungkim lo mah mah tau a, a kawmah,

¹⁶ “Ziehaw thugen hi na za?” a tiu a. Isu’n a kawm u ah, “Za e, ‘Nausente leh nawichep laite kama pawt chun pahchakna na hih bukim tai,’ tih hi na sim kha puou hi?” a ti a.

¹⁷ Tichun, amau haw chuh a taihsan a, khawpi apat chuh a pawt a, Bethani ah a chieh a, tak achun a giek ta a.

Isu’n Theipi kung a Gâusapna

¹⁸ Chun, zingkala khawpi lam a zawt kit phetin, a gil a hung kiel ta a.

¹⁹ Lam panga chun theipi kung khat a mu a, a va zuon a, a nah ngâllo chuh bangmah a mu puoh a. Khutichun, thing kawm achun, “Kumkhuo’n gah ta kih,” a ti a. Tichun, theipi kung chuh a nâng zieng ta a.

²⁰ Chun, sinsakte chun zie chuh a. muh phet un, “Bangtia zie theipi hi nâng zieng ahi ta?” tin mak a sa ten tau a.

²¹ Isu’n a kawm u ah, “Tihtakzet a ka hilh na hiu hi, taksanna na neih u a, na ginlah loh u chun, theipi chunga ka hih bang mai cha hi hih puou un na tin uh, zie tâng kawma hin le, ‘Na kichawn inla, tuisuohgiet ah na kipaih lut ah,’ na tih u chun na tih guol u chun hung um ina.

²² Chuleh, bangakai, gingcha kawma na nget tâk phawt u chuh mu’n lau,” ti’n a dâwng a.

Isu Thuneihna chunga Dawtna

²³ Chun, Isu Pathien Ho-In a a lut kit nunga, a sinsak lai chun, thiempu liente leh vantâng upate chuh a kawmah a hung u a, a kawmah, “Kuo thu’n a zie thil haw hi na hih? Kuo a thu hun pie?” a tiu a.

²⁴ Chun, Isu’n a kawm u ah, “Ken le nang haw thu kam khat hun dawng ing ka, zie chuh nei hilh u chun, kuo thu’n a zie thil haw hi ka hih hun hilh ing ka:

²⁵ Johan baptistma kha kuo thu ahim? Van a um thu ahim, mihiem thu?” ti’n a dawng a. Tichun, a kingaihtuoh u a, “Vana um thu, ti leng la, ‘Bang dinga a thu awilo na hiu hi leh?’ ei ti’n tin.

²⁶ ‘Mihiem thu’ ti leuhing la, mipi chuh I lau ngâl u a; mi chengcheng in Johan chuh thiemgau in a ngai ngâl u a,” a kitiu a.

²⁷ Tichun, Isu a dâwng u a, “Ka he puou hi,” a tiu a. Ziephet chun, amah chun le, “Ken le, kuo thu a zie thil haw hi ka hih ahim tih nang haw hun hilh diek puo’ng ka.

Chapa Nih apat a Tehkal Thu

²⁸ “Nang haw’n bangti’n na ngai u? mi kuo ahim in chapa nih a nei a. A chapa upa zaw kawm achun a chieh a, ‘Ka chapa, tuni’n grep huon ah na va sem ah,’ a ti a.

²⁹ Amah chun, ‘Ka nuom puoi’ ti’n, a dâwng a, Himahleh, vainung chun a lung ahun hei a, a chieh ta a.

³⁰ Chun, khat kawm achun le a va chieh a, khutibangmah chun a va ti a. Amah chun, ‘Hi, hepu, chieh ing ka’ ti’n a dâwng a, himahlele a chieh ngâl puoh a.

³¹ Ziete nih chun a kuo zaw hin a pau deih bang chuh a hih zawu hi leh?” a ti a. Amau chun, “A upa zaw chun,” a tiu a. Ziephet chun, Isu’n a kawm u ah, “Tihtakzet a ka hilh na hiu hi. siehdawlte leh nawhchizuokte chun Pathien gam a hun lut khelh ding ahiu hi.

³² Johan chuh lampi dik hun kâwkmuh dingin a hung a, himahlele, na gingcha ngâl puou a; siehdawlte leh nawhchizuokte chun a mah chuh a gingchau a, nang haw’n zie chuh na muh nung un le, na ginchak theihna dingun na lung uh na hei nuom diek puou a.

Grep Huon Enkawlte Tehkalna

³³ “Tehkal thu dang ngai un, mi kuo ahim, gam nei khat a um a, zie pa chun grep huon a bawl a pal in a ûmkimvel a; grep thâwkna khûk a lai a, in sang a sa a, tichun a ngakte kawmah thawh lawh dingin a pie a, gam chuom ah a chieh ta a.

³⁴ Chun, a gah lawh phat a hung hih phetin, a chanvo la dingin a ngakte kawm achun a suokte a sawl a.

³⁵ Chun, a ngakte chun a suokte chuh a na man u a, khat a zêp u a, khat a that u a; khat suongin a sep u a.

³⁶ Chun, suok dang amasa lawi sanga tam zaw a sawl kit a, amau haw chunga chun le amasate chunga a hih bang u chuh a na hih kit u a.

³⁷ Chun, zie nung chun, ‘Ka chapa hi sawl leng a na zah un au,’ ti’n a chapa chuh a kawm u ah a sawl ta a.

³⁸ Himahlele a ngakte chun a chapa chuh a muh muh un, ‘Amah hi go luoh ding chuh ahi, that hitiu khai! tichun, a go luoh ding hi eihaw chang hi tiu,’ a kitiu a.

³⁹ Tichun, amah chuh a man u a, grep huon apat chun a puidawk u a, a that tau a.

⁴⁰ “Khutichun, grep huon neipa chuh a hung tieng leh zie huon ngakte chuh bang a hun lawh ta dem?” a ti a.

⁴¹ Amau haw chun a kawmah, “Zie mi gilote chuh dahum takin sumang intin, grep huon chuh, huonngak dangte, a gah lawh phat chenga a gah haw chuh amah kawma pie thei dingte khut ah thawh lawh dingin pie’n a,” a tiu a.

⁴² Ziephet chun, Isu’n a kawm u ah, “Pathien lehkha a: ‘In sate suong deih loh khah; Zie ngêi chuh a ning a suong phachuom pên a na hi tai. Zie chuh Lalpa hih ahi a, I mitmuh un amak ahi,’ tih hi sim khalo na hiu hi?

⁴³ “Zie ziek tak chun, ‘Pathien gam chuh na kawm u apat a lâksak hi’n tin, a hung gah dawk ding nam khat kawma piek hi’n a,’ tih ka hun hilh na hiu hi.

⁴⁴ Chun, zie suong chunga puk chuh kek gawp intin; a delh khâk vang chuh gawt nêl ina,” a ti a.

⁴⁵ Tichun, thiempu liente leh Pharisaite chun a tehkal thugen chuh a het phet un amau haw chungchâng gen ahi tih a hung kihe tau a.

⁴⁶ Tichun, amah chuh mat a guou a; himahlele mipite chuh a lau ngâl u a, thiemgau a sak ziekun.